Chuhvel Rubber chingtute Zau panna kawng hawng

Chief Minister Lalduhoma chuan nimin khan Chuhvel Rubber chingtute Zau panna kawng hawngin, Land Resources, Soil & Water Conservation Department changtu Minister Lalthansanga leh sawrkar mi pawimawh dangte pawhin an hmanpui a ni.

Chuhvel Rubber chingtute Zau panna kawng a hawnna ah hian Chief Minister chuan sawrkarna an chelh hnu reilote ah India Rubber Board Chairman Dr. Shawar Dhanania nen a Office-ah inkawmin Tripura State-in CM Rubber Missions an kalpui dante sawidun in, Mizorama kalpui ve a that thute, a tul anga Rubber Board in an thawhpui an inhuam thute a hrilh thu a sawi a. “Tripura State-a an kalpui dan zirchiangtu tur mithiam ka tir thla a. Nikum December ni 16 khan Mizoram Chief Minister Rubber Missions chu kan hawng ta a ni. Ka hawn ni-ah hian hna kan thawh tan mai na tur cheng vbc. 27.98 sanction-na lehkha chu NABARD atangin kan dawng nghal nghe nghe a ni,” a ti a. He Missions hnuaiah hian kum 5 chhungin Hectare 11,500 a Zau-ah Rubber chin khah vek an tum dawn thu leh Department-in a chhinchhiah danin Mizoram Hectare 50,000 a Zau-ah Rubber hi chin theih a, a chinna tlaka ngaih hmun thuma thena hmun khatah pawh kan la chin loh thu a sawi a ni.

Rubber hi hmun hniam lam, Sea Level atanga meter 500 aia sang lovah a tha duh tih Chief Minister chuan sawiin, “Hectare 1-a zau ah kung 450 vel phun theih a ni a, Department chhinchhiah danin Mizoram chhung bikah Rubber kung puitling pakhat atangin kum 1 chhungin Rubber hnai kg 2 atanga kg 4 thleng a thar theih a. Hectare 1 zauvah a tlangpuiin kg 1000 atanga kg 2000 vel kum khat chhungin a thar theih tihna a ni a. Tunlai market rate anga chhutin Hectare 1-a zau ah Rs.1,80,000 atanga Rs.3,60,000 vel a lakluh theih tihna a ni,” tiin Rubber chin chu tlangram loneih bansan a, eizawnna ngelnghet neih nan a that thu leh Ramngaw chereu zel tur ven nan te, lei chung hang luangral tur venna atan leh tuihna humhalhna atan pawh a tangkai hle tura ngaih a nih thu a sawi a. Kum 2025-26 ah Phase-II kalpui leh mekin Mizoram District hrang hranga Hectare 2575 a zauvah Rubber tiak 11,58,750 phun tum a nih thu a sawi bawk.

Chuhvel-ah hian CM Rubber Missions Phase I hnuaiah In 80 an awm a, kumin July thla khan chhungkaw tinin Rubber kung 450 theuh an dawng a. A phunna lama an mamawh tinrenga hmanah Rs. 40320 an dawng nghal a, kumin November-ah khan 2nd instalment Rs. 20160 chu dawng lehin an zau panna kawng hi May thlaa laih zawh kha a ni a, KM 7.5-a thui niin cheng nuai 18.9 vel sen a ni a, a thawhna sum hi huan neituten an pawisa dawn atanga an thawhkhawm niin he kawng hian Rubber huan 80 hi a tlawh kual vek a ni.