Sum hnâr tha zawk hmuchhuak thei tura ngaihtuahna seng turin MFAS Officer te chah

Home Minister K. Sapdanga chuan leibaa innghah nasat lutukna atanga kan talchhuah theih dan tur te ngaihtuah a, sum hnâr tha zawk hmuchhuak thei tura ngaihtuahna seng turin MFAS Officer rual te a chah.

Nimin khan Mizoram Finance & Accounts Services Association chuan Aijal Club-ah Annual General Conference vawi 30-na hmangin he hun khuallian nia hmanpuitu Home Minister K. Sapdanga chuan MFAS-te chu Mizoram sum leh pai enkawltu an nih avangin mawhphurhna pawimawh tak chelhtu an nih thu a sawi a. Fimkhur tak leh uluk thei ang bera hna thawk tura chahin, Mizoram chu mahni thawhchhuah nei chaurau tak (resource deficient state) kan nih thu a sawi a, tun dinhmuna kan sum hmuhna tam ber pawh Debt financing/Loan lam a nih thu te, Project lian tak takte pawh JICA, World Bank leh a dangte atanga nakina la rulh leh tur, ‘Externally Aided Projects’ an nih thute sawiin, leibaa innghah nasat lutukna atanga kan talchhuah theih dan tur te ngaihtuah a, sum hnâr tha zawk hmuchhuak thei tura ngaihtuahnate seng turte in MFAS Officer rualte chu a chah a ni.

Tunlai khawvelah chak zawk leh rang zawka hna thawh theih a pawimawh thu pawh Home Minister chuan sawiin, hmasawnna hna, Central Scheme leh Funding tam takte pawh hun bituk nei leh chumi chhunga Utilization Certificate thehluh ngaite an nih thin avangin, Sanction leh Approval te pawh chak zawka kalpui dan kawngte ngaihtuah a tul thu a sawi a. Pension leh GP Fund chungchangte pawh tunlai Digital Technology hmanga awlsam zawka kalpui theih dan zawng zel tur te leh a pawimawh berah chuan mipui rawngbawltu an nih inhre renga, dawr nuam tak leh mite tanpui duhna rilru pua tan la thar zel turin MFAS Officer rualte chu a chah a ni.

Mizoram Finance & Accounts Services Association ten Annual General Conference an hman hi an President Vanlalsawma chuan kaihruaiin Home Minister hian ‘MFAS Directory 2025’ a tlangzarh nghal bawk a; MFASA Adviser Ramchuana pawhin thu sawiin MFASA Secretary C. Lungmuanpuia hnen atangin report ngaihthlak a ni a; tunhnaia MFAS tling tharte chu Association member atan lawmluh nghal an ni a, MFASA Treasurer Malsawmdawngliani’n lawmthu a sawi bawk a ni.

Chawhnu Session-ah President Pu Vanlalsawma kaihhruaiin rorel inkhawm neih chhunzawm a ni a, an thurel zingah Sawrkarin Mizoram pension (OPS) reforms chak takin kalpui rawh se tih te, Financial Management chungchangah Workshop buatsaih ni rawh se tih te leh Audit Training - C&AG/PAG ah neih ni rawh se tihte a tel a ni.