JJM hnuaia Tlungvel leh Darlawng tuilakna hawn a ni

Jal Jeevan Mission (JJM) hnuaia Tlungvel Multi Village (Tlungvel & Darlawng) WSS, Tuirini Grid pumping thawh zawh tak chu nimin khan PHE Minister Prof. Lalnilawma chuan a hawng.
Mi 5210 chawm thei tura cheng nuai 1342 senga siam he tui lakna hawnna hun Tuirini Pump House Complex-a neih ah Minister Prof. Lalnilawma chuan Mizoram sawrkarin mipuite tui thianghlim hniang-hnar zawk a pek a ngaipawimawh tih sawiin, chumi tihlawhtling tur chuan PHE Department a thawktute nen thawhhona tha tak hnuaiah theihtawp an chhuah tih a sawi a. PHE Department chuan mipui Tui supply chungchangah a ni emaw, Department hmalakna lam chi ah reng reng mipui harsatna sutkian sak turin a theihna chinchin ah theih-tawp a chhuah mai bakah mipuite harsatna dawngsawng thei turin a in hawng reng tih a sawi bawk.

Tlungvel leh Darlawng chawmna tura tui lakna hi ‘Tlungvel Multi Village Water Supply Scheme (Tlungvel & Darlawng)’ tih niin December ni 8, 2021 khan Adminstrative Approval & Expenditure Sanction hmuh a ni a, February ni 10, 2022 ah Technical Sanction pek a ni bawk. He hna hi M/S Exelsior Merchants Pvt. Ltd, Chaltlang, Aizawl te chuan thawkin April ni 11, 2022-ah Agreement ziahpui an ni a, a sak hna tak hi June ni 6, 2022-ah tan niin April ni 22, 2024-a zo tura ruahman a ni a. Local Contract & Departmental Works hi January ni 20, 2025 khan zawhfel a ni a, Raw Water & Clearwater Stage-1 Pump trial run hi January ni 31, 2025 ah neih a ni a, Clearwater Stage-2 Pump trial run chu May ni 25, 2025-ah neih a ni bawk.

Tlungvel khua in Water Supply Scheme mumal tak a neih hnuhnun ber chu Vawmhraw Lui Grid Pumping Scheme niin January 13, 2001 khan hawn a ni a, hei hi a rei tawh deuh avangin tui harsatna a nasa leh tawh hle a, Jal Jeevan Mission hnuaiah Darlawng nena tui lakna hi siamin hawn a ni leh ta a ni.