Aizawl-a Lok Bhavan-ah Assam leh Nagaland State-te dinchamphaphak lawmna neih a ni

Mizoram Larsap, General (Dr) Vijay Kumar Singh chuan Aizawl Lok Bhavan-a nimin khan Assam leh Nagaland State-te dinchamphaphak 'Foundation Day' lawmna hun a buatsaih.

Ek Bharat Shreshtha Bharat hmalakna hnuaia he hun hman ah hian Larsap General (Dr) Vijay Kumar Singh chuan Assam leh Nagaland-te chu an Foundation Day puala duhsakna hlanin, State pahnihte chu Mizoram ang bawka hnam ziarang leh danglamna ngah tak an nih thu a sawi a. Assam chu India hmarchhak tana luhka pawimawh tak, History mai bakah Geography ang pawha hmun pawimawh tak chang a nih thu a sawi a. Nagaland chu hnam peng hrang hrang awmna leh kutthemthiamna avanga hriat hlawh a nih thu sawiin, Hornbill Festival chu khualzin hiptu lian tak a nih thu a sawi a, Mizoram pawhin an kalphungte bihchianga a kalpui ve theih ngei a beisei thu a sawi bawk.

Larsap chuan Sawrkar laipui hmalakna, Ek Bharat Shreshtha Bharat programme chu India ram hnam ziarang leh nunphung hausa tak pholanna leh inhriatpawh tawnna tura buatsaih thin a nih thu a sawi a. India ram intodelh 'Vikshit Bharat' ni turin mawhphurhna, abik takin ram inghahna thalaite'n an neih nasat thu sawiin, Vikshit Bharat ni turin midangte hnam ziarang leh nunphung zir peihna, tanruala, inunauna tha leh inhriatpawhtawnna neih a tul thu a sawi a. Internet lamah thu dik tawk lo leh chi inthliarna lam hawi thu thehdarh a tam tih sawiin, “Kan zavaia him nan leh inpumkhat nan Ek Bharat Shreshtha Bharat programme hi duan a ni,” a ti a. Thalaite chu an kalna apiangah an hnam ziarang leh nunphungte midang hriat leh hmuh theiha pholang tam turin a chah nghal bawk.

Nimin-a he hun hman hi APS to Governor Lalhruaitluangi chuan kaihruaiin he programme an hman chhan te a sawi a, heng State pahnih te chanchin tawi ngaihthlak a nih bakah Assam leh Nagaland-te chanchin pholanna video thlirho a ni a, Assamese, Naga leh Mizo zirlaite'n hnam lam leh zaite an entir bawk a. Hemi hnu hian Larsap General (Dr) Vijay Kumar Singh leh First Lady Bharti Singh-i te'n hemi puala kalkhawmte hi Upper Lawn, Lok Bhavan-ah kawmin hun hlimawm tak an hmang ho a ni. State hrang hrang Foundation Day lawmna hi June 2023 atang khan Aizawl-a Lok Bhavan-ah hian buatsaih thin a ni.