Mara zirlaite leh zirna In a hmalakna tur lungphum phum

Chief Minister Lalduhoma chuan nimin khan Aizawl Zotlang-a Mara Boys Hostel-ah Mara Girls Hostel sakna tur te, MADC Area-a School thar pariat (8) sakna leh School awmsa paruk (6) chei tharna tur lungphum a phum a, heng zirna In te hi PMJVK atanga sak tur an ni.

Lungphum phumna puala hun hman ah Chief Minister chuan he ni hi Mara te tan ni chhinchhiahtlak, Mizoram tana zirna lama hmasawnna pakhat a tling nia a hriat thu sawiin, “A puitlin hunah chuan Mara zirlai 3200 ten tangkai takin an chhawr zui thei dawn a ni,” a ti a. “Delhi lama Girls Hostel pawh kan sawrkar tirh atangin kan umzui nghal a. Vawiin a kan hmalaknate hian MADC kan ngaihthah loh zia leh hmeichhiate chawikanna kawnga hna kan thawhzia a tilangah kan ngai a ni,” a ti a. Mara thalaite chuan zirna an uarin an ngaihlu thin tih MPSC exam result atangin a lang chhuak thin nia sawiin, chuvang chuan zirna lama duhsak chu an phu-a an hriat thu a sawi bawk.

He huna tarlan a nih danin Girls Hostel hi RCC-in chhawng ruk (6)-a sang-a sak tura ruahman a ni a, khum 120 leh Dormitory bakah Conference Hall nei tur niin cheng vbc. 8.07 senga sak tur a ni a. School building thar pariat hi cheng vbc. 5.76 senga sak tur niin RCC, a chung rangva, Building pakhat-ah Room 12 zel awm tur a ni bawk a. School paruk thuam thar tur hi cheng vbc. 8.59 senga thawh tur niin, Smart Class Room dah tur a ni bawk a, heng hna te hi hunbi tuk chhunga zawh tum a ni.

Nimin zing-a he hun hman hi MADC-a CEM M. Laikaw pawhin Siaha atanga Online hmanga lo zawmin Mara mipuite tan ni chhin-chhiah tlak a nih thu sawiin, Mizoram sawrkar chunga an lawm thu a sawi a. Siaha Bialtu MLA Dr. K. Beichhua pawhin Chief Minister chunga an lawm thu a sawi bawk.