Adviser to CM kaihhruai Study Team in Chief Minister hnenah report an pe

Adviser to Chief Minister TBC. Lalvenchhunga kaihhruai ‘Study Team of DRP, GST Collection, Contractor Profit Deduction & Committed Liability’ te chuan nimin khan Chief Minister Lalduhoma hnenah an rawtna te an sawifiah.

Sawrkar leiba (committed liability), Detail Project Reports fel fai zawk, GST lakkhawm dan chak zawk leh a kaihhnawihte zirchiangtute hian CM Office Conference Hall-ah report hi pein Chief Minister Lalduhoma chuan Study Team te thawhrimna fakin, “An rawtna te chuan kalphung thar tha zawk min pe dawn a, eirukna a veng dawn a, GST lakkhawm lamah min pui dawn a, hmasawnna hnathawh a chak sawt dawn bawk a, hman theiha peih thuai a ngai a ni,” a ti a. Department leiba (Committed Liability) te chu khuarei thilte an lo nih tawh thu sawiin, “Tuna a awm tawhsa hi chu Study Team rawtna angin kan kalpui anga. A awm leh tur hi chu kan veng tur a ni,” a ti bawk.

He hunah hian Study Team Chairman TBC. Lalvenchhunga chuan report pein an rawtna te chu pawm a ni a, leiba rulh ngaite chu a tahtawl (phase wise) a rulh an rawt a. PWD in cheng vbc. 5.83 a la nei a, tun Financial Year kal meka tihfel an rawt a. P&E Department-ah cheng vbc. 12.62 la awmin Financial Year vawi hnih (kum hnih) chhunga rulh an rawt a, PHE Department-ah cheng vbc. 58.07 la awm bawkin sawrkar kum thum (three financial year) chhunga rulh an rawt a ni. Heng hna thawktute hian GST an tifel ngei ngei tur a ni anga. Works Department pathumin leiba an la neihte hi GST hman hnua mi vek an ni. Hetiang leiba tang hi a awm zui tawh loh nana hmalak dan turte pawh an duang a, Emergency Works thawh a lo tul anih pawhin phalna lak zel tawh tur a ni ang.

Heng bakah hian Study team hian hmasawnna hnathawhna leh GST lakkhawmna kawnga rawtna te, Detail Project Report siam dan inang tlang neih dan turte, PWD SOR ennawn te leh rawtna dang engemaw zat a nei a, a taka hman theiha peih thuai a ni ang. He hunah hian Minister F. Rodingliana leh Prof. Lalnilawma bakah Official thenkhat an tel a ni.