Tuichang lui-ah ‘Nghakuai Chiah runpui’ neiin a vaiin kg. 56 vel-a rit khaichhuah a ni

Keitum leh Khawlailung inkar Tuichang lui-a ni hnih (2) chhung awh ‘Nghakuai Chiah runpui’ neih chu Inrinni khan a kharna hun hmangin he hun hi Fisheries Minister Lalthansanga chuan khuallian niin a hmanpui a ni.
Mizoram sawrkar-a Fisheries Department leh Tourism Department bakah Keitum VC leh YMA leh Mizoram Angling Associate te tangkawp buatsaih Nghakuai Chiah runpui kharna hunah hian Fisheries Minister Lalthansanga chuan Tuichang lui a YMA te Sangha humhalh thin ah Nghakuai chiah runpui neih theih hial khawp a lo ni ta chu lawmawm a tih thu sawiin, Mizoram hmun hrang hranga Nghakuai chiahtute tana intihsiakna leh intihthawvenna (Sport Fishing) atan hlawhtling taka hun hman a ni thin chu lawmawm a tih thu a sawi a. Hmun dangah chuan October leh November chu Nghakuai chiahna hun atana hman a nih thin thu leh keini ah erawh chuan December-ah kan neih thin thu sawiin, hmun hrang hrang atanga hetiang lam ti mi te an rawn tel theih nan ngaihtuahna sen a nih tur thu a sawi a. Sangha manna atana Tur leh bomb te kan hmang ta lo rel chu lawmawm a tih thu sawiin, kan luidung kan humhalh hian hlawkna tam tak kan hmuh thu a sawi a ni.

Tuichang lui-a ‘Nghakuai Chiah runpui’ hi December 12 leh 13, 2025-ah neih niin hemi hun chhung hian Mizoram District 10 atangin Nghakuai khai tur hi an kalkhawm nia chhinchhiah a ni a, mi 24 ten Sangha khaichhuakin a vai-a Sangha an khaichhuah chu kg. 56.05 nia chhinchhiah a ni bawk a, Sangha khaichhuak tha te hnenah hian Fisheries Department Director, Zonuntluangi kaihhruaiin lawmman hlan niin mipa-a Sangha khaichhuak lian ber HZ. John Lalmalsawma (Kulikawn) chuan kg. 4.40 a rit khaichhuakin Rs. 5000/- a dawng a, Lalrinfela Chhangte (Thingsulthliah) chuan kg. 3.795-a rit khaichhuakin Ramengmawii (Khatla) chuan kg. 3.280 a rit a khaichhuak bawk a, ani hian hmeichhe zinga khaichhuak lian ber lawmman a dawng bawk. Sangha man zawng zawng belhkhawm a man tam ber David Zonunsanga (Mission Veng) chuan kg. 11.175-a rit khaichhuakin lawmman a dawng bawk a, heng bakah hian Sangha khaichhuak upa ber leh naupang ber te hnenah pawh lawmman hlan an ni bawk. He Nghakuai Chiah runpui kharna hun hi Fisheries Department Joint Secretary Zonunthari chuan a kaihruai a ni.