Mizoram sawrkar chuan Kuhva huan tihzauh zel a thlawp thu Chief Minister in a sawi

Chief Minister Lalduhoma chuan an sawrkar tirh phat atanga an hmalakna langsar zinga mi chu ruihhlo leh Kuhva tawlhruk titawp tura hmalak a ni tih sawiin, Mizoram sawrkar chuan Kuhva huan tihzauh zel a thlawp thu a sawi bawk.

Rengdil khuaa Kuhva chingtute leh Land Resources, Soil & Water Conservation Department tangkawpin nimin-a Rengdil Sports Centre-a ‘Kuhva Kut’ an buatsaih a hmanpuina ah Chief Minister Lalduhoma chuan, “Kan sawrkar tirh phat atanga kan hmalakna langsar zinga mi chu ruihhlo leh Kuhva tawlhruk titawp tura hmalak a ni a, na takin kan nawr,” tiin kumin ah Mizoram chanchina Kuhva rate that ber kum a lo thlen thu leh Rengdil khua ringawt pawhin cheng nuai sang chuang zet an lei thu a sawi a, “Kuhva tawlhruk do hna thawktu kan Police te, kan tlawmngai pawlte, kan Magistrate leh an thawhpuite pawhin an thawhrim rah, he chanchin lawmawm tak hi an han hria anga, an hlim ve ngawt ang,” a ti.

Soil Department chhinchhiah danin tunah hian Mizoram-ah Hectares singthum (30000) vela zauah Kuhva hi kan ching mek tih Chief Minister chuan sawiin, nikum khan quintals nuai hnih vel kan thar thu a sawi a, “A hralhna a awm that phawt chuan Kuhva hian kan ram economy-ah a thawhhlawk tham tawh a ni. Central sawrkar lam ngaihdan ah ‘Kuhva huan hi zauh zel tawh loh nise’ tih a ni nain, kan kuthnathawktute tan a tha si a, Mizoram sawrkar chuan Kuhva huan tihzauh zel hi kan thlawp. Kan flagship Scheme Handholding – Loan Component leh CM Special Packages atang hian Kuhva huan hi a siam theih ve ve a ni,” a ti.

Kuhva chu a hralhna lama harsatna la thleng palh thei reng a nih avangin a process-na neih ve tha an tih thu leh Buhchangphai-ah a process-na peih a nih tawh thu leh an hawn thuai tur thu sawiin, “NEC sum cheng Vbc 7.43 hmangin Kuhva Processing Plant Zamuang-ah leh Chemphai-ah kan din mek,” a ti a, tunah hian Soil Department hnuaia thlai Kuhva, Rubber leh Hmunphiah huan panna kawng (link road) siamna tur hi NABARD leh SASCI sum vbc. 27.66 hmuh a nih thu leh Link Road km 170 a thui hmun hran hranah laih tura ruahman a nih thu te a sawi bawk.

Rengdil khuaa Kuhva Kut hi Land Resources, Soil & Water Conservation Department Director Er. Vanlalmuanpuia Chhangte chuan kaihruaiin Kutpa, Minister Lalthansanga pawhin thu a sawi a, Report atanga a lan danin kumin a Hachhek bial khaw 21-a Kuhva chingtute sum lakluh belhkhawm hian nuai 5087 a chuang tawh a. An la hralh kal mek a, a Fur rahte pawh hralh tur an la nei leh dawn a. An lakluh hi a pung chho zel dawn a ni. Hachhek bial chhunga kumina Kuhva hralh tam ber chuan cheng nuaih sawmli a lalut tawh a ni.