Krismas hmain Tar pension pekchhuah tum a ni

Social Welfare, Women & Child Development Department Minister Lalrinpuii chuan Krismas hmain Tar Pension-ah State Contribution bik chu sem fel tura hma an lak thu a sawi.

Nimin-a a Pisa-a thuthar thehdarhtute a kawmna ah Minister Lal-rinpuii chuan Tar pension kan tih mai – Old Age Pension hrang hrangte chu Ministry of Rural Development hnuai atanga pek a nih thin thu leh Pension la turte chu software-ah an detail thun a ngaih thu a sawi a. “Aadhar Card emaw, document dang neih loh vang emaw in mi tam tak chu software-ah thun theih an ni lo a. Hetiang anih avang hian Software a details kan update zat milin January – March, 2025 chhunga pension pek tur pawisa chu an rawn titlem thut mai a. Dawng thin dawng theilo tur an awm nual si a, chuvangin Central lamah nasa takin kan nawr a, min rawn pekbelh leh thei dawn niin kan hria a, kan lawm hle a ni,” a ti.

Hetihlai hian Old Age Pension khawihtu Central Ministry chu SNA Sparsh-ah an la onboard ve lo chungin, Mizoram lama an naute an lo onboard vek hman tih Minister chuan sawiin, “Hei hian sanction an rawn siam tur a kal tir thei ta tlat lo a ni. Tunah hian theihtawp in he harsatna hi chinfel tum mek zel a ni a, chinfel chhung a rei dawn avangin State Contribution bik hi chu Krismas hma ngeia semfel turin hma kan la mek a ni,” a ti.

Hei bakah hian Minister chuan September 1, 2024 atanga sawrkar in ruang phurh a kalpui ah ruang 1680 phurh nan Rs. 1,75,85,602/- an hman tawh thu a sawi bawk.