MPSC in kum kalta ah hna 349 lakna Advertisement a tichhuak

Mizoram Public Service Commission (MPSC) chuan sawrkar kum liamta kum April 1, 2024 atanga March 31, 2025 chhung khan sawrkar hna 349 atan hna lakna Advertisement 55 a tichhuak a, hemi chhung vek hian RTI hmanga zawhna 1056 an dawng bawk.

MPSC-in 34th Annual Report 2024-25 a tihchhuah thara a tarlan danin, MPSC hian kum 2024-25 chhung khan sawrkar hna (post) 349 atana Advertisement 55 an tichhuak a, heng Advertisement an tihchhuah ah hian dilna 65,850 a lut a, dilna 2,201 hnawl niin, Written Exam tum 30 leh Personal Interview tum 22 an buatsaih hman a ni.

MPSC hian sawrkar kum liamta chhung khan Courts case pathum an nei a, heng zinga pakhat chu chinfel tawh niin MPSC an chak a, a dang pahnih chu Supreme Court-a ngaihtuah turin ala awm mek thung a ni.

Kum 2024-25 chhung khan MPSC hian online leh kutziak hmangin RTI zawhna 1,056 an dawng bawk a, RTI hmanga zawhna a dawnte hi hna exam-naa mark hmuh zat zawhna leh exam kaihhnawih thil dang hrang hrang a ni tlangpui tih MPSC hotute chuan Akashvani News, Aizawl an hrilh a; chhanna an pek zingah chhanna an pekte duhkhawp loh vangin zualko vawi khatna (First appeal) 29 an dawng a, heng ah hian chhanna pein, zualko vawi hnihna (Second appeal) erawh an dawng lo thung a. Mizoram State Information Commission chuan MPSC hnenah hian RTI zawhna an chhan that avangin RTI Excellence Award 2024-25 lawmman pakhatna a hlan a ni.