Lenkawl

 

Serchhip Sub-Hqrs. YMA ten an enkawl, Entlang Social Forestry-a Nagar Van Yojana (Urban Forest) hnuaia hmalakna te chu nimin khan Serchhip Bialtu MLA leh Chief Minister Lalduhoma chuan a hawng a, EF&CC Minister Lalthansanga pawhin he hun hi a hmanpui a ni.

Naktuk November 14, 2024 khian Mizoram pumah chhiatna lo thlen thulha chhanchhuah leh chhawmdawlna hna thawh dan a tak anga enchhinna, Mega Mock Drill neih a ni dawn a. Hemi atana inbuatsaihna Table Top Exercise chu nimin khan neih niin Serchhip atang pawhin he hun hi hman a ni.

Serchhip Bialtu MLA leh Chief Minister Lalduhoma chuan Serchhip-a Shalom Spastic Society te enkawl Rualbanlote School, Shalom Special School chu nimin khan School Bus thar mi 21 chuan theihna (Force Traveller) a hlan.

Serchhip-a Excise & Narcotics Department chuan nizan hmasa zanlai pelh hnu hret khan Serchhip Chanmari Vengthar-ah Heroin ni ngeia hriat Hawng 5 an man a, heng damdawi te hi Sahbon bawm-a dah niin a neitu nia hriat H. Lalhmangaiha (27), Chanmari Vengthar nia insawi pawh manin thubuai siam sak nghal a ni. Tun tuma damdawi an man te hi gram 56.59-a rit niin nimin khan damdawi leh a neitu nia puh te hi District Court-ah hruai nghal an ni.

Nimin khan Serchhip DC Pisapui Hall-ah District Legal Services Authority leh District Hub for Empowerment of Women, DPO Office, Ser-chhip tangkawp buatsaihin hnathawhna hmunah hmeichhiate an him theihna turin District Level Training on Prevention of Women from Sexual Harassment (POSH Act, 2013) at Workplace chu neih a ni a. He hunah hian Magistrate First Class Josangzeli Tlau chu Resource Person atan hman niin hnathawhna hmuna hleilenna laka hmeichhiate venhim an nih theihna tur te, hetiang harsatna tawk hmeichhiate dikna chanvo humhim leh dan bawhchhetute hrem theihna dan te a sawi a. Kalkhawmte chu an hnathawhna hmun theuh ah midangte zirtir chhawngtu ni turin a chah bawk.

Serchhip District-a Khawlailung khua ah nimin khan ASF vangin Vawk pahnih a thi leh a, Baktawng khua ah Vawk pakhat thi bawkin Vawk suat erawh District chhungah a awm lo a. Heti hian kumin chhungin Serchhip District-ah ASF vangin Vawk 3494 a thi tawh a ni.

Land Resources, Soil & Water Conservation Department changtu Minister Lalthansanga chu nimin khan Serchhip-ah a rawn kal a, chawhnu lamah Serchhip-a LR,S&WC Department District Office chu tlawhin District Officer JH. Laldingliana leh a thawhpui ten an lo dawngsawng a, thawktute nen inkawmin an hmalakna te an sawiho a ni.

Mizoram Cooperative Apex Bank (MCAB) Director Rosiamliana Ralte chuan nimin khan Serchhip District-a North Vanlaiphai khua ah Apex Bank ATM thar a hawng a, hmasawnna leh chang-kanna nena inkawp tlat Bank hmang uar sauh sauh turin kalkhawm mipuite a fuih bawk a ni. Nimin a hawn tak North Vanlaiphai-a ATM hi Apex Bank ATM 38-na a ni.

Kolasib District Industrial Area Management Committee chu nimin khan thukhawmin Kolasib District chu Mizoram-a Industrial Area nei tha ber a nih thu tarlan a ni a, Kolasib District-ah hian tun dinhmunah Kolsib, Bairabi, Bilkhawthlir leh Pangbalkawn-ah te Industrial Area a awm mek a ni.

Tunhnaia Assam chhunga Rel kawng siam hnathawh mek avang leh Hindu-te kutpui avangin Mizoram mamawh tuialhthei leh nitin mamawh thenkhat lakluh a khaihlak hlek a, nimin lam khan Aizawl leh a chhehvela Filling Station thenkhat te chuan Petrol leh Diesel te hi an nei thleng leh tan tawh a ni. Petrol Pump Manager te chuan Badarpur leh Lumding inkar Rel kawng thawm-that hna thawh a nih avang te leh Hindu-te kutpui vuakvetah tuialhthei phur lirthei-te duh anga an veivah chak theih loh avanga supply khaihlak hret a nih thu an sawi a, hun reilote-ah an dinhmun a pangngai leh vat an beisei thu an sawi a ni.

Mizoram Polytechnic Lunglei-a Building thenkhat te chu Court in khar tura a tih hnuah Court chuan nimin khan thupek dang tichhuakin thudang a awm hma chuan thupek hmasa hi tih hlawhtlin rih loh turin a ti a. Thudawn danin Lunglei District Civil Judge CJM Lalthansiami Hnamte chuan thupek chhuahin, zirlaite hmakhua ngaiin he thutlukna hi siam a ni a, hei bakah hian Mizoram sawrkar chuan Mizoram Polytechnic atana mimal ramluah man bat chungchang hi Court sang ber, Supreme Court ah kalpui a tum avangin Lunglei Police OC hnenah Polytechnic building pasarih (7) kalh tur a thupek a chhuah chu a sut a ni. Mizoram Polytechnic Lunglei-a zirlai naupang te hi Vawiin ah an exam mai dawn avang leh Supreme Court-a sawrkar a zualko avangin December 2025 thleng hun pe in, hemi chhung hian Sawrkar chu lo in chingfel tura tih a ni bawk.

Lunglei atanga Tlabung panna kawng NH. 302 chu ruahtui a hul chhoh tan mek avangin kawng siam hna thawktute pawhin chak zawka hmalak an tum tih an sawi. He kawng siam chungchang Lungsen khawtlang hruaituten an sawi danin NH. 302-ah hian kawng laih zawh tawh engemaw zat awm mah se kumin Furpui thlen hma khan WMM phah zawh hman loh tam tak a awm avangin lirthei leh zin veivak-te'n harsatna an tawh phah nasa hman hle a, tunah erawh khua a that chhoh takah chuan kawng siamtu BRN Infra. Pvt. Ltd. chuan chak zawkin hna an thawk mek tih an sawi a ni. Kawng siam hna hi tunlai hian Lungsen chhehvelah an bei ngawrh hle tih Lungsen khaw-tlang hruaitute chuan sawiin, chhun lam motor tlan tam laiin WMM an phah a, Pathianni leh tlai atanga zan thlengin kawng luan hna an thawk thin dawn tih an sawi bawk.

Ni thum (3) chhung awh tur Lai Autonomous District Council (LADC) Thlasik thutkhawm chu nimin khan neih tan a ni. LADC Session Hall-a LADC thutkhawm hi LADC Chairman VL. Hmuaka chuan kaihruaiin hun hmasa lamah MDC lo ni tawh leh kumin July ni 2-a boral Thanglawma sunna hman a ni a, hemi hnu hian zawhna leh chhanna hun hman niin ZPM Member Eptu lam hruaitu K.Hre Kung zawhna chhangin CEM, C. Lalmuanthanga chuan Mizoram Sawrkar angin LADC huamchhungah Aikal lak khapna a hranin kalpui a ni lova, Aikal lak hi phal loh sa a ni, a ti a, CEM chuan loh theihloh vangin thuneitute hriatpuina in aikal la an awm tih erawh Sawrkarin a hriat thu a sawi thung a ni. LADC Thlasik thutkhawm-ah hian Chawhnu lamah Sawrkar bill pahnih pharh niin Vawiin lamah sawiho tur a ni dawn a. Tun tum thutkhawm ah hian House-a chhan tur zawhna 31 lutin Sawrkar bill pahnih leh Private Member Resolution pakhat a lut a ni.

Khawzawl Zuchhip Branch YMA te chuan niminpiah khan an Vengchhunga hmeithai leilet buh seng sakin buh tin 150 in an thlen sak a. He hmeithai hi a fanu in Cancer natna a neih avangin rei tak an buai tawh a, hlo thlawh leh hnadang pawh thawk thei lova an awm avangin YMA te hian an buh te hi an seng sak a ni.

Mizo Zirlai Pawl (MZP) General Hqrs. chuan Meitei firfiak pawlte’n tunhnaia Jiribam District Zairawn khuaa Zosangkim Hmar (31) nasa taka an sawisak hnua rawng taka an that zui chu hriatthiam har an tih thu leh tunlai khawvelah hetiang thil thleng hriattur a awm chu ngaihtuahna nei lo, ran ang maia khawsakna ah an ngaih thu leh an dem thu thuchhuah siamin an tarlang a. Thla 19 lai awh tawh Manipur-a chi leh chi buaina in ziaawm lam pan tawh tura an beisei laia Meitei firfiak pawlte tharum thawhna leh pawisak neih lohna chuan buaina a ti punlun leh mek nia sawiin, pawi an tih thu an sawi bawk.

Siaha-a District Poor Students Trust Society (PSTS) chuan Siaha District chhunga zirlai naupang harsa zual, zirna lama tanpui tlaka an ngaih te hnenah nimin khan tanpuina an hlan a, tun tum ah hian zirlai panga (5) te hnenah Rs. 39,000/- theuh, a vaiin Rs. 1,95,000/- pek an ni a, District Bawrhsap leh PSTS Chairman Hruaizela chuan heng tanpuina hi a hlan a ni. Heng zirlai tanpuina hlan te hi BE (Computer), BE (Civil), BE (Electronic), Radiology leh B.Sc. (Forestry) zirlai te an ni.

Mizoram Youth Commission (MYC) Chairman Malsawmzuala Ralte chuan Manesar, Gurgaon-a Honda CSR hmunpui chu nimin khan tlawhin thawktute nen an inkawm a, Honda hian an CSR hmangin MYC Office, Aizawl-ah Mizo thalai 45 te tan Hotel Management Training-na senso an tum sak mek a, Manesar, Gurgaon-a Skill Training chi hrang hrang an kal pui mek atangin MYC nena thawhho a, Aizawla training buatsaih leh dan tur MYC Chairman ho hian an sawiho a. Skill Training Programme hrang hrang atangin GDA/General Duty Assistant-Nursing Care lam leh Retail Shopkeepers training te chu MYC Office, Aizawl a buatsaih leh tura hmalak nise tiin thutlukna an siam nghal a ni.

Mizoram-a raltlan 40,000 chuang awmte tana Central sawrkar in cheng vbc. 5 hu buhfai a pek tur chu Supply Department in Mizoram-ah a phurlut tan tawh.

Aizawl Bazarpui (New Market)-a sumdawng 1,105-te lenna tur building sak mek, Aizawl City Centre sak hna chu tun thlengin zaa 55 (55%) sak zawh tawh a ni.

Sports Minister Lalnghinglova Hmar chuan Mizoram Sports in hma a sawn zel theihna’n Sports Association hruaitute leh infiammite’n National Level leh International Level thleng phaka ngaihtuahna kan sen a tul, a ti.

Mizoram sawrkar-a Tourism Department in District hrang hrangte tana Tour Itinerary Creation Competition a buatsaiha Serchhip District in lawmman pakhatna a dawn lawmna chu nimin khan neih niin Tourism chungchanga hmalak zui dan tur sawihona neih nghal a ni.

Serchhip District-ah nimin khan African Swine Fever (ASF) vanga Vawk thi awm belh lovin Vawk pathum suat a ni thung a, heng zinga pahnih hi Chhuanthar Tlangnuam-ah niin Baktawng-ah Vawk pakhat suat a ni leh bawk. Heti hian kumin chhungin Serchhip District-ah ASF vanga Vawk thi 3491 awmin Vawk 7045 suat a ni tawh a, khaw 31-a chhungkaw 2119 ten ASF avang hian kumin ah harsatna an tawk tawh a ni.

PWD chuan nimin khan Secretariat Conference Hall-ah Review Meeting neiin he hun hi Chief Minister Lalduhoma chuan a telpui a ni.

Mizoram Polytechnic Lunglei-a Institution building 7 te chu Sawrkar in luahman a pek loh avanga Court in Vawiin-a kalh tura Lunglei Police a hriattir angin nimin khan zirlaite chu an Institution Multipurpose Hall-ah an in thiarlut a, zirlaite hi tunkar Nilaini-ah Exam tur an nih avangin nimin khan Mizoram Polytechnic Principal leh MSU Lunglei hruaitu ten Court-ah zahngaihna an dilpui a, amaherawhchu Court hi a thu ah a tawlhkir dawn lo nia thudawn a ni. Court in Mizoram Polytechnic Lunglei-a building a kalhsak tur te hi Main Building, Science Block, Seminar Hall leh Library, Fitting & Pumbling Workshop, Workshop, Farm House leh Store Room te an ni. Mizoram sawrkar in Lunglei-a Mizoram Polytechnic Campus chhunga ram neitute hnena ram luah man a bat sak chungchang ah hian ram neitute lungawilo chu Lunglei District Court-ah an zualko a, he thubuai ngaihtuahtu Senior Civil Judge chuan kum 2022 khan Mizoram sawrkar chu ram neitute hnenah ram luah man Rs. 95,05,033/- pe turin thutlukna

Nimin khan Saitual Town Sanitation Committee chu an Chairman leh Bawrhsap Dr. Lalngura Tlau hova thukhawmin ‘Mizoram Cleanliness Competition 2024’ neih tur atana inbuatsaih dan tur an sawiho a, Saitual DC chuan Saitual khua chu khawpui fai ber lawmman lo dawng tawh a nih thu leh tunhnaiah an dinhmun a tlakhniam leh tak avanga hmalak thar a tul thu sawiin, hmalakna tur hrang hrang an sawiho a ni.

Cheng vbc. 14.3 senga Lunglei Super Market Building sak hna thawh mek chu nimin khan Lunglei District MJA ten an tlawh a, he hna hi NEC atanga sum hmuh hmanga Excel Consultancy Services ten an sak niin nikum April thla tir lam atang khan thawh tan a ni a, tun dinhmunah hna-thawh tur 62% thawk tawh ang an nih thu PWD hotute leh Contractor te chuan an sawi a ni. Ruahman lawk ang chuan September 2025-ah he hna hi thawh zawh hman tur a ni a, hna-thawktute chuan hun tiam chhung hian zawh hman an beisei thu an sawi a ni.

Inrinni kalta (Nov. 9, 2024) chawhnu lama Tiau lui-a chesuala tui-a tla Mary Vanlalnun-puii (21) w/o Ramnghaka, Thingsai chu nimin khan a tlakna li, Libial-ah a ruang hmuh a ni a, nizan khan vui nghal a ni. Mary-i hi Inrinni khan a pasal nau nen chawhmeh zawng-a ram kalin Tiau lui-ah hian chesualin a tla ta a ni.

Mizoram Pradesh Youth Congress Committee (MPYCC) chuan Manipur Jiribam District-a Ngurthansanga Hmar nupui, Zosangkimi Hmar (31) tunhnaia rawng taka thah a nih chung-changah Manipur Chief Minister N. Biren Singh chu a rang lama hma la tura ngenna nimin khan thlenin zangnadawmna pe turin an phut bawk.

Anti-Corruption Bureau (ACB) leh Aizawl Police Station-a thawktu ten tunhnaia an man MSU President Samuel Zoramthanpuia’n Bial a dilna chu nimin khan Court-ah ngaihtuah a ni a, ACB ten thubuai an siamsakna leh an manna ah te Bail hi phalsak a nih laiin Aizawl Police Station ten an manna thubuai ah erawh Bail hi phalsak a ni lo thung nia thudawn a ni a, hei vang hian Jail ah a awm chhunzawm ala ngai dawn a ni. Samuel Zoramthanpuia hi tun thla ni 8 khan man a ni a, hemi hi hian Bail dilna thehlut mah se hnawl a nih thu kan thulakna chuan a tarlang bawk a ni.

Eklavya Model Residential School (EMRS) Tlangnuam-a Hmeichhe Hostel-a inthiarna mumal lo leh zahawm lo taka siam nia sawi chungchangah Social Welfare & Tribal Affairs Minister Lalrinpuii chuan, hna hi thawh zawh a la ni lo a, Contractor-te hi kumin December thleng hun pek an ni tih a sawi.

ZPM Thalaite chuan Tar Pension, Hmeithai leh Rualbanlo pension la te tana sum ruahman chu Bank-ah dahluh fel a nih thu an sawi.

Tun thla ni 14 atanga Nov. 16 thleng khian Lunglei-ah Leitlangpui Music Festival neih tum niin hemi atan hian inbuatsaihna kalpui mek a ni a, ruahman dan chuan a tan ni, Nov. ni 14-ah a hawnna leh Traditional Day hman tur a ni anga, a ni hnihna ah Beat Contest neiin, a ni thumna ah Zaithiamte an fuankhawm dawn a. Tlai tin Concert a awm dawn bakah a ni thumna bikah hranghlui zaithiamte nen ‘Leitlangpui Night’ hman a ni dawn a. Festival-ah hian ‘Museum of Leitlangpui History’ siam a nih dawn thu Tourism Minister Lalrinpuii chuan nimin-a thuthar thehdarhtute a kawmna ah a sawi bawk a ni.

Tourism Minister Lalrinpuii chuan Chaltlang Tourist Lodge chu 5 Star Hotel a nih theihna turin midang kuta hlan (Outsource) an tum tih a sawi.

Sawrkar laipui leh Mizoram sawrkar hmalaknaa Mizoram-a Raltante tana buhfai sem chhuah tura ruahman chu nimin khan Lawngtlai District Bawrhsap Cheemala Siva Gopal Reddy IAS chuan Lawngtlai Kanaan Refugee Camp tan a hlan.

Mizoram-a ruihhlo do hna thawktu Agency hrang hrangte hnenah nimin khan Ruihhlo dona tur sumfai semchhuah a ni.

Mizoram sawrkarin ruang phurhna man tum sak tura a tih hnuah ruang phurhna bill lut 91 a awm tawh a, an la dawn belh zel bawk.

Central YMA chuan Myanmar buai avanga Zohnahthlak raltlan Manipur Jail-a hren mekte chu Mizorama lak chhawn theih dan kawng dap turin Home Minister K. Sapdanga an ngen.

Health Minister Lalrinpuii chuan SASCI sum hmanga Health Clinic 235 sak tura sawrkar hmasa hunlaia lo ruahman tawhah Plan leh Estimate anga sa lo an awm a nih chuan an chungah a tul angin sawrkarin hma a la dawn tih a sawi.

Sawrkar Flagship Programme, Bana Kaih (Handholding) Scheme hnuaiah November 4 thleng khan Progress Partner (tanpuina dawngtu) ni turin dilna 6,010 a lut tawh a, November tawp lamah tanpuina (loan) hmu turte thlan tum a ni.

Mizoram Sawrkar Flagship Programme, The Mizoram Bana Kaih (Handholding) Scheme hnuaia Thlai thar lei leh hralh mumal zawka kalpui a nih theih nan Serchhip District-ah hmalak mek zel a ni a, Thlai thlanbik pali (4) leitu turte chu in register vek tura hriattir an ni.

Kumin chhungin Serchhip District-ah African Swine Fever (ASF) vanga Vawk thi leh suat 10,532 a awm tawh.

Chhiahtlang khua a Kawn Veng Welfare leh All NGO huaihawtin Ruihhlo Do Beihpui thlakna chu Inrinni khan neih tan a ni a, he huna kalkhawm te chuan Zu leh ruihhlo zawrh an duh lohzia an lantir a ni.

Nakum (2025) hi Mizoram-a Village Council leh Local Council Inthlanpui neih kum a nih avangin Inthlanpui nei turin inbuatsaihna kalpui mek a ni a. Hemi atana hmalakna hmasa atan Eelctoral Roll ennawn hna pawh thawh thuai tum niin tuna ruahman dan chuan tun thla ni 22 khian Draft Electoral Roll chu tarchhuah a ni anga, Nov. 25 atanga December 9, 2024 thlengin hmun thun thar, paih leh siamrem ngai te tan dilna hun hawngin heng te hi enfiah a nih hnuah Final Electoral Roll chu kumthar January 8-ah tarchhuah tur a ni ang.

 Swachh Bharat Mission 2.0 hnuaiah UD&PA Department hmalakna in Inrinni khan Serchhip Kawnpui South Branch YMA te chuan Serchhip Mat luidung, Chawmkai leh a chhehvel thenfai hna an thawk a, he hnatlang-ah hian thupui atan ‘Hmalam hun hrisel leh thianghlimna kan neih zel theih nan’ tih chu hman niin luidung-a bawlhhlawh chi hrang hrang an chharfai a, Mat luidung, Chawmkai leh a chhehvel vawng fai chhunzawm zel turin Serchhip mipuite leh lui-a kal thin te chu an ngen bawk a ni.

Lunglei-a Civil Judge (Senior Division-II), Lalthansiami Hnamte chuan Mizoram Polytechnic, Lunglei chu ram luah man pek loh avângin an building zawng zawng khârsak turin thupek a chhuah. Court thupek atanga a lan danin Lunglei Hrangchalkawn-a Mizoram Polytechnic, Lunglei hian ram luahman hi hun rei tak an pe tawh lova. Ram neitu, Vanlaldawngliana s/o H. Sport-a, Theiriat chuan tum engemaw zat ram luah man hi a thing tawh a; mahse, sawrkar lam hian ram luah man hi an pek loh avangin Court chuan building leh hmanrua zawng zawng hi kharsak turin thupêk a chhuah a ni. Court order atanga a lan danin Mizoram Polytechnic, Lunglei ram luah man an pek loh zat hi Rs. 98,05,033 a tling a ni.

Mizoram sawrkar chuan State Human Rights Commission din turin chak takin hma a la mek.

Centre for Research on Energy and Clean Air (CREA) chuan tuhnai khan India rama khawpui boruak fai ber leh bawlhhlawh tarlangin, Mizoram khawpui Aizawl chu India rama boruak thiang-hlim ber niin Air Quality Index 29 a ni a. Khawpui dang Gangtok, Tirunelveli leh Thanjavur te chuan an zui ve bawk. Hetihlai hian Delhi chu boruak bawlhhlawh berna niin Air Quality Index pawh 377 lai a ni.

Leitlangpui Music Festival chu tun thla ni 14 khian Lunglei-ah neih tum niin inbuatsaihna kalpui mek zel a ni a. Mizoram sawrkar chuan Leitlang Music Festival hi tun thla November ni 14 atanga ni 16 inkarah Kawmzawl Helipad leh a chhehvelah a buatsaih dawn a. He Festival atan hian cheng nuai 25 vel ruahman niin sum hi NEC atanga dawn tur a ni a. Inbuatsaihna kawng hrang hranga kalpui mek niin zai leh lam hmanga bakah Hnam Lam hmuh tur a awm dawn a, dawr hrang hrang 60 chuang zet siam a ni dawn a ni.

Sinlung Hills Council (SHC) Inthlanpui vawi hnihna neih zawh a nih hnuah sawrkar thar siam tura hmalak mek a ni a, tun thla ni 21 hmain sawrkar thar hi lakluh tura ruahman a ni.

Taxation Department chuan thla sarih (7) kalta chhung khan Chhiah chi hrang hrang Rs. 646,53,71,317 an hmu a.Chhiah chi hrang hrang an hmuhna hi GST, Profession tax, Sales Tax, Road Maintenance Cess, Social Infrastructure & Services Cess, Entertainment Tax leh thil dang atangin a ni. Taxation Department-in sawrkar kum kal mek 2024-2025 thla sarih (7) chhunga chhiah an hmuh hi April-ah Rs. 165,01,97,183; May-ah Rs. 81,09,10,407; June thla ah Rs. 80,92,89,838; July thla ah Rs. 108,53,82,792; August thla ah Rs. 70,15,08,712; September thla ah Rs. 64,91,61,389 leh October thla ah Rs. 75,89,20,996 te an ni.

Aizawl East-I bialtu MLA leh Minister Lalthansanga chuan Inrinni khan a bial chhunga Sihphir tlawhin mipui, a duh apiangte tana dawr theihna hun a siam a, mitinin an dikna chanvo theuh an chan chu Sawrkar duhthusam a ni tih sawiin, Ban-a kaih policy chu pawisa sem a ni ve loh thu leh Chief Minister Special Package pawh grant niin, mi taima leh thawkrimte tana chhawr nahawm tak tur a nih thu a sawi bawk a. Hnam zahawm kan nih theih nan ei leh barah kan intodelh a ngai a, loh theih loh a ranpawn atanga kan ram mamawh lakluh ngaite pawh kawng khat chauh ni lovin kawng dang atanga lakluh dan ngaihtuah mek a nih thu a sawi bawk a ni.

National Institute of Technology (NIT), Mizoram leh Indian Institute of Management, Visakhapatnam chuan Ningani khan thawhdunna thuthlung, Memorandum of Understanding an ziak a, he thawhdunna hnuaiah hian kum li (4) zir Bachelor of Technology (B.Tech) leh Master of Business Administration (MBA) kalpui a ni dawn a; NIT-Mizorama B.Tech zirlaite chuan kum 5 chhungin an zirlai pangngai bakah, B.Tech kum thumna (3rd year) atanga MBA zir telin, HIM-Visakhapatnam atangin MBA degree an nei thei dawn a ni. MoU ziah hnuah hian NIT-Mizoram leh IIM-Vishakapatnam hotute chuan Governor leh Chief Minister an hmu a, MoU chungchang leh hmalaknate an hrilh a ni.

Excise & Narcotics Department (END) leh Zemabawk East Joint Action Committee (JAC) te tangdun chuan Inrinni zing khan Zemabawk East, Kanan Thar Veng-ah Heroin nia hriat kg 2 leh gram 557 (Hawng 220) leh a neitu nia puh mi pahnih-Thangmuansein (30) leh Thang-khansawm (22) Tuithang khua, Tedim Township, Myanmar-a khawsa ve ve ni a inchhalte chu an man a, hemi hnu hian Heroin kg. 1.177 (Hawng 94) leh a neitu ni a puh Sowab Uddin (23) Tukar Bazar, Patharkandi, Karimganj District, Assam te pawh man leh an ni bawk.

Mizoram leh Assam inrina hmun hrang hrang ah tunlaiin boruak a muanawm a, harsatna thleng awm lo mah se Mizoram Police te chu ngawrh takin an Duty mek a ni.

Adviser to Chief Minister (Finance) TBC. Lalvenchhunga chuan Open Market Borrowing (OMB) atanga thlatin-a sum an puk chu mamawh thar thut vanga puk a ni lo tih sawiin, Budget-a dah sa a nih thu a sawi.

Minister of State Prof. Lalnilawma enkawl Department- Horticulture, Rural Development leh PHE Department-a hnathawh hrang hrangte thlirletna hun chu Zirtawpni khan neih a ni a, Chief Minister Lalduhoma chuan he hun hi a telpui a ni.

Mizo Students Union (MSU) General Hqrs. President Samuel Zoramthanpuia chu man-a Central Jail-a dah a nih hnuah Vawiin hian Bail a dilna ngaihtuah a ni ang.

PM Vishwakarma hnuaia Serchhip District chhunga Thing mistiri (carpentry) training chhuak mi 61 hnena Certificate hlanna hun chu nimin khan Serchhip DC Pisapui Hall-ah hman niin he hun hi Bawrhsap Paul L. Khuma chuan a hmanpui a ni.

Karleh Ningani, Nov. 14, 2024 khian Serchhip-ah Mega Mock Drill neih a ni dawn a, hemi chungchang hi nimin khan Serchhip-ah District Bawrhsap hovin sawiho a ni.

Serchhip-a UD&PA Department chuan nimin khan Swachh Bharat Mission (Urban) 2.0 hnuaiah Serchhip Bazar Building-a thil zuartute tan Home Composting (Tawihthei atanga leitha siamchhuah) zirhona an buatsaih.

Mizoram-a Cricket inelna ngaihhlut, CAM President’s Cup khelh mekah Serchhip District Team te chuan nimin khan an match hmasa berah Kanan CC chu Wicket 5 in an hneh a, Kanan CC hian bat hmasa in over 15.3-ah run 68 siamin an out vek a, Serchhip DCA te hian vaw ve lehin over 9.5-ah wicket 5 hlohin an target hi an khum a, Wicket 5 in an chak ta a ni.

Baptist Church of Mizoram (BCM) hnuaia Thenzawl Pastor Bial Thalai Kristian Pawl (TKP) te chuan nimin khan Serchhip Blood Bank-a dah turin thisen Unit 30 an pe a, thisen petute hi mipa 26 leh hmeichhia 4 niin heng mi tlawmngai te thisen hi Serchhip Blood Bank-a thawktu ten Thenzawl-ah kalchilhin an lak sak a ni.

Serchhip District chhunga Baktawng khua ah nimin khan African Swine Fever (ASF) vanga Vawk thi 4 lai awm belh lehin Chhuanthar Tlang-nuam-ah Vawk thi pakhat chhinchhiah belh leh a ni bawk a, nimin vek khan Chhiahtlang khua ah hri leng darh zel tur venna atan Vawk pahnih suat leh a ni bawk. Heti hian Serchhip District ah kumin chhungin ASF vanga Vawk thi 3489 a awm ta a, Vawk 7038 suat ni tawh bawkin hri leng avang hian chhungkaw 2119 ten harsatna an tawk tawh bawk a ni.

Churches Council of Mizoram leh Zoram Thar - Rev. Dr. Zaichhawna Hlawndo

Mizoram Students Union (MSU) General Hqrs. President Samuel Zoramthanpuia chu nimin khan Anti Corruption Bureau (ACB) leh Aizawl Police Station-a duty-te chuan manin Central Jail-ah dah a ni.

Mizoram People Forum (MPF) chuan nimin khan Aizawl Vanapa Hall-ah Annual General Conference vawi 17-na an hmang a, hun hmasa lamah Report hrang hrangte ngaihthlak niin an hmalakna an thlirlet bakah hmalak zel dan tur an sawiho a. Chawhnu lamah 'A chhe lai siam that' tih thupui hmanga thusawi ngaithla in an zirho nghal bawk a ni.

Mualvum 1st IR Battalion hmuna ramngaw chu nungcha humhalhna hmun atan nimin khan puan a ni a, a hming atan ‘Garden of Eden’ vuah niin hemi rual hian Winter Operation for Wildlife Conservation Campaign neih nghal a ni bawk.

Mizoram Lok Sabha MP Richard Vanlalhmangaiha chuan MINECO-a Mizoram KVI Board Pisa chu nimin khan tlawhin Mizoram KVI Board Chairman Lalremliana leh Chief Executing Officerr H. Lalbiakliana leh Officer dang ten an lo dawngsawng a. Chief Executing Officer chuan KVI din chhan te sawiin, Assembly Act hnuaia din a nih dan te leh tualtah puan leh industry tenau chawinung tura hma an lak dan te leh loan pung tlem zawka industry tenau dintu tanpui an nih dan te a tarlang a. Lok Sabha MP pawhin MKVIB chu Mizoram tana tangkai tur Project siam lama hma la zel tura fuihin, a theihna chin a sawrkar laipui lamah an mamawh te a lo bawhzui sak zel tur thu a sawi a ni.

Mizoram Youth Commission (MYC) Chairman Malsawmzuala Ralte chuan Mizo thalai RK Enterprise, (Daikin AC Manufacturing) Sri City a hnathawk tur mi 10-te chu nimin khan Aizawl a MYC Conference Hall-ah thingpui a inpui a, hnathawka kal turte chu Pathian tihna, tumruhna, leh taihmakna te nunpui tlat tura fuihin, chhel taka awm turin a chah a. An awmna hmuna an chet velna leh awmdan apiang chu hnamdangte hmuh ah chuan Mizo awmdan tih anih zel dawn avangin Mizo hnam aiawh an ni tih hria a, theihtawp a nun uluk turin a fuih bawk. RK Enterprise, (Daikin AC Manufacturing) Sri City hi Governor Dr. Hari Babu Khambampati leh MYC Chairman-te chuan a hmuna an enfiah hmasak hnuah thawh-hona thuthlung (MoU) siamin Mizo thalai te hi thawn an ni dawn a. Thalai 100 chuang mamawh nih mahse, tun tumah hi chuan a hmasa ber atan mi 10 te hi thawn an ni dawn a ni.

MNF chuan Sinlung Hills Council Inthlanpui neih zawh taka MNF leh HPC (R) atanga thlantlin te lawmpuina Inkhawm chu nimin khan Aizawl-a Mizo Hnam Run-ah an buatsaih a, he hunah hian MNF Sr. Vice President Dr. R. Lalthang-liana chuan tun tuma hnehna an chan chu MNF chakna vang ngawr ngawr ni lovin mipuite hnehna a ni tih a sawi a. “Mipuiten ZPM sawrkar thla 11 leka upaah rinna an nghat tawh lova, Mipui Party, Mipui ta, Mipuite tana ding thin MNF party hnehna min chantir ta a ni,” a ti a. “Sinlung Hills Council-ah hnehna kan chan hian chapona rilru min neih tir lo se la, Kan ram siam tha tur hian theitawp Pathian leh kan ram tan kan chhuah zawk tur a ni a, tlawmna atangin bul kan tan that a pawimawh hle a ni,” a ti bawk.

Congress Party chuan nimin khan Aizawl a Congress Bhavan-ah ‘Friday Political Session’ neiin Sinlung Hills Council Inthlanpui neih zawh taka Khawlian Bial atanga Congress Candidate tlantlin Lalrawngbawla lawmpuina hun hman an hmang nghal a. He hunah hian MPCC President Lal Thanzara chuan Sinlung Hills Council inthlan atang hian Congress an inlungrual in an inthurual a, nasa takin hma an sawn a ni tih a langchiang niin a sawi a. “Sinlung Hills Council inthlanah hian boruak kan han en a, kan chak theih mai dawn hi kan ti a, amaherawh chu a tir atangin hlauh kan nei a, a dawn zan velah sum leh pai a rawn leng anga, chu chu kan do zo lovang tih kan hlau a ni. Kan sawi ang ngeiin sum leh pai mai ni lovin khilai hmunah Petrol Pump an rawn hawng ta emaw tih mai turin party dang ten hma an la a ni. Chutih laiin kan Candidate te chuan sum leh pai hman tur an nei ve lo a ni,” tiin Congress paty chuan sum leh pai hmangin tlin tumin hma an la ve ngai lo niin a sawi bawk.

Kumin 2024 January thla atanga September thla thleng khan Mizoram-ah Dengue vei mi 437 hmuhchhuah an ni tawh a, Dengue vei zingah mi pakhat a boral bawk a ni.

Land Revenue and Settlement Minister B. Lalchhanzova chuan Mizoram-a Land Pass te chu Computer-ah dah vek an tum thu leh Land Pass 3,13,652 awm mek zinga 55,924 Digitalise anih tawh thu a sawi.

Chief Minister Lalduhoma chuan hnathawktu tha kan neih theih nan Department tinah Service Review Committee an dintir thu sawiin, Sawrkar hnathawk te chu Pawl leh kohhran lamah inhman dan tawk an thiam a that thu a sawi bawk.

Mizoram Synod-a Worship Committee hmalaknaa Kristian Hla Bu App siam chu Synod Moderator Rev. R. Vanlalnghaka chuan tunkar Nilaini khan a tlangzarh.

Mizoram Governor Dr. Hari Babu Kambhampati chuan Mizoram chu hmun ralmuang tak niin hmasawnna tehfung hrang hrangah te pawh titha thin viau mah ila, ruihhlo leh a kaihhnawih hrang hrangte'n thalai leh zirlaite nun thuk taka a luhchilh leh a chimbuai chu pawi a tih thu a sawi.

East Lungdar-a Panchayat Bhawan (VC House) sak thar chu nimin khan LAD changtu Secretary Teresy Vanlalhruaii chuan a hawng.

Horticulture Minister Prof. Lalnilawma chuan Kuthnathawktute tana hmalak chu sawrkar auhla a nih thu sawiin, theihtawp chhuah a kuthnathawktute tana tanlak zel an tum thu a sawi.

Mizoram sawrkar-a Home Department in thuchhuah siama an lo tarlan tawh angin Serchhip District-ah pawh Inner Line Permit (ILP) dilna chu Online a kalpui tawh tur a ni tih Serchhip District Bawrhsap Paul L. Khuma chuan thuchhuah siamin a tarlang a. ILP dilna pawh online Portal ilp.mizoram.gov.in atanga thehluh tawh tur niin Application hi sponsor-tu chauhin a thehlut tur a ni a, Portal-ah hian a in register tur niin Document pawimawh te hi Portal-ah upload vek tur a ni a. Hnamdang, Offline-a Temporary ILP pekchhuah te chu Temporary ILP hi upload tel tur a ni bawk ang. Application hi approve a nih hnuah diltu hian Mobile number submit-ah SMS in reference number a dawn anga, ILP Fee pawh online-a pek a nih hnuah reference number hmang hian ILP hi download theih niin Security deposit hi ILP surrender a nih hnuah chauh pek kir a ni bawk ang.

Serchhip District Bawrhsap chuan Halpuah leh halmawi chi hrang hrang bakah naupang silai lem a mu nei chi te Online hmanga chah te chu pechhuak lo turin Courier Service te a hriattir.

Nimin khan Serchhip District-a khaw pahnih ah African Swine Fever (ASF) vanga Vawk thi a awm leh a, hun engemaw chen Vawk thi awm tawh lohna Chhingchhip khua ah Vawk thi pakhat chhinchhiah thar leh niin Baktawng khua ah Vawk pakhat a thi leh bawk a ni. Baktawng khua ah hian nimin vek khan hri leng avangin Vawk pahnih suat leh a ni bawk. Heti hian kumin chhungin Serchhip District-ah ASF vanga Vawk thi 3484 awm tawhin Vawk 7036 suat a ni tawh bawk a ni.

IOCL in Revised Retail Selling Price a tihchhuah angin Mizoram-a eirawngbawlna Gas man tur chu tihchhuah thar niin Vairengte tihloh Mizoram khawpui dang zawngah chuan kg. 14.2-a rit Domestic Cylinder chu bur khat zelah Rs. 955 a ni anga, kg. 19-a rit Commercial Cylinder chu Rs. 2254.50 niin kg. 19-a rit XtraTeJ chu Rs. 2277 leh kg. 10-a rit Composit chu Rs. 688.50 a ni ang. Domestic Cylinder hi Home delivery-ah chuan Rs. 70/- aia tam lo belh tur a ni ang.

MZP Hqrs. Lunglei chuan Lunglei District chhunga Zirtirtu indaihlohna Education Minister hnena August thlaa an thlen tawh tun thlenga thuneitute lam atanga chhanna leh hmalakna awm lo chu hriatthiam a har an tih thu an sawi a. An District chhunga hrisel lohna vang ni lova Zirtirtu aikal la an awm leh awm loh zirchianga hmalak an tum thu pawh an sawi bawk.

Mizoram-a Tomato tharchhuak tam ber khua nia hriat Tualte khua chuan a hralhna ah harsatna an tawk mek tih an sawi a, harsatna an tawh chhan hi Mizoram hmun hrang hrangah Tomato tharchhuah a tam vang a ni deuh ber tih thudawnna chuan sawi bawkin, a hralhna kawngah Horticulture Department lam pawhin theihtawp an chhuahpui niin an sawi bawk.

Khawzawl Police te chuan nimin khan KVK Khawzawl Incinerator-ah ruihhlo an halral a, heng ruihhlo halral tak te hi Methamphetamine Kg.119.55 leh Heroin No.4 gram 244 te niin ruihhlo halral zawng zawng hi Rs. 15,60,42,000/- man nia chhut a ni.

Ni hnih chhung awh ‘Workshop on Leadership Development in the Elementary Schools’ chu nimin khan Aizawl-a School Education Complex Conference Hall-ah zawhfel a ni a, he hun hi Education Consultant Rev. Dr. K. Thanzauva, Special Secretary David Lalthantluanga leh Director Lalsangliana te chuan an hmanpui a ni. He Workshop-ah hian District hrang hranga School Education Department hnuaia District Education Officer te leh Sub-Divisional Education Officer-te telin nimin khan Team 8-ah an inthen a, Aizawl khawpui chhunga Elementary School 18 tlawhin School tlawh te hi an dinhmun an thlirpui a, an hmasawn dan te, tan lak an ngaihna te pawh Zirtirtute nen an sawi nghal a ni.

Mioram State Election Commissioner Dr. H. Lalthlangliana hovin nimin khan District hrang hranga Bawrhsap leh Election Officer ten Village Council leh Local Council Electoral Roll ennawn tur chungchang chu Video Conference hmangin an sawiho a. Nakum (2025) hi Village Council leh Local Council inthlan kum anih avangin inthlannaa hman theih tur Electoral Roll felfai tak siam nise an ti a, State Election Commission in Electoral Roll siamna atana ruahhmanna alo siam angin a hun taka Electoral Roll peihfel vek nise an ti a ni. State Election Commission-in Village Council leh Local Council Electoral Roll, 2025 siam tura a ruahhman dan chuan tun thla, November ni 22-ah Draft Electoral Roll tarchhuah a ni anga, siamthat ngai ang ang te siamthat a nih hnuah Final Electoral Roll chu nakum January ni 8 ah tlangzarh tur a ni ang. 

Champhai District Nasha Mukt Bharat Abhiyan Committee (NMBA) chu nimin khan Champhai DC Conference Hall-ah thukhawmin an hmalakna hrang hrang an thlirlet a, kum 2024-25 chhunga hmalakna tur Draft Action Plan chu an thlirho nghal bawk a ni. Nasha Mukt Bharat Abhiyan (Drug Free India Campaign) hi Ministry of Social Justice and Empowerment, Govt. of India hnuaiah August ni 15, 2020 khan hawn a ni a, India rama ruihhlo hluarna District 272-ah bul tan niin Mizoram-ah chuan Aizawl, Champhai leh Kolasib District ah te kalpui hmasak a ni a, he hmalakna hnuaiah hian Champhai District (Undivided) huamchhungah Drug Awarenss Campaign chu Middle School, High School, Higher Secondary leh College zirlaite hnenah neih a ni tawh a ni.

National Commission for Scheduled Tribes (NCST) Member Nirupam Chakma chuan NCST Full Commission in nakum January thla tawp lamah Mizoram an tlawh tum thu a sawi.

Mizoram Youth Commission Chairman Malsawmzuala Ralte chuan Japan-a hnathawk tura kohna hmu mi 34 zinga mipa pathum leh hmeichhe pali te hnenah Japan kalna tur VISA chu niminpiah khan a hlan.

Thirsakawr hmanga India ram fangchhuaktu Vanlallawmzuala Varte chuan hnamdangte zinga Mizoram hmelhriattir theihna hun a nei chu a lawmawm a tih thu a sawi.

Pachhunga University College (PUC), Aizawl chuan thingtlang khawchuam (adopt) an neih thin atan Sailam an thlang a, nimin khan a hawnna hun hmangin Higher & Technical Education Minister Dr. Vanlalthlana chuan khuallian niin a hmanpui a, he hmalakna hnuaiah hian PUC chuan 2024-2026 chhungin Sailam khua hi khalhin College Department hrang hrang ten an zirchiang ang a, kawng hrang hrangin an pui dawn bawk a ni. Sailam khua hi Aibawk RD Block, Aizawl District-a awm niin chhungkaw 179 an awm mek a, Mizo lal hmingthang Bengkhuaia khua thin a nih bakah a khuaa mite hian Sava humhalha, Bird Sanctuary an siam avangin hriat leh ngaihhlut a hlawh hle a ni. 

Mizo Zirlai Pawl (MZP) chuan Mizoram sawrkar in Tribal Scholarship tur a dawn tawh chu November 18, 2024 ralhma ngeia semchhuah an phut thu an sawi.

Chief Minister Lalduhoma chuan thlai hralhah harsatna a awm loh nan sum an inring reng tawh tih a sawi.

Serchhip Police te leh 42nd Assam Rifles te tawngkawp chuan nimin khan Serchhip-ah puakthei thil thahnem tak an man.

Serchhip DC Office-a thawktu Officer leh Staff te tan nimin khan ‘Soft Skills and Communication Training’ buatsaih a ni.

Serchhip District-ah nimin khan African Swine Fever (ASF) avanga Vawk thi leh Vawk suat chhinchhiah belh a awm lova, kumin chhunga Serchhip District-a ASF avanga Vawk thi chu 3482 niin Vawk 7034 a tling tawh bawk a ni. Serchhip District-ah hian kumin hian ASF avanga harsatna tawk chhungkua 2117 an awm tawh a, hri leng hian ziaawm lam a pan ve hret hret zel niin a lang. Mizoram pumah nimin khan ASF vang hian Vawk thi 34 lai a awm leh thung a, heng te hi Lunglei District-ah 23 bakah Khawzawl District-ah 9 leh Kolasib District-ah 2 te an ni a, Lunglei leh Kolasib District-ah Vawk 15 suat ni bawkin kumin a Mizoram-a khaw 253-a ASF vanga Vawk thi chu 14,479 a ni tawh a, Vawk 23,863 suat a ni tawh bawk a ni.

Mizoram-a a vawi khatna atan nizan hmasa khan District-Wise Tour Itinerary Creation Competition chu neih niin he intihsiakna ah hian Serchhip DC Office chuan lawmman pakhatna a dawng a ni.

Ni thum chhung awh tur 67th Commonwealth Parliamentary Conference chu nimin khan Sydney, Australia-ah-ah neih tan niin Mizoram Legislative Assembly Speaker Lalbiakzama chu Palai a nih angin a tel. He Conference-ah hian thupui atan ‘Engage, empower, sustain - charting the course for resilent democracy’ tih hman niin Speaker hian Workshop hrang hrang zinga pahnih ah chanvo pawimawh tak a chelh dawn a ni.

Nizan hmasa khan Champhai Electric Veng-a Lalhmunliani te In chu a kang a, bungrua engmah chuh hman a ni lo. Kangmei hi Tek tla in In a den atanga intan nia hriat a ni a, mihring thli leh hliam awm lovin Inchhung bungrua a kangchhe vek a, heng bakah hian an ranvulh te leh sumfai kangral vekin kangmei chhuak avanga kangchhia hi a vaiin cheng nuai 11 chuang hu nia chhut a ni.

Special Central Assistance Scheme hnuaia cheng vbc. 2.74 senga sak Mizoram Police DIG (Northern Range) Office Building thar chu nimin khan Aizawl Khatla-a PHQ Complex-ah DGP Mizoram Anil Shukla IPS chuan a hawng a, he building thar hi July 21, 2022-a sak tan niin a zawh hun tura ruahman, January 21, 2025 a thlen hma kumin October 21 khan sak zawh a ni. He Building hi Mizopa chhiara chhawng li (4) niin a hnuai ber (Ground Floor)-ah lirthei dahna siam a ni a, a dawt-ah MTO leh Driver’s Room awmin a chhawng chung lehah Crime Branch, Establishment leh Conference Hall bakah Police Computer Training Centre a awm a, a chhawng chung berah DIG (NR) Room bakah Personal Branch leh Sub-ordinate Officer te room a awm a. Mizoram Police te chuan sawrkar in Office Building tha tak a pek avanga an lawmthu thuchhuah siamin an tarlang bawk a ni.

Mizoram Agricultural Marketing Board buatsaihin Bana Kaih Sensitization cum Consultation Meeting on Thlai Thar Market chu nimin khan Aizawl-a I&PR Auditorium-ah buatsaih a ni a, he hun hi Chief Minister Lalduhoma pawhin a hmanpui a ni. Nimin-a he hun hman ah hian Agriculture Minister PC. Vanlalruata chuan Sawrkar in Mizoram Agricultural Market Assurance Fund Management Board tia a din, thlai thar leina lam buaipui tura kha a hming lam awlsam zawk nan Mizoram Agricultural Marketing Board (MAMB) tih a nih thu sawiin, an hmalakna hnuaiah District tinah thlai thar lei chungchang zirhona neiin Village Level-a inzirtirna an hmachhawp leh mek a nih thul eh Buyers - Sellers Meet pui tham tak pawh December thla tirah buatsaih an tum thu a sawi bawk. He hunah hian Adviser to CM (Handholding) Dr. KC Lalmalsawmzauva chuan Thlai Thar Market kalpui dan tur an ruahmannate chipchiar takin a sawifiah a, sawihona hun an hmang nghal bawk a ni.

Mizoram Pollution Control Board (MPCB) chuan Electric hmang bungraw hluihlawn tawh te duh duh dana thehthang chu sawrkar dan kalh a nih thu an sawi.

Mizoram Governor Dr. Hari Babu Kambhampati chuan khawvel sik leh sa inthlak danglam mek zel kara boruak thianghlim leh hrisel neih pawimawhna auchhuahpuia India ram State 28 leh Union Territory 5 te Thirsakawr hmanga tlawh chhuaktu Vanlallawmzuala Varte (Lz Varte), Mission Veng, Aizawl hmuahna leh lawmpuina hun chu nizan hmasa khan Raj Bhavan Banquet Hall-ah a buatsaih a, Governor hian a lawmpui zia lantir nan Momento leh Rs. 10,000/- a hlan a ni.

Ministry of Home Affairs chuan hnu chhui leh hna pawimawh thawh kawnga mithiam bik te chawimawina a pek thin, Kendriya Grihmantri Dakshata Padak, 2024 dawng turin Mizo pahnih H. Sangchungnunga leh Liansangpuii a thlang.

National Commission for Scheduled Tribe-a Member Nirupam Chakma chuan nimin khan Mamit tlawhin Mamit District chhunga Minority te a kawm bakah sawrkar hotute nen an inkawm bawk.

Environment, Forest & Climate Change Minister Lalthansanga’n Mizoram mawina leh nawmna bakah a ralmuanna te hnamdang te hriat theiha pholan tam a pawimawh tih a sawi. Hla phuahtute intawhkhawmpui nimin-a I&PR Conference Hall, Aizawl-a buatsaih a hmanpuina ah he thu hi sawiin EF&CC Minister Lalthansanga chuan Mizoram-ah thu leh hla lama tui mi an awm belh chu lawmawm a tih thu sawiin, hmasawnna a awm chho zel tih a sawi a, hlaphuah thiam te chu theihtawp chhuah tura chahin, Mizoram mawina leh hlutna phochhuak tam zel turin a chah bawk a ni. Nimin-a he hun hman hi MZI Song Writer’s Chairman Lalhmachhuana Zofa chuan kaihruaiin All India Radio Director leh Mizoram Cluster Head DR. Lalropuia pawhin a hmanpui a, hla inphuahsiak lawmman sem a ni a,zaithiam hrang hrang leh hlaphuahtute an kalkhawm a ni.

ICFAI University Convocation tum 12-na chu nimin khan neih niin Governor Dr. Hari Babu Kambhampati leh Chief Minister Lalduhoma te chuan he hun hi an hmanpui a ni.

MNF Party chuan nimin khan Aizawl-a Mizo Hnam Run-ah Sinlung Hills Council (SHC) Inthlanpui-a MNF in hnehna an chan avanga Pathian hnena lawmthu sawina hun an hmang a, he hunah hian MNF President Zoramthanga chuan, “HPC (R) nena kan thawhhona ah lawmthu sawi theia kan awm hi a lawmawm hle. Inthlan laia rim taka thawktute chungah lawmthu kan sawi,” a ti a. “MNF hi Pathian in min puihna avanga ding chhuak chho a ni a, kum 63-na ah pawh party lian tak niin kan la nung a ni. Vawi hnih khat inthlan hi Pathian ngaih pawimawh ber a ni lo. A changin min dah sang a, a changin min dah hniam thin a ni zawk,” a ti bawk.

Seat 12 awmna Sinlung Hills Council Inthlanpui neih zawh takah MNF leh an thawhpui HPC (R) te chuan sawrkar siam thei khawpin hnehna an chang a. New Vervek Bial-a Vote tla te chu sawiselna a awm avangin nimin tlai khan Aizawl-ah chhiar that leh niin ZPM Candidate chu tling-ah puan a ni.

DIET Serchhip chuan an Campus chu ‘Bird Friendly Campus’ a siam tura hmalakna hmasa atan nimin khan an Campus-a thingkung-ah Sava Bu siamsa pathum an dah a, DIET Campus-ah hian Sava tlan chi thing chi hrang hrang phunin heng te hi Sava ten an rawn tlan avangin Sava te an khawsak zui theihna turin heng Sava Bu te hi dahin, Chanmari Veng huamchhungah Sava veh lo turin mipuite chu an ngen bawk a ni.

Nimin khan Serchhip District-ah African Swine Fever (ASF) vanga Vawk thi pahnih awm lehin Baktawng khua leh Khawlailung khua ah pakhat ve ve an ni a, nimin vek khan Chhuanthar Tlangnuam-ah Vawk 5 suat leh niin Khawlailung-ah Vawk pakhat suat leh a ni bawk. Heti hian kumin chhunga Serchhip District-a ASF vanga Vawk thi chu 3482 an tling ta a, Vawk 7034 suat ni tawh bawk a ni.

National Highway-54 leihzauh hna thawha sawrkar in ram a lak tawh, mahni ram la chhuahsan lo te chu chhuak tura hriattir nawn leh an ni.

Mizoram Khawpui Fai inelna chu kumin ah neih leh tur niin hemi atana inelna hi thla hmasa, October, 2024 atang khan neih tan niin thla thar December thla khian endiktu tura ruat te chuan Mizoram khawpui hrang hrang fai dan a hmunah an enfiah leh dawn bawk a. Faina kawnga inelna neih mek hnuaiah hian Serchhip khawpui pawhin hma la mekin Swachhta Ranking chu buatsaih leh a ni a. He hmalakna hnuaiah hian Sawrkar Pisa hrang hrangte, Zirna In te, Hospital/Health care Facility, Market leh Hotel fai bakah Locality (Commercial Area) bakah VC Area fai a inelna neih leh a ni a. Heng ienlna hrang hranga endik hna hi tunlai hian kalpui mek a ni.

Salvation Army-a thalai pawl, Salvation Army Youth (SAY) Serchhip te chuan nimin khan Serchhip District Hospital Blood Bank-a dah turin thisen Unit 8 an pe a, thisen petute hi mipa 6 leh hmeichhia pahnih niin Serchhip Blood Bank-ah kalin thisen hi an pe a ni.

Sinlung Hills Council inthlanpui vawi 2-na chu nimin khan neih a ni a, he thu buatsaih lai thleng hian khawi atang mahin thil duhawm lo a thlen hriat a ni lo. Sinlung Hills Council inthlanna hi Bial 12-ah neih a ni a, he inthlanna ah hian Vote nei mi 23,789 awmin candidate mi 49 an awm a, he thu buatsaih lai hian Vote tlak dan kimchang la hriat theih loh mah se zaa 70 vel chu tla tura beisei a ni a, Mizoram State Election Commission Secretary K. Laldingliana chuan Sinlung Hills Council inthlan chu tluang taka neih zawh a nih tak thu a sawi a ni. He inthlanna a Vote tla te hi nizan khan chhiar nghal tura ruahman niin result pawh hriat nghalh theih tura beisei a ni.

Kolasib Fast Track Court chuan mahni u thattu a puh Lalthakima (34), Lungmuat khua chu thiamloh chantirin damchung lung In tang turin a chungthu a rel sak a. Thudawn danin Lalthakima s/o Chawnghlira hian Nov. 10, 2020 khan a u, Lalrammawia (53) chu a chhun mu lai hreipui-a chekin ka pawh chhawn lohin a thi a, Lalthakima hi man zui nghal a ni. Magistrate hma-a a inpuan danin Lalthakima hian a u nen an inhauh thu leh kut te a thlak thu a sawi a, hemi hnu hian a u mutna-a a va kal chu a u hian silaiin kah a lo tum niin a sawi a, a bul hnaia hreipui chuan a chek ta mai niin a sawi bawk a ni.