Halpuah leh halmawi khuahkhirhna Bill nakum-ah putluh tum

Mizoram-a Halpuah leh halmawi khuahkhirhna Dan hman tura duan chu nakum lamah Assembly Session-ah putluh tum a ni.

Nimin khan Home Minister K. Sapdanga hovin Aizawl-a Secretariat Conference Hall-II ah kumin Krismas leh kumthar vuakveta halpuah, halmawi leh puakthei thil khapna thupek (Prohibitory order) leh ‘The Mizoram Firecrackers (Regulation & Control) Bill, 2025’ chungchang sawiho a ni a, ‘The Mizoram Firecrackers (Regulation & Control) Bill, 2025’ hi kumin a hmang nghal tur chuan hun a tepter tawh si a, nakum-a Budget Session-a Regular Bill anga putluh tha zawkin an hria a, putluh turin an rel a ni.

He Meeting hian kumin hi halpuah leh halmawi halin mihring leh ran laka nghawng tha lo a nei theihzia inzirtir uar kum, ‘Year of Awareness Campaign on the harmful effects of Firecrackers’ atan hman nise, kum dang zawng aiin Awareness campaign uar nise an ti a. Kum danga lo kalpui tawh thin angin Central YMA kaltlangin YMA Member tin te hnenah; Kohhran tin kaltlangin an Kohhran mi leh sa te hnenah; Central Para-Military Force te, Central Police Organization hrang hrangte hnenah; Mizoram Merchant Association (MIMA) leh Online Marketing Agency te hnenah leh GAD kaltlangin Sawrkar hnathawk te hnenah khapna thupek zawm tura ngenna siam leh nise an ti bawk.