India sipai boral te hriatrengna ni, ‘Vijay Diwas’ hmang

India leh Pakistan indonaa India sipai boral te hriatrengna ni, ‘Vijay Diwas’ chu nimin khan hmun hrang hrangah hman a ni.

Aizawl-ah chuan zing dar 8:00-ah Vijay Diwas (Hnehna Ni) pual hian Treasury Square-a War Memorial-ah Chief Minister Lalduhoma hovin hun hman a ni a, he hunah hian Chief Minister Lalduhoma chuan hma hruaiin Sipai huaisen martarte zahna lantir nan War Memorial-ah pangpar a dah a, Home Minister K. Sapdanga te, Lt. Col. Clement Lalhmingthanga (Retd.), MLA & President, MESL te, Chief Secretary Khilli Ram Meena, DGP Sharad Agarwal, Home Secretary Vanlalmawia, Padma Shree Hav Lalbiakthanga, President, World War-II Veterans Association leh midangten pangpar hi an dah zui a ni.

Champhai-ah pawh Champhai War Memorial hmunah he ni pual hian hun hman a ni a, Addl. DC James Lalnithanga chuan hmanpuiin District Sainik Welfare & Resettlement Officer Major Johnny Malsawmzuala chuan Vijay Diwas hman chhan te leh District Sainik Board hnathawh leh kalphung te a sawi a, War Memorial-ah sawrkar hotu pawimawh te, khawtlang hruaitu leh sawm bik mi 13 in sipai huaisente hriatreng nan pangpar an dah a ni.

Lunglei-ah pawh ‘Vijay Diwas’ pual hian War Memorial-ah nimin khan hun hman a ni bawk a, Lunglei District Sainik Welfare & Resettlement Officer Maj. Rebecca L. Chhakchhuak (Retd) chuan hawnna thu sawiin, 2 Mizo Bn NCC atangin Vijay Diwas chanchin tlangpui ngaihthlak a ni a. Hnam Hla (National Anthem) sak niin, 2 Mizo Bn NCC Commanding Officer Col. Sagar K. Mohanty leh District Sainik Welfare & Resettlement Officer Maj. Rebecca L. Chhakchhuak (Retd), MESL Lunglei President bakah mi pawimawh dang ten zahna pangpar an dah a ni.

December ni 16, 1971 khan Ramna Race Course tuna Suhrawardy Udyan ni ta, Dhaka khawpui, Bangladesh-ah India Sipai hotu Lt. Gen. Jasgit Singh Aurora kaihhruai Allied Forces (India sipai leh Mukti Bahini) hmaah Pakistan sipai lalber (Chief of the Pakistan Forces) Lt. Gen. Amir Abdullah Khan Niazi leh a sipai 93,000 te chu Indo-Pakistan War of 1971-ah India laka tlawmin an inpe a. He hnehna vang hian East Pakistan, tuna Bangladesh tia thlak tak hian Pakistan atangin zalenna a hmuh phah a ni. He ni hriatrengna atan hian kumtin Vijay Diwas hi India ram hmun tinah leh Bangladesh-ah te December ni 16-ah hman thin a ni.

India-Pakistan War (Bangladesh Liberation War) 1971-ah hian Mizoram atangin sipai huaisen tak tak 320 vel chuan India sipai regiment leh Corp hrang hrang hnuaiah huaisen takin ral an do a. An zingah hian indonaa martar 11 leh hliam tuar 24 vel an awm nia chhinchhiah a ni.