Kalphung thar sawrkar chu mi taima tan dinchhuahna tur sawrkar a ni dawn tih sawi

AH&Vety Minister C. Lalsawivunga chuan Kalphung thar sawrkar chu mi taima tan dinchhuahna tur sawrkar a ni dawn tih a sawi.

Leng Zirna Centenary (1925-2025) lawmna ni hnih (2) awh nimin-a Saihnuna Hall, Leng-a neih a hmanpuina ah AH&Vety Minister C. Lalsawivunga chuan sawrkar chuan mipui tan zirna tha, kawngpui tha, tui leh power-a intodelh bakah Healthcare system tha zawk leh hmasawnna rotling pek a tum mek zel tih sawiin, “Mizo mipuiten hma kan sawnna tur leh khaw hrang hrang intodelhna tura Flagship programme kan neih Bana Kaih te, Department hrang hranga hmasawnna tur ruahmanna kan siamte a chhawr tangkai bertu ni turin Leng mipuite duhsakna ka hlan che u a, kalphung thar sawrkar hi mi taima tan dinchhuahna tur sawrkar a ni dawn,” a ti a. “Kan intiam ang ngeiin kuthnathawktute thlai thar Sawhthing, Hmunphiah leh a dangte leiin kan tihlawhtling tawh a, kumthar ah pawh Sawhthing kan lei leh dawn a, Hmarcha leh Hmunphiah bakah thildang pawh kuthnathawktute tharchhuah lei zel kan tum a ni,” a ti.

AH&Vety Minister chuan Agriculture Sector-a thingtlang mipuite hmasawnna tur chu an ngaih pawimawh ber pakhat a nih thu sawiin, “Chutih rualin hriselna kawnga an hmasawnna tur leh hamthatna an dawn theihna tur, tunhma Health Care ang ni lo Mizoram Universal Health Care Scheme pawh tangkai taka hmang turin ka duh che u a ni,” a ti a. Mi taima tan ZPM sawrkar chu dinchhuahna tham a ni dawn tih sawiin, “Horticulture Department hnuaiah Thei leh Thlai Pilot Project kan kalpui mek a, mi 3700 chuang ten hma an la mek a ni. Ranvulh lamah pawh rampawn atanga lakluh tih tlem tial tial a, kan intodelh chhoh dan tur kan hotuten nasa takin ngaihtuahna an seng a ni,” a ti bawk.