ZPM kaihhruai Mizoram sawrkar kum 2-na ah sawrkar hmalakna hrang hrang puanchhuah a ni

ZPM kaihhruai Mizoram sawrkar chuan nimin, December 8, 2025 khan kum hnih tlingin hemi denchhen hian I&PR Minister B. Lalchhanzova leh ZPM Media-a General Secretary KJ. Lalbiakngheta te chuan thuthar thehdarhtute kawmin an hmalakna hrang hrang an tarlang.

Nimin-a Aizawl Press Club-a thuthar thehdarhtute an kawmna ah hian I&PR Minister leh ZPM Media-a General Secretary te chuan kum 2023 December 8-a Mizoram sawrkar thar lakluh a nih hnu khan theihtawpin kan ram leh hnam tan hna an thawk tih an sawi a, “A zavaia tarlan sen a ni lo chungin Vawiin hian sawrkar hmalakna tlangpui han tarlan kan duh a, hmabak thahnem tak a la awm tih min hriatpui tur leh sawrkar tih theih chinah kan ram tan a tha ber pawchhuak turin hmalam kan pan zel tih min lo hriatpui turin kan ngen a che u,” an ti a ni.

Sawrkar hmalakna an tarlan zingah Flagship program, Hand Holding Thlai Thar lei hnuaiah MAMB kaltlangin Sawhthing quintal 338,35.82 lei niin hemi atana sawrkar sum sen zat chu cheng vbc. 137.72 a ni tih an sawi a, Private Entrepreneur te nen Sawhthing sawngbawlna (Unit lian leh Unit te) buaipui chhoh zel a nih thu te, Hmunphiah pawh Empanelled Buyer, Non-Empanelled Buyer leh ZOHANDCO kaltlanga lei zat chu quintal 48602.29 a nih thu te, Buhhum quintal 1473 leiin cheng nuai 44.184 sen a nih thu sawiin, Hand holding loan atan Phase-I ah mi 702 dilna approve niin CM Special Package atan Phase-I ah mi 2258 thlan a nih thu an sawi bawk.

He hunah hian Department hrang hrang hmalakna tarlangin, Aizawl khawpui laili a A.R. te Zokhawsang-ah insawnin an hmun engemawzat chu Mizoram sawrkar kutah hlan a nih thu an sawi a, MINECO-ah sawrkar Office hrang hrang te leh AIS Officer-te quarters tur te, District pali- ah sawrkar hnathawkte chenna tur (GPRA) te, District pathum-ah Circuit House te, Town pali-ah SDO (C) quarters tur te sak mek a nih thu te an sawi a. The Mizoram Lokayukta (Amendment) Bill, 2024 chu 9th Mizoram State Legislative Assembly 2nd Session-ah pass niin Lokayukta-ah post hnhawhkhah loh hnawhkhah a ni a, Wing pathum- Establishment, Inquiry leh Prosecution te hnathawk theiin an awm ta tih an sawi bawk.

Venhimna hnathawh kawngah Ruihhlo cheng vbc. 318.29 hu (local rate) leh Ralthuam 54 leh a mu 28005 man tawh niin thubuai 563 ziahluh a ni tih an sawi a, Dan lova foreign kuhva tawlh cheng vbc. 35.03 hu (local Rate) manin, Central Jail leh District dang pasarih-a Jail te sak that mek a nih thu an sawi bawk.

Online platform-a sawrkar hmalakna sel duh leh rawt duh tan ‘MIPUI AW’ chu February, 2024 khan tlangzarhin, Mipui Aw 324 dawn tawh niin harsatna leh rawtna 300 chinfel tawh a nih thu an sawi a, Khawpuia mi harsa zawkte tan Insak tanpuina (PMAY-U) mi 36789 hnenah pekchhuah tawh niin mi tun Financial Year chhunga mi 2000 pechhuak leh tura hmalak mek a ni tih an sawi a. Thenzawl-a Peace City dinna tur MoHUA atangin cheng vbc. 10 hmuh a ni tih an sawi bawk.

Heng bakah hian an thusawi zingah Mizoram Universal Health Care Scheme (MUHCS) kalpui a nih (April 2025) atanga November 28, 2025 thlengin damlo mi 54261 te inenkawl nan cheng nuai 8405 pekchhuah tawh a nih thu te; September 2024 atanga July 2025 thlengin ruang 962 phurh nan cheng nuai 95.72 sen a nih tawh thu te, Ruihhlo ngaite chhanchhuahna, Hulhliap Short Stay Centre atangin Batch 6 chhuakin mi 1200 vel enkawl an nih tawh thu te; Chhingchhip a theitui sawrnaa tuaithar niin theitui siamchhuah leh a nih thu leh Buhfai sem bang tihral thin tihtawp niin hemi avang hian kum khatah buhfai quintal 50000 , cheng vbc. 20 hu vel hum theih a nih thu bakah Journalist Pension pawh pekchhuah tawh a nih thu te an sawi a ni.