MSPCC-in DDK Aizawl leh IDBI te MoA a ziahpui

Mizoram Flagship Programme ‘Bana Kaih Scheme’ tihchangtlunna kawngah Mizoram State Policy Coordination Committee (MSPCC) chuan Doordarshan Kendra (DDK) Aizawl leh Industrial Development Bank of India (IDBI) te chu thawhhona thuthlung, Memorandum of Agreement (MoA) a ziahpui.

MSPCC hi nimin khan Planning & Programme Implementation Department Committee Room-ah Adviser to Chief Minister (Handholding) Dr. KC. Lalmalsawmzauva hova thukhawmin MSPCC chuan DDK Aizawl chu Bana Kaih Policy tih changtlunna leh hmalaknate tlang-zarhna kawnga thawhpui atan thawhhona thuthlung Memorandum of Agreement (MoA) a ziahpui a. He MoA hian thla thum chhung (January - March, 2026) thleng a huam dawn a ni. MSPCC hian Industrial Development Bank of India (IDBI) chu Bana Kaih Scheme hamthatna mipui tam zawk hnena a thlen theihna tura thawhpui atan MoA a ziahpui nghal bawk a ni.

Nimin-a MSPCC thutkhawm ah hian Bana Kaih Scheme hnuaia hmalakna hrang hrangte thlirho a ni a. Progress Partner atanga dilna lutte endik niin Project Proposal leh Concept Paper thehluhte zirchianna neih nghal a ni. Bana Kaih Scheme hnuaia Department hrang hrang kaltlanga Loan diltute enfiahna leh an hmachhawpte zirchianna neih niin hmalak ngai hrang hrangte a tul anga bawhzui dan tur sawihona neih nghal a ni bawk.

Hei bakah hian Bank aiawh Nodal Officer te atangin an hmalakna Report ngaihthlak niin theihtawp lo chhuah chhunzawm zel tura sawm an ni a. Bank atanga Report dawn angin Bana Kaih Scheme Phase-I hnuaia Loan Sanction tawh zat chu SBI kaltlangin 47, MRB kaltlangin 218 leh MCAB kaltlangin 39 a ni a. Phase-II pawh kalpui mek zel a ni a. He thutkhawmah vek hian Bana Kaih Scheme hnuaia CM Special Package Grant dilna 45 pawm nghal a ni bawk.