MSCPCR in AMC Area-a High School Ranking siam

Mizoram State Commission for Protection of Child Rights (MSCPCR) chuan Aizawl Municipal Corporation (AMC) huamchhunga MBSE Recognized High School te Ranking puanchhuahna hun nimin khan an buatsaih.

Economics & Statistics Conference Hall-a hemi puala hun hman ah hian MSCPCR Chairperson Laltlanmawia chuan School tha tehna atan Exam result chauh kan hman thin thu leh hei hi School tha tehna atana tehfung tha famkim leh rintlak a nih ber loh thu a sawi a, School Ranking siamna atana zirchianna ah hi chuan Exam result mai ni lovin, Child Rights (naupangte dikna leh chanvo) behchhana kalpui a nih thu a sawi bawk.

He hunah hian Prof. Lynda Zohmingliani, Principal Investigator chuan Research kalpui a nih dan tarlangin, he zirchianna hi lehkhabu chhung thiamna piah lamah naupangte chanvo kil nga (5)-a thlurbing a ni a, chungte chu Right to Education, Right to Equality, Right to Protection Right to Health leh Right to Participation te an nih thu a sawi a, hengte hi India Danpui leh khawvel in United Nations Convention on the Right of the Child (UNCRC) kaltlanga a pawm dan nena inrem a nih thu a sawi bawk.

Nimin-a he hun hman hi I&PR Minister B. Lalchhanzova chuan hmanpuiin Ranking result a puan bakah lawmman a sem a, he zirchianna hi AMC area huamchhunga MBSE recognized High School 120 te zinga neih niin a pumpui ah Nazareth Higher Secondary School chu pakhatna niin Trophy, Rs. 5,000 leh Certificate an dawng a, Govt. Central High School chu pahnihna niin Living Water School chu pathumna an ni bawk. Heng bakah hian Top 10-ah Residential School for Privileged Children, Tej Singh Gorkha High School, Govt. Chaltlang High School, Staines Memorial School, Govt. Durtlang High School, Little Kingdom School leh St. James School te an langphak bawk a ni.