YMA Office kharna neiin Krismas thilpek sem a ni

Sub-Hqrs. YMA Serchhip chuan nimin khan kumin atana an Office kharna hun hmangin Serchhip District chhunga damdawi In leh Home hrang hrang 17-ah Krismas thilpek an sem bawk.
Kumin atana Sub-Hqrs. YMA Serchhip Office kharna hun an Office-a hman hi Sub-Hqrs. YMA Vice President PC. Vanlalluna chuan kaihruaiin Asst. Secretary Dr. Laldinpuia chuan hunserh a hmang a, Sub-Hqrs. YMA President Kawlthuama chuan kumin ah harsatna lian lutuk tawk lova hun an hmang chho thei chu lawmawm a tih thu sawiin, hruaitute leh Executive bakah Branch hrang hranga hruaitu leh YMA Member ten thawh-hona tha tak an nei chu lawmawm a tih thu a sawi a. Thawhhona tha an neih avangin an hmalakna hrang hrangah pawh hlawhtlinna tam tak an hmuh thu sawiin, kumthar lo la awm zel turah pawh thawhhona tha tak an neih zel a beisei thu a sawi a. YMA hruaitute chuan ‘hotu’ an ni lo tih an hriat a pawimawh thu pawh sawiin, Member te huikhawma ngaihtuahna zau tak an neih a tul thu a sawi a, Pathian venna leh kaihhruaina dil chung zela Sub-Hqrs. YMA tana theihtawp chhuah zel turin Member te a chah nghal bawk.

Serchhip Bazar-a Sub-Hqrs. YMA Office hi kumthar (2026) atan January 7, 2026-ah hawn leh tur a ni ang.

Sub-Hqrs. YMA Serchhip hian nimin vek khan Krismas lo thleng tur atan hmun hrang hrang ah thilpek an semchhuak bawk a, kumin hian Serchhip District-a damdawi In (District Hospital, CHC leh PHC) hrang hrang bakah District Jail, Fahrah enkawlna hmun, ruihhlo ngaite enkawlna leh Shalom Special School-ah te Krismas thilpek hi semin a vaiin Rs. 34,000/- an semchhuak a ni.