MNF Party in Serchhip leh hmundang ah Exodus Day vawi 54-na an hmang

MNF Party chuan nimin khan ‘Exodus Day’ vawi 54-na hmangin he ni hi hmun hrang hrangah urhsun taka hman a ni.

MNF thuchhuah in a tarlan danin Zoramin zalenna a sual laiin East Pakistan-ah Hnam Sipaite leh nunau tam tak hmelmain an hualbet a, mak tak maiin an tawngtaina Pathian in chhangin, hualbehna atang chuan Lawng hmangin Pathian in hnam sipaite chu Arakan lama a hruai lut a, thih pukna ata chhanchhuahin an awm a, Mizo Hnam Movement a kal zawm theih phah a ni. Hemi hriatreng nan hian MNF chuan kumtin Exodus Day hi December ni 16-ah an hmang thin a ni. Serchhip-ah pawh nimin khan Mizo Hnam Run-ah he ni pual hian hun an hmang a, he hun hi MNF Serchhip East Block President C. Lalrinfela chuan kaihruaiin MNF Hqrs. atangin J. Malsawmzuala Vanchhawng chuan a rawn hmanpui a ni.

Aizawl-ah pawh Mizo Hnam Run-ah Exodus Day hi hmangin MNF Sr. Vice President Dr. R. Lalthangliana chuan MNF chuan din a nih tirh atangin harsatna hrang hrang a tawk tam hle tih sawiin, “Mizo hnamin zalenna famkim a neih theihna tura a beihna kawngah te, sawrkar-na fung a chelhna kawngah te pawh harsatna a tawk nasa hle a ni. Mahse, Pathian leh kan ram tan, ti tlattu kan nih angin Pathian in min hruai zel a, hma kan sawn zel a ni,” a ti a. “Lalpa kan ring ngam takzet a nih chuan Pathian in MNF-te hi rorelna min pe leh dawn a. Lalpa mit MNF chungah a fu reng dawn a, a malsawmna dawng tlak kan nun a pawimawh a ni,” tin “He hun a lo thlen hian zalenna sualtute kan hrereng a, Pathian leh Mizo hnam tana an nunna hlu tak hlantu Martar-te zahna chibai ka buk bawk a ni,” a ti.

Lunglei-ah pawh Mizo Hnam Run-ah he ni hi hmangin MNF President Zoramthanga chuan a hmanpui a, “Khawchhak atangin kan Pi leh Pu-te lo chhukin, an ram zawn Mizoram Lalpa'n a pek lo thlengin an tawp tawp a, kum 20 chhung hnam Thuthlung humhim turin Independent sualin, Nationalism-ah thisen in min Baptist a ni. Party dang lian tak tak an ral zel hunah pawh bul tan leh thei turin Pathian in Exodus Day hmangin min hum a, min damkhawchhuahtir chhan chu, 'Pathian leh kan ram tan' tia kum 64 hmu ta MNF party te hi Chanchin tha hril tura a hnam thlan kan ni,” a ti bawk.