Serchhip Sailiamkawn-a ‘Kawlni Filling Station’ bun thar Assembly Speaker in a hawng

Serchhip chhimlam kawtchhuah, Sailiamkawn-a ‘Kawlni Filling Station’ chu nimin khan Mizoram Legislative Assembly Speaker Lalbiakzama chuan a mamawhtu apiangte tana hman theih turin a hawng.
He Filling Station thar hawnna hunah hian Speaker Lalbiakzama chuan Chief Minister Bial-ah Filling Station thar hawn a ni chu lawmawm a tih thu leh Serchhip leh a chhehvel khua bakah khualzinte tan a tangkai dawn hle tih a sawi a. Khawvel thiamna avangin Electric khawl hmang lirthei te chhuak mah se Oil mamawhna chu a la ngai reng tih sawiin, ramri buai leh Fur khua avanga lirthei tlan harsat chang pawhin mipuite mamawh phurhuk ngai langsar tak chu tuialtheih ah a nih thu a sawi a. Mizoram-a Petrol Pump neitute pawl, All Mizoram Petroleum Dealers’ Association (AMPEDA) pawhin mipuite tana malsawmna nih chu an tum ber a nih thu te, bukna dik lo leh tehna dik lo an duh lohzia te te sawiin, Oil chungchanga mipuiten harsatna an neih chuan thuneitute hnena thlen thuai thin turin a chah a. Filling Station neitute pawhin thil dik lo a awm a nih chuan chinfel thuai thuai an duh a, chingfel turin thuneitute beng a thlen a ngai thin tih sawiin Consumer hruaituten chu chu lo hriaa, lo ngaihvenpui thin turin a ngen bawk.

Nimin-a hawn tak ‘Kawlni Filling Station’ hi Bharat Petroleum Corporation Ltd. (BPCL) hnuaia mi niin Serchhip Dinthar Veng-a Lalnghinglova Kawlni te chhungkaw ta a ni a, tun dinhmunah Serchhip-a Petrol Pump pahnihna niin Mizoram-ah Bharat Petroleum Corporation Ltd. hnuaia Petrol Pump 14 na a ni a. Serchhip Sailiam atanga Thenzawl panna kawngpui hrul-ah a awm a, he Petrol Pump thar hi Pastor K. Lalhmangaihzuala’n Pathian hnena hlanna a nei bawk a ni.

Petrol Pump thar hawnna hun hi Serchhip Bawrhsap Paul L. Khuma pawhin khual zahawm nia hmanpuiin Serchhip-ah Petrol Pump pakhat chauh a awm thin avangin Oil harsatna kan tawh changin khaw thenawm ah Oil la tura kal ngaiin mipui ten harsatna nasa tak an tawh thin thu a sawi a. Chu harsatna chu he Oil Pump thar hian a sutkian ngei a beisei thu a sawi a, Serchhip District-a Petrol Pump te lakah complaint dawn an neih zauh zauh thu sawiin, thuneitute pawhin a hmuna enfiah te pawh an neih thin thu a sawi a, chutiang chu awm lo se a duh thu sawiin, rinawmna leh thahnem ngaihna nen a neitute pawhin enkawl zui se a duh thu a sawi bawk a ni.

‘Kawlni Filling Station’ hawnna hunah hian AMPEDA President K. Lalnghakliana chuan Mizoram-a Oil Depot nei tura an hmalakna kal mek sawiin, Serchhip District Consumers Association, Bharat Petroleum Corporation Ltd. leh Zoram Drivers Union (ZDU) Sub-Hqrs. Serchhip aiawhte pawhin thu an sawi a, a neitute atangin Lalruatsanga Kawlni leh Lalnghinglova Kawlni ten lawmthu sawina hun hmangin, Pastor Challiandinga’n tawngtainain hun a khar a ni.