SIRD&PR Mizoram kum 25 tlin lawmna neih a ni

State Institute of Rural Development & Panchayati Raj (SIRD& PR) in kum 25 a tlinna, Silver Jubilee lawmna chu Ningani khan Aijal Club-ah neih a ni a, he hun hi Rural Development & Administration Department (RD&AD) Minister Prof. Lalnilawma chuan hmanpuiin Silver Jubilee Souvenir a tlangzarh nghal bawk.

SIRD&PR Silver Jubilee lawmna hi SIRD&PR Director R. Lalremsanga chuan kaihruaiin Associate Professor Dr. Malsawmdawngliani Fanai chuan report a pe a, he hunah hian Minister Prof. Lalnilawma chuan SIRD&PR din a nih theih nana sulsutute thawhrimna chu fakawm a tih thu a sawi a. SIRD&PR chu Mizoram tan a tangkai thu leh tangkai lehzual tura ngaihtuahna senga, hmalaknate zauh zel a ngaih thu a sawi a. Self Help Group-ten thil chi hrang hrang zawrh tham tak tak an tharchhuah tawh thu tarlangin, SHG-te thil tharchhuah leh siamte chu ‘Selhel’ brand hmanga market tur a nih thu sawi bawk.

SIRD&PR hi October 16, 2000 khan Mizoram sawrkar chuan dinin Rural Development & Administration Department hnuaiah Autonomous Body a ni a, State leh Central sawrkar-in a enkawlna senso hi an intum sem a ni. SIRD&PR hi a tirah Directorate of Rural Development, Aizawl hnuaiah awmin kum 2002 khan Kolasib-ah dah a ni a, October 2016 khan Durtlang Campus-ah insawn lehin he Campus hi kum 2010 khan Ministry of Rural Development, Govt. of India chuan a sakna atan cheng nuai 1707.89 a seng a. Conference Hall 2, Class Room 1 leh Video/Training Conference Hall 1, Auditorium 2 leh Hostel leh Guest House a awm a. Hostel leh Conference Hall te hi Department dang tan pawh Nominal Cost in a ruah lai chuan hman theih a, SIRD&PR, Durtlang Leitan-ah hian Director bakah thiamna hrang hrang nei Core Faculty 7, Faculty 4 leh Staff 15 bawr an awm a ni.

SIRD&PR hnuaiah Siaha, Champhai, Serchhip, Mamit leh Kolasib-ah te District Panchayat Resource Centre (DPRC) a awm a, Hengte hi Head Faculty leh Staff dang ten a hmunah an thutchilh vek bawk a. Heng bakah hian Lunglei, Thingsulthliah leh Kolasib-ah Extension Training Centre (ETC) a awm a. ETC te hi Ministry of Rural Development, Govt. of India in Infrastructure Development a din a, Training Fund atan kumtin cheng nuai 20 a pe ve thin a. Principal leh Staff salary te hi erawh chu State sawrkar tum a ni a. ETC/DPRC zawng zawng hi Hostel, Conference Hall, Auditorium leh Staff Suarters tha taka thuam vek an ni a, heng te hi a ruah lai chuan Nominal Cost-a hman theih vek a ni bawk.

SIRD&PR hnathawh ber chu Training buatsaih a ni a, High Officials atanga Self Help Group (SHG) thlengin training an pe thin a, kumtin Training Programme 100 bawr bakah Research, Social Impact study, Social Audit leh Study dang an nei thin a ni.