Ni 7 awh tur Winter Festival neih tan a ni

Ni 7 chhung awh tura ruahman ‘Winter Festival’ chu nizan hmasa khan Tourism Minister Lalnghinglova Hmar chuan Aizawl Lammual-ah a hawng.

Winter Festival hawnna hunah hian Tourism Minister chuan Festival chu Mizo mipuite leh thalai te hlim tak leh thianghlim taka an inhmuh-khawmna tur te, khualzin kan hip theihna tur te, keimahni leh keimahni kan intihphur tawn a, kan ei leh in siam leh kan kutchhuak bakah kan thil neih zawrh turte kan hralh theihna hun remchang a nih thu a sawi a. Heng bakah hian kan ram mawina, kan tlang, kan lui, kan ruam leh kan boruak thianghlimte State dang mi te leh khawvel hmundanga miten an hmuh a an chhim ve theihna turte a buahsaih a nih thu a sawi a. Festival chu December ni 15 atanga 20 thleng hman phawt a ni anga, ni 23-ah Christmas Parade neiin ropui taka khar a ni dawn tih a sawi a. Parade hi Aizawl Chanmari Kawn atanga tan tur a ni anga, hemi hunah hian zaithiam te, milar hrang hrang te leh mipui te kalkhawmin Christmas Costume an neih ang ang te inbelin Lammual-ah Christmas Carol a chhunzawm a nih tur thu a sawi bawk.

Tourism Minister chuan, Christmas Parade chu kumin ah keimahni in kan kal phawt dawn tih sawiin, nakum-ah hnamdang in an rawn zawm ve anga, tun atanga kum 5-10 ah chuan India ram State dang mai nilo, khawvel hmun dang atanga an pankhawm theih tura buatsaih an duh thu leh chutiang tur chuan hma an la tan dawn tih a sawi bawk a. December ni 31-a hman tur, Sakawrhmuituai tlang atanga kum khata nitla hnuhungber thlirhona neih turah pawh mipui te a tam thei ang ber tel turin a sawm nghal bawk.

Nizan hmasa atanga neih Winter Festival-ah hian zaithiam hrang hrang zai ngaihthlak tur a awm dawn a, Minister hian kum 2026 atana Mizoram Tourism in Calendar an siam chu a tlangzarh nghal a bawk.