ZPM leh MNF ten LADC-ah sawrkar an siam theih thu Larsap hnenah thlen an tum

Lai Autonomous District Council (LADC) Inthlanpui neih zawh takah Party mal-a sawrkar siam thei an awm loh hnuah ZPM leh MNF Party te chuan sawrkar an siam theih thu nimin khan Larsap hnenah thlen an tum.

MDC Seat 25 awmna LADC Inthlanpui vawi 12-a neih zawh takah khan MNF Party chuan MDC Bial 8-ah hnehna changin INC in MDC Bial 7 leh ZPM in MDC Bial 6-ah hnehna an chang a, anni bakah hian BJP leh Independent ten MDC Bial 2 ve ve-ah hnehna chang bawkin Party mal-a sawrkar siam thei an awm loh hnuah Zoram Peoples Movement (ZPM) leh Mizo National Front (MNF)-te chuan sawrkarna intawm siam turin Lairam Legislature Party (LPP) an din a. Party pahnihte thawhdunna tur thuthlung-a a lan danin, Lairam Legislature Party-ah hian ZPM Legislature Party Leader T. Zakunga chu Leader a ni ang, ani hi Chief Executive Member (CEM) nihna chelh nghal tura tih a ni a, Deputy CEM, Chairman leh Executive Member post pathum chu MNF Legislature party lam chan tura tih a ni a, ZPM Legislature Party chuan CEM bakah Executive Member post panga chang tura ruahmanna siam a ni bawk a. LADC sawrkar thar tur Lairam Legislature Party-ah hian CEM, Deputy CEM, Chairman leh Executive Member post nilo MDC te tana post dang chelh theih chu CEM leh MNF Legislature Party te inbiakrawnna atanga hnawhkhah tura ruahman a ni bawk.

Lairam Legislature Party leh ZPM Legislature Party-a Leader T. Zakunga chuan LADC Inthlan zawh hnuah sawrkar din tumin Congress party nen ZPM PAC hmalaknain an inbe zui tih nimin khan Aizawl-a ZPM Chhung Inkhawm ah a sawi a, “Uluk taka kan hotuten an ngaihtuah hnuah MNF Legislature party nen sawrkar ngelnghet zawk din theih a nih beiseiin inremna kan siam ta,” a ti a. “LADC-ah sawrkar ngelnghet a awm theih loh avangin hmasawnna kawngah pawh kan thuanawp phah hle niin kan hria a; chuvangin, lungrual takin kan hotute kaihhruaina hnuaiah sawrkar thar din turin Governor hnenah Vawiin (nimin) tlai hian sawrkarna kan siam theih thu kan thlen nghal dawn a ni,“ a ti bawk.

Hetihlai hian MPCC Vice President leh LADC-a Congress Legislature Party Leader C. Ngunlianchunga chuan nimin khan Aizawl-a Congress Bhavan-ah thu sawiin, “Helai a kan rawn kal hian sawrkar mai turin kan rawn kal a, mahse van hmuna thlarau sual ho te avangin kan sawrkar dawn nge dawn lo kan hre ta lo,” a ti a. Sawrkar siam turin ZPM te nen agreement an siam thu leh sawrkar siam dan tur te pawh an ziah thu sawiin, “MNF nen kan inbiak laiin ZPM ten min rawn dawr a, kan hotute nen kan sawiho hnu in ZPM te nen chuan agreement kan siam thei ta a ni. Tunah hian kan agreement kha a tawp tih pawh kan la hre lova, enge lo thleng zel dawn kan hre lo a ni,” a ti bawk.