District Cooperative Development Committee thutkhawm nei

Nimin khan Serchhip-ah District Cooperative Development Committee(DCDC) thutkhawm vawi 6-na neih niin Cooperation Department changtu Commissioner & Secretary Udit Prakash Rai leh Registrar of Cooperative Societies John LT. Sanga te chuan an rawn telpui a ni.
He thutkhawm Serchhip DC Meeting Hall-a neih ah hian Serchhip District-a Cooperation Department hnathawh dan te thlirho a ni a, Cooperative Society hrang hrangte hmasawnna tur leh tihlen zel dan turte sawiho niin MIZOFED chu an sumdawnna zauh zel tur leh Mizoram Cooperative Apex Bank (MCAB) pawh Loan pekchhuah kawngah Cooperative Society-te duhsak turin an hriattir a. Society aiawh te pawhin an hmalaknate sawiin, Hmunphiah hralhna kawnga harsatna an tawh mek chu chinfelpui turin State lama hotute hi an ngen a ni.

Mizoram State Cooperative Societies hotute hian Serchhip an rawn panna kawngah hian Khumtung, Baktawng leh Chhuanthar Tlangnuam-a Cooperative Societies te an tlawh a, Khumtung-ah hian Farming Cooperative Society Ltd. Balhhla umna hmun tlawhin Chhuanthar Multipurpose Building-ah Society hotute nen an inkawm a, an hmalakna te an sawiho bawk a ni.

Nimin-a DCDC thutkhawm ah hian Serchhip District Cooperative Officer C. Vanlalhruaia,  Line Department hrang hrang - DRDO, AH&Vety, Revenue, Fisheries, Agriculture Department hotute an tel a. Keitum M-PACS Ltd. Board of Director MAHFED Ltd., Baktawng Consumer Cooperative Society Ltd. Board of Director MSCU, District Cooperative Union, MIZOFED leh MCAB  aiawh te an tel bawk a ni.