Kal thlakna atana duan bik Hnimhlum khawl Civil Hospital Aizawl hnenah UD&PA in an hlan

UD&PA Minister K. Sapdanga chuan nimin zing khan Civil Hospital Aizawl-a hman tur cheng nuai 35.70 man Anesthesia Workstation leh cheng nuai 22 man Upper Gastrointestinal Video Endoscope Unit te a hlan.

Heng khawl hlanna inkhawm tawi Doctors’ Seminar Room-a neih ah UD&PA Minister K. Sapdanga chuan Health Department, a bik takin Civil Hospital in anmahni ngaihtuaha vei em emtu Minister an neih chu an vannei hle tih sawiin, “Hun reilote chhunga Hospital Establishment hrang hrang kan han fan atang ringawt pawh khan khawl leh thawktute inbuai zia leh indaihloh zia chu kan hmu a. Heti chung pawh hian sawiselna leh demna chu Department dang zawng ai pawhin in dawng hnem thin mai thei. Sawiselna leh demna in dawn chang pawhin lunghnur mai lo ula, in hnathawh ropui zia te, nunna hlutzia te leh inthlahdah zeuh pawi thui zia hre rengin, chhel takin, hmangaihna leh lainatna rilru nen missionary rilru puin lo thawk zel turin ka ngen che u,” a ti a ni.

UD&PA Secretary Lalmalsawma Pachuau kaihhruai he hunah hian Health Minister Lalrinpuii pawhin Aizawl Smart City Limited in Civil Hospita-la khawl an pek te an bunna hmun te an fankualin a tangkai zia chu an hmu vek tih a sawi a. “MRI khawl ringawt pawhin June thla atang khan mi 1300 an en tawh a ni. Khawl thar changkang tak tak kan nei hian a thawktu te pawh a tiphur thar hle a ni,” tiin, UD&PA Minister leh Staff te, Aizawl Smart City limited hotute chungah lawmthu a sawi bawk.

Anesthesia Workstation (Drager Atlan A100), hnimhlum khawl hi Renal Replacement surgery (Kal thlakna) atana duan bik a ni a, he khawl hmang hian damlo te him zawkin hnimhlum a pek theih tawh dawn a. Mizoram-a hnimhlum khawl kan neih tawhah chuan a tha ber ni tura ngaih a ni a. Kumin November 15 khan Civil Hospital lo thlengin tun thla ni 3 khan installation tihfel a ni a. Mithiam te lokalin tun thla ni 5 khan Demonstration pawh neih a ni tawh bawk a. Nakum January thla khian Drager 'application specialist' a lokal leh anga, a khawl tangkai zawka hman dan tur 'demo' an rawn neihpui leh dawn a. Mizoram-ah ngei Kal thlak theih a nih hun tur hi a hla tawh lo hle niin a lang.

Nimin zing-a he hun hman ah hian UD&PA Minister K. Sapdanga chuan Health Minister Lalrinpuii hnenah ‘Memorandum of Agreement for Anesthesia Work Station and Upper GE Scope’ chu hlanin UD&PA hian Smart City Limited kaltlangin Aizawl Civil Hospital hnenah cheng nuai 872 man MRI khawl leh khawl dang 24, avaiin cheng vbc. 20.8 man chu kumin June thla khan a lo hlan leh tawh bawk a. Heng khawl hrang hrangte hi nimin zing khan Minister pahnih te hian tlawh bawkin an hman dan leh mipuiin an tangkaipui dan a thawktu hnenah an zawtfiah bawk.