Mizoram Synod in Jordan Centre lak an remti

Mizoram Presbyterian Kohhran Rorelna sang, Synod Inkhawmpui vawi 102-na chuan Sethawn-a awm Jordan Center chu lak tha tiin an pawm.

Ruihhlo ngaite enkawlna hmun Sethawn-a ‘Jordan Centre’ hi sawrkar in a enkawl thin a, nikum June thla khan Chief Minister Lalduhoma hova Council of Minister thukhawm chuan midang kuta hlanchhawn an remti a, kumin June thla khan Social Welfare Department chuan Jordan Center enkawl chungchangah hian Mizoram Synod a lo dawr tawh a. Synod Executive Committee (SEC) chuan hemi chungchang hi a ngaihtuah a, tun tum Synod inkhawmpui ah chhawpchhuah niin Jordan Center lak hi rorel palaite chuan tha an ti a, SEC chu lo bawhzui turin an ti a ni. Heng bakah hian thu pawimawh hrang hrang rel a ni bawk.

Mizoram Synod Inkhawmpui vawi 102-na ah hian nimin chawhma Inkhawm ah  Pastor Nemngheh leh Pro. Pastor ruat inkhawm neih a ni a, he hunah hian Pastor 20 nemngheh niin Pro. Pastor 19 ruat an ni bawk a, Chawhnu-ah Lalpa Zanriah Sakramen kilho niin nizan-a Pathian biak Inkhawm ah Moderator kalchhuak R.C. Lalnghakliana hnen atangin Valedictory Sermon ngaihthlak a ni bawk.

Synod Inkhawmpui hi kum 2010 atang khan Pastor Bial-in an thleng tan a, kumin 2025 hian Dawrpui Pastor Bial-in Zarkawt Kohhran Biak In-ah an thleng a. Rorel palai mi 2109 awmin Palai thlan mi 1264 leh palai nisa mi 845 an ni a. Inchhiarna atanga a lan danin Mizoram Synod-ah hian Presbytery 48 awmin Pastor Bial 310-ah Kohhran 1,185 an awm a, Kohhran member Mipa 3,12,153 leh Hmeichhia 3,34,738; an vaiin 6,46,891 an awm a. Nakum-a Mizoram Synod Inkhawmpui vawi 103-na chu Chanmari Pastor Bialin Chanmari Kohhran Biak Inah an thleng dawn a ni.