Halpuah leh halmawi khapa zawm turin ngen

Sub-Hqrs. YMA Serchhip chuan sawrkar in Halpuah leh halmawi khapna thupek a chhuah te zawm theuh turin YMA Member te an ngen.
Serchhip Sub-Hqrs. YMA chuan an huamchhunga YMA Group leh Branch te hnenah ngenna lehkha tichhuakin tun hmaa hunpui tinuamtu leh kan hlimpui em em thin Halpuah leh halmawite chuan nasa takin mihring hriselna a tihchhuah thu leh boruak a tih bawlhhlawh bakah damlo na tuar leh natna benvawn nei te tana harsatna tam tak a siam thin bakah ho lam taka sum tam tak khawhralna anih avangin sawrkar chuan heng hunpui lo thlen dawnah hian Halpuah leh halmawi khapna thuchhuah a siam thin thu sawiin, kumin ah pawh sawrkar chuan hemi chungchang ah hian thupek a tihchhuah tawh thu an sawi a. Heng sawrkar thuchhuah te hi zawm theuh tura YMA member zawng zawng te ngenin, “Halpuah leh halmawi tel lova hlim taka he hun hi hmang theuh turin YMA member te i inbuatsaih ang u,” an ti a ni.

Sub-Hqrs. YMA chuan Branch YMA te pawh an huamchhung theuhah sawrkar tha tichaka thawhpuitu ni a sawrkarin Krismas leh Kumthar vuakveta Halpuah leh halmawi hal, zawrh, hman leh kawl a khapna thuchhuah hi a hlawh-tlin theih nana hma la theuh turin an ngen a. YMA Member leh mipui zawng zawngte chu kum 2025 Krismas lo thleng tur leh Kumthar (2026) lawmna hlim taka hmang turin duhsakna an hlan bawk.

Tarlan tawh angin Serchhip District Magistrate Paul L. Khuma chuan December 8, 2025 khan Section 163 of Bharatiya Nagarik Suraksha Sanhita, 2023 tlawhchhanin Serchhip District huamchhungah Halpuah, halmawi, Sky Lantern leh puakthei thil dang boruak tha lo siam thei leh ri beng-chheng siam thei chi reng reng lakluh, zawrh, hralh, hal leh hman khap tlat a nih thu a lo chhuah tawh a. He thupek zawm lo chu Section 223 of Bharatiya Nyaya Sanhita, 2023 hmanga hrem theih an nih thu pawh a tarlang bawk a ni.