Chief Minister hovin ‘Transformed Mizoram Vision 2047 Roadmap Workshop’ neih a ni

Nimin khan Aizawl-a Mizoram Assembly House Conference Hall-ah ‘Transformed Mizoram Vision 2047 Roadmap Workshop’ neih a ni a, he hunah hian Chief Minister Lalduhoma leh sawrkar mi pawimawh dangte an tel a ni.

Planning & Programme Implementation Department hnuaia State Institute for Transformation (SIT), Mizoram-in NITI Aayog’s State Support Mission hmalakna peng pakhat atan he Workshop a buatsaih ah hian Chief Minister Lalduhoma chuan Mizoram hmalam hun (future) chungchang sawiho tur an nih thu sawiin, “Future kan sawi dawn chuan hmathlir ( Vision) atanga kan tan a ngai. Kan vision chuan a hawilam (direction) min kawhhmu anga, tih tur leh tih loh tur te bakah kan resources neichhun te thiam taka hman dan tur min kawh hmu ang,” a ti a, Khawvel ah eng ram mah developed sa a piang a awm loh thu sawiin, “Development hi tihpalh thilthua lo awm pawh a ni lo, kum tam tak sawkar leh ram mipui ten hmathlir Vision neia an lo thawhchhuah rah a ni zawk thin,” a ti a, Mizoram ang, State lian lo, tlangram chhengchhia a awm, mawi si, a mi chengte lehkha thiam, taima leh talent nei tha bawk si tan phei chuan Vision tha neih hi a pawimawh lehzual tih a sawi bawk.

Chief Minister chuan Transformation chu programme thar siam ringawt a ni lo tih sawiin, “A tha lo a kalsan ngam tura huaisenna neih te hi a ni. Mizoram tih hmasawn nana Workshop pawimawh tak mithiam rual kalkhawmin in duan mek lai hian kan Mizo Identity innghahna tlawmngaihna te, kan rinna te, kan hnam nunphung leh ziarang te hi kan hmasawnna chuan mausam lo se, kan hmasawnna chuan khawvel hmasawn te rualin ke min pen tir se, kan identity ti nghet zual sauh zawk rawh se,” tiin “Vawiin a kan Vision 2047 Workshop hi Paper-ah chauh tawp lo se, kumtin a kan zawm theih tur Roadmap, Priorities leh Timelines felfai tak duanchhuah nan nise,” a ti bawk.

Nimin-a Transformed Mizoram Vision 2047 Roadmap Workshop-ah hian Chief Secretary Khilli Ram Meena IAS chuan inlawmna thu sawiin, P&PID-a Commissioner Vanlaldina Fanai chuan ‘Mizoram Vision 2047’ tih hmanginPresentation a neih bakah ‘Mizoram Vision @047’ tih video thlirho nghal a ni bawk. Hemi hnu hian Department hrang hrang ten an Department ‘Vision’ entirin District Bawrhsap theuh ten ‘Sharing of Best Practices’ tih hmangin Presentation an nei leh a, Head of Department pakhatin ‘Interactive Session & Summarization’ tih hun hmang ve lehin Technical Session hmanzawh-ah Chief Minister chuan hmawrbawkna thu a sawi leh a ni.