Mizoram-a Gas Pipeline phum mek CM in a sawipui

Tripura atanga Mizoram-a Gas Pipeline phum hna thawk mektu, Indradhanush Gas Grid Limited (IGGL) Chief Executive Officer Subrata Das leh a thawhpuite chu nimin khan Chief Minister Lalduhoma chuan a Pisa-ah kawmin an hnathawh chinte a sawipui bakah an harsatna tawh mekte a ngaihthlaksak a. IGGL-a thawktute chuan he Pipeline hi Tripura State Panisagar Receiving Terminal atanga rawn kal tanin Kanhmun-ah, Zawlnuam-ah, Kawrthah-ah, Tuidam leh Darlak paltlangin Mamit bulah a chhuak dawn tih an sawi a. Chuta tangin Lengte-ah kal zelin Sihhmui-ah Receiving Terminal dah tur a nih thu an sawi a. Sihhmui Receiving Terminal atanga Aizawl khawpui chhung Household Connection hi Tripura Natural Gas Corporation Limited ten an thawk thung dawn tih an sawi a ni.

Panisagar atanga Sihhmui thleng Pipeline hi kilometer 119.5 a thui niin a pipe len zawng hi feet khat bial a ni a. Kum 2027 December thla a thawh zawh hman an tum a ni a. Tun thlengin Welding hna hi zaa 45 an thawk tawh a, a phum hna (lowering) hi zaa 33 an thawk tawh a ni. He Project hi North East Natural Gas Pipeline Grid hnuaia hmalakna niin, Panisagar leh Sihhmui inkar hi Phase-II hnuaia hmalakna pakhat a ni a. Phase-II hmalakna pumpui hian Guwahati – Agartala – Aizawl pipeline a huam a, a vaiin kilometer 723 a thui a ni.