Mizoram leh Assam Tourism Minister ten Tourism hmasawnna tura thawho an remti

Mizoram leh Assam State-a Tourism Minister te chu Inrinni khan Guwahati-ah inkawmin Tourism hmasawnna tura thawho an rem ti a, hun remchang hmasaah thawhona thuthlung ziah tumin Assam Tourism Development Corporation (ATDC) pawhin Mizoram chu puih a tulna ah an inhawn reng thu an sawi bawk.

Mizoram sawrkar-a Tourism Minister Lalnghinglova Hmar leh Assam State Tourism Minister Ranjeet Kumar Dass te hi Inrinni khan Guwahati (Assam)-ah inkawmin Tourism hmasawnna tura thawhho chungchang hi an sawidun a, he hunah hian Tourism Minister Lalnghinglova Hmar chuan Mizoram-in tunhnaiah Tourist a neih tam thu leh heng khualzin zinga a tam ber hi Assam State atanga lo zin an nih avangin Assam sawrkar nena Tourism hmasawnna kawnga thawhona neih tul a tih thu a sawi a. Hei hi Assam Tourism Minister Ranjeet Kumar Dass chuan tha a tih thu sawiin, Official-te nen an sawiho nghal a. Assam Tourism Minister chuan Mizoram chu anni (Assam) tan State hrang a ni lo tih sawiin, “Tunhmaa State pakhata chengho vek kan ni. Mizoram tlawh hi Assam mite hian an châk a, Rel a awm tawh bawk nen mi thahnem zawk an lo kal zel kan beisei,” tiin Tourism hmasawnna tura thawho an remti a, hun remchang hmasa ah thawhona thuthlung ziah an tum a ni.

He inkawmna ah hian Mizoram Tourism Minister Lalnghinglova Hmar chuan, “India rama State te leh mipui tlemna kan ni a, chutihlaiin khualzinin an tlawh duh leh ngainat State nih tuma inbuatsaih mek kan ni. He State hian a mamawh chu partner tha a ni a, hla taka mite nena thawhho aiin Assam nena thawhho hian Tourism hmasawnna tura rah tha a chhuah kan ring tlat a ni,” a ti a. Assam Tourism hunpui buatsaihah Mizoram Tourism chawilarna tur thlalak leh video-te a remchan anga tilar ve thin tura ngenna a thlen chu tihhlawh-tlin an tum tur thu Assam Tourism Minister hian a hrilh bawk a ni.

He inkawmnaa tel ve Assam Tourism Development Corporation (ATDC)-a Managing Director Kumar Padmapani Bora IRS chuan Mizoram-a Tour Operator-te tan Guwahati lamah Workshop an buatsaih theih thu te, Mizoram in ATDC kaltlanga Tourism lama puih a tulna ah an inhawn reng thu te a sawi bawk.