MUHCS hnuaiah mi 59,602 enkawl ni tawhin Cheng vbc. 100 vel hman a ni tawh

Kumin April ni 1 atanga nimin, December 16, 2025 thleng khan Mizoram Universal Health Care Scheme (MUHCS) hnuaiah mi 59,602 enkawl an ni tawh a, hemi atan hian Sawrkar chuan cheng vbc. 100 vel a seng tawh a, Health Minister Lalrinpuii chuan MUHCS chu a hlawhtling chho viau tawh nia an hriat thu a sawi.

Health Minister Lalrinpuii hian nimin khan a Pisa-ah thuthar thehdarhtute kawmin a Department chan hnuaia hmalakna hrang hrangte a sawi a, Health & Family Welfare Department hnuaia Mizoram Universal Health Care Scheme (MUHCS) chu tluang taka kalpui zel a nih thu sawiin, “Kumin April ni 1 atanga Vawiin (Dec. 16, 2025) ni thleng hian MUHCS hnuaiah mi 59,602 enkawl an ni tawh a. Hemi atan hian Sawrkar in cheng vaibelchhe 100 leh cheng 529 chiah chiah a seng tawh a ni,” a ti a. “Mi rethei te te ten sum seng lo – Cashless a damdawi In a an han inenkawl thei hi a taka tawngtu lawm tak tak an tam em em mai a. Mipui tan chuan a tha takzet a ni,” a ti. Health Minister chuan damlo zawng zawng zinga 68.56% chu sawrkar damdawi In-a enkawl an nih thu leh chutih laiin sawrkar damdawi In-a damlo te tana sawrkar senso chu 43.47% chauh a ni thung tih sawiin, “Hei hian Health Department lama ka thawhpui Doctor, Nurse, Lab Technicians leh thawktu dang dang ten theihtawp an chhuah theuh a ni ti a lang chiang em em a. Sawrkar damdawi In tihchangtlunna kawnga kan hmalakna pawhin rahtha a chhuah tih a lang a. Ka lawm hle a ni,” a ti.

Kohhran hrang hrang Damdawi In te pawhin mipui rawngbawlna a ni tih hria a MUHCS an zawm ve zel thu pawh Minister chuan sawiin, “BCM, LIKBK leh ECM damdawi In ten min han zawm vat a, Tunah PCI lam damdawi In ten min han zawm ve leh thei ta hi a lawmawm hle mai a, Kohhran mipuite pawhin an chhawr hle a ni. Tunah pawh hian Private Hospital thenkhat min rawn zawm tum an awm mek a, tunkar chhung hian Agreement te pawh sign hman kan tum a ni,” a ti bawk.

Sawrkar damdawi In hrang hrangte theihtawp in an thuam that thu leh thawktu lak belhin hmanrua an pek belh nasa bawk tih Health Minister chuan sawiin, “Tunhma lama damlo enkawl ngai mang lo PHC/CHC-ah te chuan nasa takin damlo enkawl a ni ve ta a, District Hospital hrang hrang te an lun ngaiin an lun reng a, Civil Hospital, Aizawl phei chu khum full reng ang tluka ngaih theih a ni. ZMC&H chu khum 520 nei thei tura kan upgrade bakah Cabin 40 kan function kim tir thei ta a. ICU pawh 13 chauh nei thin kha 13 dang kan han lei belh a, tunah chuan ICU 26 hi a function vek tawh a. District Hospital hrang hranga ICU kan dah te pawh an function chhoh ve tak avangin ICU lama harsatna kan tawh chuan ziaawm lam a pan ta viau,” tiin Kohhran damdawi In hrang hrang ten an rawn zawm taka vangin damlo khum changlo tih vel a tlem ta niin a sawi bawk.

Health Minister chuan  MUHCS chu a hlawhtling chho viau tawha an hriat thu sawiin, hetih rual chiah hian Sawrkar sum ngei pawhin tlin loh chin a nei tih an hriat thu a sawi a, sawrkar sumin a tlin tawk – kan in sustain theihna tawk, mipui tana tha siin MUHCS hi an kalpui mek tih hriat sak turin a chah bawk a ni.

Tunhma atanga damlo inenkawlna atana Mizoram sum, phai lama a luanral tamna pawl tak chu Kal thlak (Kidney Transplant) a nih thu Minister chuan sawi bawkin, hemi atan hian hma an lak thu leh a hmawr an bawk hnai niin a sawi a. “A taka Kidney Transplant kalpui thei turin Civil Hospital, Aizawl-a kan Operating Theatre te pawh kan buatsaih fel tawh a, Aizawl Smart City Ltd. atangin Anaesthesia Work Station bakah hmanraw tul ang ang min pek belh tawh,” a ti a, Narayana Health - RN Tagore International Institute of Cardiac Science, Kolkata  nen MoU ziakin kumthar-a thawktu ten Training an neih hnuah tih theih an beisei thu a sawi a ni.