Mizoram State Library tlawhtu an pung

Mizoram State Library-ah member 9970 an awm mek a, kum hmasa lam aiin State Library tlawhtu an pung nia tarlan a ni bawk.

Thudawn danin Mizoram State Library-ah tun November thla tawp thleng khan member, puitling 8541 leh naupang 1429, an vaiin member 9970 an awm mek a, kumin chhungin tlawhtu 8002 awm tawhin State Library atanga Lehkhabu hawh turin member nih a ngai a, a hmuna chhiar tur erawh chuan member nih kher a ngai lo thung a ni. Mizoram State Library-ah lehkhabu sing sarih chuang a awm mek a. State Library-a thawktute chuan, tun aiin mipuite'n Library chhawr tangkai lehzual thei se an duh thu an sawi a ni. Lehkhabu hawh kher loa a hmuna chhiar thin ni tin an awm ve deuh reng a, chu'ng mite chu zirlai leh Research Scholar-te an ni tlangpui tih sawiin Lehkhabute chu duh ang zawng zawng chhiar theih a ni a. Lehkhabu bakah chanchinbu an la nual a, newspaper-ah English panga leh Mizo paruk, a vaiin 11 an la a, magazine-ah English panga leh Mizo pakhat an la bawk a ni.

State Library thawktute chuan an Library chu mi eng emaw zatin an chhawr tangkai mek rualin, tun aiin chhawr tangkaitu tam lehzual se an duh thu a sawi a. “Kumdang aiin kumin ah Library tlawhtu an pung a, hei hian thalai ten lehkha an chhiar nasa tih a lantir bakah lehkha an zir nasa tawh tih a lantir,” an ti a, “Hna dil tur a tam avangin hna zawng an pung a, kan Library-a Reading Room-ah te tiffin paiin nileng lengin lehkha an rawn chhiar, Reading Room-a thutna indaih loh chang a awm fo a, Vanrada-ah te an thut chang a awm fo,” an ti a ni.

Mizoram State Library tarlan danin, tun dinhmunah sawrkar enkawl Libary 5 a awm a, heng bakah hian sawrkar-a in register NGO te enkawl Mizoram-ah Library 512 a awm bawk.