Chief Minister in Lo neih chungchang ah technology changkang zawk hman a tul thu a sawi

Chief Minister Lalduhoma chuan kumtin ramngaw vata Loneih (Jhum) chu Mizo hnam nunah thuk takin bet tlat mah se, leilung chereu zel leh sik leh sa inthlak danglam (climate change) avangin leh kan hmakhua a ngelngheh zawk nan technology changkang zawk hman a tul tawh thu a sawi.

Ni hnih chhung awh tur ICAR Research Complex for NEH Region, Mizoram Centre, Kolasib-in Tribal Sub Plan (TSP) hnuaia 'Krishi Mela cum State Farmers Workshop' hawnna nimin-a an buatsaih a hmanpuina ah Chief Minister Lalduhoma chuan Mizoram-ah hun rei tak chhung Loneih dan phung pangngai (jhum cultivation) kan lo hman tawh piahlamah a tlo zawk leh Science thiamna hmanga Loneih dan thar (Sustainable, Science-based farming) kalpui a tul thu sawiin, kumtin ramngaw vat-a Loneih chu Mizo hnam nunah thuk takin bet tlat mah se, leilung chereu zel leh sik leh sa inthlak danglam (climate change) avangin leh kan hmakhua a ngelngheh zawk nan technology changkang zawk hman a tul tawh tih a sawi a. Sawrkar flagship programme 'Banakaih- Handholding Scheme’ chungchang sawiin, hei hian eizawnna bul tan thar tumte hnenah loan hmangin tanpuina a pe a, Loneih leh sumdawnna bul lo tan tawhte tan ‘CM Special Package’ te siam sak an nih thu a sawi a. Aieng, Hmarhcha, Sawhthing, Hmunphiah leh buh tharchhuahte hralhna man tha tak (price support) sawrkarin a ngaihtuah sak thu a tarlang bawk.

Chief Minister chuan ICAR Mizoram Centre nena thawhhona tha tak an nei chu lawmawm a tih thu sawiin, “Anni hian kan ram leilung mil technology leh thlai chi tha zawk, Siata Mimpui (buh) leh Mizo Popcorn-1 te an chhawpchhuak a ni,” a ti a. He thawhhona kaltlang hian ran chi (indigenous livestock) te leh kan State Sangha, Nghavang humhalh kawngah te leh kawng hrang hrangah hmalak ho a nih thu a sawi bawk.

He hunah hian khual zahawm, Assembly Deputy Speaker Lalfamkima bakah ICAR lama an hotu pawimawh te pawhin thu an sawi a, Kolasib, Mamit leh Hailakandi District atangin loneitu 300 chuang telin loneitu hlawhtlingte hnenah Lei lehna khawl (Power tillers), Ke a rah Aieng zai sawmna (Pedal-operated turmeric slicer), Hmarcha leh thil ro rawt sawmna (Spice Pulverizer), Pa (Mushroom) chi khawrna leh sawngbawlna (Straw spawn filling and compaction unit) te, ar note leh vawk note te sem a ni a. Chief Minister hian mobile app 'Gau Bandhu' chu a tlangzarh bawk a ni.