MRB in ‘10000 Crore Total Business’ an lawm

Mizoram Rural Bank (MRB) chuan ‘10000 Crore Total Business’ an tlin lawmna hun Zirtawpni khan an buatsaih a, he hunah hian CSR kaltlanga luanchhuahna hun an hmang nghal bawk.

MRB Head Office Auditorium-a he hun hman hi Chief Secretary Khilli Ram Meena chuan hmanpuiin MRB-te’n vaibelchhe singkhat zet mai business an nei thei chu a lawmpui thu leh mellung pakhat mai ni lovin an inpekna, teirei peihna leh thawhhona tha lanchhuahna a nih thu a sawi a. Tuna Bank dinhmun a that thu te, Net NPA 0% a ni thei leh CRAR 16.80% a ni thei te chu lawmawm a tih thu sawiin, nasa zawka thawk zel tur leh Mizoram Rural Bank chu mipuite dinhmun tha zawka hlangkaitu ni zel se a duh thu a sawi bawk.

He hunah hian MRB Chairman Sheryl L. Vanchhong, chuan an Bank dinhmun tlangpui tarlangin, kum 1983-a din MRB chuan tun dinhmunah District 11-ah Branch 106 a neih tawh thu leh Financial Inclusion-ah te, Sawrkar laipui leh State Sawrkarin ruahmanna a siam hrang hrangte tihlawhtlingtu leh Bank dangte nena khaikhin pawha a titha ber pawl an nih thu a tarlang a. Mipuite rinngam Bank-ah hian anmahni duhsaktute avanga vaibelchhe singkhat business an tlin thei chu lawmawm a tih thu a sawi bawk a. Ani bakah hian Board of Directors aiawhin Tapan Kumar Mandal, Deputy Secretary, DFS, Ministry of Finance leh Regulator atangin T. Lhungdim, GM & OIC, RBI, Aizawl Office te chuan thu an sawi bawk a. India rama Regional Rural Bank 28-te tana Logo angkhat an siam chu tlangzarh nghal niin he Logo hi Mizoram Rural Bank pawhin an hmang tan nghal dawn bawk a ni.

MRB hian vaibelchhe singkhat business nei tur hian Branch hrang hrangte’n theihtawp an chhuah a, tehna hrang hrang hmanga Branch titha 19-te hnenah chawimawina an hlan bakah Vaibelchhe singkhat business nei tura thawh hlawk bik mi 2-te hnenah chawimawina an hlan bawk a. Hei bakah hian MRB in mellung pawimawh tak tak a lo thlen tawh zingah cheng vaibelchhe singkhat business an tlin lawmna pual hian thahnem ngai taka Bank kalsiam ngaihtuahtu Board of Directors-te zahna leh chawimawina thilpek an hlan an hlan bawk a ni.

Vaibelchhe singkhat business an neih an lawmna hunah hian MRB hian CSR kaltlanga luanchhuahna hun an hmang nghal bawk a, Chhing-chhip PHC tan Ambulance Van hlanin MYC Computer Laboratory-a dah turin Chair, Table leh Computer, a vaiin Set 20 an hlan a. Helen Lowry School, Seventh Day Tlang-a Hostel khum 85 siamna tur hlanin TB Cell, NHM-ah TB Patient 106 (Branch tinin patient pakhat tan zel) tan Food basket (Basket pakhat ah Rs. 700/- hu) thla 6 chhung atan an hlan nghal bawk a ni.