Loneitute hnenah Agricultural Solar Sprayer sem

Mizoram State Rural Livelihood Mission (MzSRLM) leh SELCO Foundation te thawhhona hnuaia hmalakna peng pakhat atan nimin khan Rural Development & Administration Minister Prof. Lalnilawma chuan Solar Sprayer a sem.

Minister Pisa-a Solar Sprayer semna hunah hian Minister Prof. Lalnilawma chuan nizung chakna hman tangkai a pawimawhzia sawiin, ram changkang leh ram hmasawn apiangin Solar Energy pawimawhzia hi an hria a, a hman tangkai dan hrang hrangte pawh tunlaia khawvelin a zir nasat leh ram ropuite pawh an intlansiakna pui berte zinga pakhat a nih thu a sawi a. Mizoram-ah pawh Solar Energy hi hmang tangkai deuh deuh tura hmalak mek zel a nih thu sawiin, Solar Energy lam buaipuitu SELCO Foundation te nen pawh thawh-hona kalpui mek a nih thu a sawi a, Solar Technology hrang hrangte hmang hian thingtlang lama kuthnathawktu te, Self-Help Group te, loneitute leh sumdawng hrang hrangte pawhin hmasawnna hmel an hmuh chhoh zela, an sum dehchhuahte pawh a lo pun deuh deuh theih nan RD&AD Department chuan theihtawp a chhuah zel tur thu a sawi bawk a ni.

MzSRLM leh SELCO Foundation te hian April 2025 khan thawhhona thuthlung (MoU) ziakin he thawhhona hnuaiah hian nimin khan loneitute hnena Solar Sprayer hi sem a ni a. He thawhhona hian a tum ber chu loneitute leh eizawnna hrang hrang kalpuitute tana ni zung chakna (solar energy) hmang khawl chi hrang hrang - Solar Dryers, Solar Sprayers, Deep Freezers, Tailoring Units, Handloom Lighting Systems leh a dangte hmang tangkaia, an dinhmun chawisan leh tanpui te a ni.

Nimin-a he hun hmanna ah hian Minister hian loneitu thlanchhuah mi 11 te hnenah Agricultural Solar Sprayer hi a hlan a ni.