Lenkawl

 

 

Serchhip District Bawrhsap chuan nimin khan Serchhip District-a National Highway-54 laihzauh leh cheithat hna thawktu Contractor te nimin khan kokhawmin kumin chhunga an hmalakna an thlirlet.

Khawlailung Bunghmun Branch YMA chuan an Branch YMA Hall sakna-a Work Supervisor in sum a pek tur chu a pek mai loh avangin niminpiah khan mipui inkokhawmin an dilchhuak.

Serchhip khawpui chhung paltlang, Kikawn leh Sailiamkawn inkar National Highway-54 a leimin in kawngsir a hnawh te thenfai hna chu nimin khan thawh tan a ni.

Serchhip District-ah nimin khan African Swine Fever (ASF) hri leng avanga Vawk thi leh suat chhinchhiah belh a awm lo leh a, heti hian ni thum chhung chu Serchhip District-ah ASF vanga Vawk thi leh suat a awm belh tawh lo a ni.

Serchhip District Bawrhsap in halpuah leh halmawi khapna thupek a chhuah bawhzuina kal zelah Serchhip Police Station-a Office Incharge Insp. R. Lalbiakhlua chuan nimin khan Serchhip khawpui chhunga Courier service hrang hrangte a kawm a. Mipui ten Online hmanga an thil duh leh mamawh te an chah theih tawh laiin halpuah leh halmawi chi hrang hrangte hi sawrkar in a khap thil a nih avangin hetiang lo chah an awm a nih pawhin uluk taka lo en tur leh mipuite hnena pechhuak lo tura hmalak dan turte an sawiho a. He hunah hian Courier service lam pawhin theihtawp chhuaha hmnalak an tum thu an sawi bawk a ni.

Kan thlahtu tobul ka chhuichhuah dan-3 - Rev. Dr. Zaichhawna Hlawndo

Mizoram CSR Cell chu nimin khan an Chairman leh Adviser to Chief Minister TBC. Lalvenchhunga hova thukhawmin tun thla ni 13-14 a UNDP te nen Bangalore-a Stakeholder Consultation Meeting an buatsaih an thlirlet bakah hmalak zel dan tur an sawiho a, CSR bawhzui zel dan turte pawh an sawiho bawk.

All Mizoram Village Council Association chuan sawrkarin Village Council term a pawh tawi avanga High Court-a kal an tum chungchangah lehkha hrang hrang tihfel mek anih thu an sawi. AMVCA President K. Lalngaizuala chuan High Court-a kal an rel hnuah lehkha tihfel ngai te tifelin an bawhzui nghal char char tih sawiin, Case an file theih tep thu Akashvani Correspondent a hrilh a. VC dan zahawmna humhim zel a pawimawh tih sawiin, democracy palzutna leh zahlohna chu pawi an tih thu a sawi a. Nakina VC lo awm zel tur te tana kawngsialtu pawimawh tak nih an in beisei thu leh an dikna chanvo humhim tumin an bei zel dawn tih a sawi bawk.

Forest Minister Lalthansanga chuan nimin khan he Department changtu Union Minister Bhupender Yadav chu kawmin Aizawl Zoological Park tih changtlunna tura ruahmanna te a sawipui a, Solar Power bun leh Sahuan chhunga kum upate tan a hman theih tur E-Vehicle dah chungchang pawh he hunah hian sawiho a ni.

Champhai-a General Nursing & Midwifery (GNM) School chuan a tum khatna atan nimin khan Capping & Lamp Lighting Ceremony an hmang a, GNM Champhai-a 1st leh 2nd Batch zirlai 38 te lukhum khum tirin, khawnvar chhiin, thutiam an sawirual a ni. GNM Nursing School hi October ni 10, 2023 khan bul tan a ni.

Mizo Academy of Letters (MAL) in kum 60 a tlinna, Diamond Jubilee lawmna chu nimin khan Aizawl-a Synod Conference Centre-a Pi Zaii Hall-ah neih a ni a, Art & Culture Minister C. Lalsawivunga chuan khuallian niin a hmanpui a ni. MAL Diamond Jubilee lawmna hi chawhma lamah an President Prof. RL. Thanmawia chuan kaihruaiin MAL in kum 60 a tling ta chu a lawmpui thu leh MAL hnathawh hrang hrangte chhuanawm a tih thu a sawi a, Jubilee puala Lehkhabu leh lehkhabu dang mi 4 ziah te chu a tlangzarh nghal bawk. He hunah hian MAL chanchin thlirho niin chawhnu lamah thuziak mi te kawmna hun an hmang nghal bawk a ni.

Indian Medical Association (IMA), Mizo-ram Branch Annual Conference vawi 47-na chu nimin khan Aijal Club-ah neih niin Health Minister Lalrinpuii chuan khuallian niin a hmanpui a, Doctor mamawhna chu khawvel ram tinah a san em em thu sawiin, IMA Conference chu mipui rawng an bawlna kawngah hlawk thlak taka hmang turin a chah a. Doctor-te chu sawrkar pawhin a duhsak hle tih sawiin, rawngbawlna rilru an pu chu ropui a tih tak zet thu a sawi a, Mizoram chhunga Health Department-in mipui hriselna atana hma a lak dante pawh tarlangin, rampum chhut pawhin Mizoram chu mipuite hriselna kawnga hma la nasa ber a nih dante a tarlang bawk. IMA Mizoram Branch Conference hi an President Dr. Rosangluaia chuan kaihruaiin an hmalakna hrang hrangte tarlangin, an member boralta te sunna hun hman a ni bawk.

Mizoram Rajya Sabha MP K. Vanlalvena chuan Sihhmui-a Rel kawng siam meka Lei chim chu kum khat lai thawk chhunzawm lo-a chawlhsan a nih thu a sawi.

Chief Minister Lalduhoma chuan Zohnathlak zawng zawngte hming intawm turin 'Zo' tih chu thlan a lo nih tawh thu a sawi.

MNF Sr. Vice President Dr. R. Lalthangliana chuan Democracy ramah sum harsatna chhuanlama mipui thlan VC-te term pawh tawisak chu thil zahthlak tawpkhawk a nih thu sawiin, MPCC Sr. Vice President Lalnunmawia Chuaungo pawhin LAD Minister in VC term pawhtawi chhan a sawi chu chhuanlam tling a ni lo niin a sawi bawk.

 

 

Serchhip District-a Hualtu khua chuan an khaw kum 400 tlin lawmna leh Haw Runpui chu nimin khan neiin he hun hi Home Minister K. Sapdanga chuan khuallian niin a hmanpui a, bialtu MLA leh Agriculture Minister PC. Vanlalruata chuan khual zahawm niin a hmanpui bawk.

Inthlanpui-a Vote thlak a pawimawh zia in-zirtirna atan nimin khan Serchhip-ah ‘Inter-School Public Speaking Competition’ neih a ni.

Serchhip District-ah nimin khan African Swine Fever (ASF) vanga Vawk thi leh suat chhinchhiah belh a awm lo a, Serchhip District-ah ASF vanga Vawk thi leh suat hi la awm zeuh zeuh mah se tunah chuan hri leng hian ziaawm lam a pan zel rih niin a lang a ni. Serchhip District-ah hian kumin chhung hian ASF vanga Vawk thi 3524 awm tawhin Vawk 7055 suat a ni tawh bawk a, niminpiah lamah Vawk thi leh suat awm lo tawh bawkin ni hnih chhung Vawk chan chhinchhiah thar an awm lo a ni.

Mizoram Cooperative Apex Bank (MCAB) Branch 30-na tur New Colony Branch, Siaha chu nimin khan hawn a ni a, Siaha-ah hian kum 1986 khan MCAB Branch hi hawn niin tunah hian Branch dang hawn belh a ni leh ta a ni.

Mamit District MJA leh DIPRO te chuan nimin khan Haulawng-a Centre of Excellence for Fruits chu an tlawh a, COE for Fruits hi Indo-Israel Agriculture Project niin kum 2018 ah bul tan a ni a, thawktu mi 14 an awm mek a ni.

Mizoram Youth Commission (MYC) hmalakna a Project Bunyaad hnuaia Mizo thalai Food & Bevarage (F&B) Training chhuak mi 26 te chu nimin khan MYC Chairman Malsawmzuala Ralte chuan Certificate a hlan a, India ram a Hotel tha tak tak te chu Mizoram-ah kalin heng Training chhuak te atang hian thawktu an duh te thlangin an vai hian hnathawhna tur nei sa vek an ni.

The Mizoram Licencing & Regulation of Private Veterinary Hospitals & Clinics Act 2021 (No 3 of 2021) in a sawi angin Veterinary Hospital leh Clinics Licence Inspection Team-te chuan nimin khan Bualpui leh Kolasib-a Private Hospitals leh Clinic-te licence dilna chu a hmunah kalin an enfiah a, heng an enfiahna atang hian licence pek tlakte pek an ni dawn a ni. Licence dil hi Aizawl District-ah 10, Lunglei District-ah 4, Siaha District-ah 2 leh Kolasib District-ah 3 an awm a, Danin a sawi angin Veterinary Hospital leh Clinics hawng tur chuan Veterinary Doctor, Mizoram State Veterinary Council-a in register-te chauhin an enkawl tur a ni a; an hmanrua leh damdawite pawh danin a phal ang chin a ni ngei tur a ni. Dan awmsa zawm famkim lote chu licence pek theih an ni lo.

Sawrkar flagship program, Bana Kaih Scheme chu Mizoram mipui tam zawkin an hmel-hriat a, an zirchian theihna turin Information & Public Relations Department, Doordarshan Kendra (DDK), Aizawl leh All India Radio-te chu thawhho dan tur relin nimin khan I&PR Director C. Lal-nunkima Pisa-ah an thukhawm a, he hunah hian I&PR Department kaltlanga Bana Kaih Scheme Publicity & Documentation kalpui a nih dan te ngaihthlak niin Social Media platform hman tangkai a nih thu te tarlan a ni a. Bana Kaih Scheme chungchang mipui hnena sawt zawka thlen leh zirtir a nih theih nan DDK leh AIR-te nen a thawh-hona kalpui dan turte sawi a ni.

Thingdawl-a School of Nursing chuan nimin 6th Capping and Lamp lighting & 5th Graduation Ceremony an hmang a, Kolasib DC Robert C. Lalhmangaiha chuan a hmanpui a ni. Kumin hian he School atang hian mi 20 an Graduate a, an School hi BSc Nursing zirna atan tihlen tum mek niin tun dinhmunah thawktu mi 16 an awm a, kumtin Training mi 60 an awm thin a ni.

Mizoram sawrkar chuan Retailer ten buk dik a buhfai an pekchhuahna ah buara bag rihna paih loh chu chhuanlam ah an hmang tawh tur a ni lo tih a tarlang.

Foundation for Drug-Free Mizoram High Council 2024 chu nimin khan neih niin Excise & Narcotics Minister Lalnghinglova Hmar chuan khuallian niin a hmanpui a ni.

School Education Minister Dr. Vanlalthlana chuan Zirtirtu insem rual loh lutuk vanga zirlai khawngaihthlak tak tak a hmuh hnem thu a sawi.

Ministry of DoNER atanga sum hmuh cheng nuai 115 hmanga Sairang-a Tuilian avanga chhiat-tawk te tawmhimna tur, Safe House sak chu nimin khan DM&R Secretary K. Lalrinzuali chuan a hawng.

Commerce & Industries Minister F. Rodingliana chuan Mizoram Industrial Policy duan mek a nih thu sawiin, hetah hian sawrkar danga la awm ngai lo hamthatna tam tak a awm dawn tih a sawi.

Chief Minister Lalduhoma chuan sawrkarin kalphung tha nei turin kawng tam takah hma a la chho mek tih sawiin, Kalphung tha lo tam tak te vawilehkhat a siam that zung zung theihloh te pawh a awm a, mahse Sawrkar angin chak takin hmalak chhoh zel a nih thu a sawi.

Mizoram Chief Secretary thar Khilli Ram Meena chuan nimin khan a Pisa a luah tan a, Chief Secretary thar hi nimin khan Governor chuan Raj Bhavan-ah a kawm bawk a ni.

 

Serchhip District chhunga Hualtu khua a YMA in kum 50 a tlin lawmna chu nimin khan neih niin Serchhip District Bawrhsap Paul L. Khuma chuan khuallian niin he hun hi a hmanpui a ni.

Rural Development Department changtu Minister Prof. Lalnilawma chuan nimin khan East Lungdar-a Shyama Prasad Mukherji Rurban Mission (SPMRM) atanga sak Solar Cold Storage Facility chu hawngin Leng khua-a Solar Cold Storage Facility pawh a hawng nghal bawk.

Serchhip District Bawrhsap Paul L. Khuma chuan kum 2024 Krismas leh kumthar 2025 hlim tlang tak leh thlamuang taka kan hman tlan theih nan halpuah, halmawi leh silai lem mu nei chi khapna thupek a tichhuak a. Hemi chungchanga thuchhuah a siam thar ah Bawrhsap chuan Halpuah leh halmawite hian nasa takin mihring hriselna a tichhe thei a, boruak a tihchhiat leh tihbawlhhlawh mai bakah ri bengchheng a siam a, heng bakah hian silai lem a mu nei chite hian mihring piansualna a thlen tak fo bakah tul lova sum khawh-ralna a ni tih tarlangin, hei vang hian Section 163 of Bharatiya Nagarik Suraksha Sanhita, 2023 tlawhchhanin tun thla ni 25 khan he thupek hi a tichhuak a. Hemi chungchangah hian September thla khan thupek chhuah ni tawhin, hei hi a huamchin a tawp avangin a chhuah thar leh a ni.

Niminpiah lamah Serchhip District-a ASF vanga Vawk thi leh suat a awm hnuah nimin khan khaw hrang hrangah Vawk thi leh suat a awm belh lo thung a. Heti hian kumin chhungin Serchhip District-a khaw 31-ah Afruican Swine Fever (ASF) avang hian Vawk 3524 thi tawhin Vawk 7055 suat a ni tawh bawk a ni.

Serchhip District chung khaw hrang hrangah dan kalha kuhva phur lirthei an kal thin tih hriat a nih avangin Serchhip District Magistrate Paul L.Khuma chuan Section 163 of Bharatiya Nagarik Suraksha Sanita, 2023 tlawhchhanin tun thla ni 25 khan Serchhip District chhungah dan lova kuhva lakluh leh phurh khapna thupek a tichhuak a. He thupek hi thla hnih (2) chhung huam tura chhuah thar leh a ni.

Mizoram State Project Monitoring Committee chuan kumin November 1-a Eklavya Model Residential School, Tlangnuam an tlawh tuma an thil hmuh dan nimin khan an sawiho a, he School hi cheng vbc. 24 senga sak niin Tribal naupang 480 luh theihna tura ruahman a ni.

Kolasib District chhunga National Highway 306 leh 06 thawmthat hna thawh mek dinhmun chu nimin khan Kolasib-ah thlirho niin NHIDCL chuan Vairengte - Bilkhawthlir leh Kolasib - Kawnpui inkar kawng chu nakum March 2025 bawr ah Black Topping zawh hman an in beisei thu an sawi.

School Education Department buatsaih Mizoram Higher Secondary School Games vawi 21-na chu Aizawl-ah neih mek a ni a, item chi 9-ah inelna neih tura ruahman niin tunkar Zirtawpni thleng khian neih tura ruahman a ni a, zirlai sang khat chuang an tel a ni.

Mizoram sawrkar chuan Working Committee on Lengpui Airport chu a din thar leh a, hemi hmalam hian Working Committee hi dinin State sawrkar hnena Lengpui Airport enkawl zui zel dan tur chungchanga report a thehluh chu October 16, 2024-a Cabinet Meeting chuan a thuphungin a pawm a. Cabinet thutlukna bawhzui zel tur hian Working Committee chu din thar leh niin Indian Air Force (IAF) hnena Lengpui Airport hlan dan tur chungchang an zirchiang dawn a ni.

Hnahthial District Bawrhsap chuan thuchhuah siamin Mizoram sawrkar-a Land Revenue & Settlement Department in hriattirna a siam angin Cherhlun to Indo-Myanmar Border leh New Ngharchhip to Indo-Myanmar Border kawng chu laih (Construct) a nih dawn thu leh hemi kawng atan hian mimal ram lak (acquire) a ngai dawn tih a tarlang a. The Mizoram (Land Acquisition, Rehabilitation and Resettlement) Act, 2016 Section 12 in thuneihna a pek angin heng kawng atan hian December 3, 2024 atangin Survey/Assessment neih a nih dawn thu leh hemi huam-chhunga ram neituten an pass neih ang ang kengin Nov. 29, 2024 aia tlai lovah Deputy Commissioner Office Hnahthial ah an in report vek tur a nih thu a tarlang bawk.

Sawrkar laipui in Mizoram Chief Secretary tura a ruat Khilli Ram Meena IAS chuan nimin khan Mizoram rawn thlengin nimin vek khan Chief Minister Lalduhoma chu a Pisa-ah a hmu nghal a, Chief Minister chuan Chief Secretary thar tur chu lo lawmin thil pawimawh hrang hrang te an sawi dun nghal a ni. Tarlan tawh angin Mizoram Chief Secretary tura ruat Khilli Ram Meena hi Rajasthan mi niin kum 1967-a piang a ni a, zirna lamah MA (History) niin kum 1993 khan IAS-ah a tling a, AGMUT Cadre niin Ministry of Minority Affairs-a Addl. Secretary hna a chelh laiin Mizoram Chief Secretary tur hian ruat a ni.

Indian Oil Corporation Limited leh Fairfax India Charitable Foundation te chuan nimin khan thuchhuah intawm siamin Pradhan Mantri National Dialysis Program (PMNDP) hnuaiah Mizoram sawrkar nen tangrualin Mizoram hmun hrang hrangah Haemodialysis Machines 21 an bun dawn tih an tarlang a, he hmalakna hi Lawngtlai, Siaha, Mamit, Aizawl, Champai, Kolasib leh Lunglei-a chengte'n an chhawr tangkai dawn niin an tarlang.

Sawrkar laipui chuan hmeichhe naupang kumtling lova pasal nei tihtawpna tur Campaign, Bal Vivah Mukt Bharat chu nimin khan New Delhi-ah a hawng a. Women and Child Development Minister Annpurna Devi chuan he campaign hi hawng in ramchhung-a hmeichhe naupang kumtling lova pasal neih tirna hmun thenkhat ah uar taka kalpui a ni bik dawn tih a sawi bawk.

State Bank of India (SBI) chuan zirna sang zawk zir tura sum puk ngai zilaite tan Education Loan cheng nuai 482 chuang a pechhuak tawh tih an sawi.

Mizoram Cooperative Apex Bank (MCAB) Ltd. chuan State Co-operative Bank zinga titha ber 'Annual Performance Award For Best Performing State Cooperative Bank II-Tier Structure 2023-2024' dawngin he lawmman hi Union Home & Cooperation Minister Amit Shah hnen atangin an dawng a ni.

Aizawl Municipal Corporation (AMC), UD&PA Department leh Smart City hmalakna tangkawp Faina Hmathlir ‘Comprehensive Plan for Municipal Waste in Aizawl’ hnuaiah nimin khan bawlhhlawh paih motor (garbage truck) 20 te chu Smart City in AMC kutah an hlan.

KVK Khawzawl buatsaihin nimin khan Neihdawn khuaa Lungding tlang-ah Krishi Vigyan Kendra (KVK) kum 50-na, Krishi Swarna Samriddhi lawm nan Tomato Festival hman a ni a, Khawzawl DC K. Vanlalthiana chuan a hmanpui a ni.

Mizoram chhunga tan In hrang hrang ah lung In-a tang thei bithliah zat aia tam tang 514 an awm mek.

Boeing Foundation hotute leh Mizoram sawrkar aiawhte chu nimin khan Chief Minister Lalduh-oma kaihhruaia thukhawmin Mizoram-a Boeing Company CSR hman dan tur an sawiho.

Chief Minister Lalduhoma chuan nimin khan Indian Oil Corporation hotute kawmin Mizoram a Oil Depot din tura hmalakna chungchang a sawipui.

Home Minister K. Sapdanga chuan raltlan te a huho-a an awm lailawkna tur ruahman a ni dawn tih sawiin, Manipur buaina chu State dang a nih avangin an unau te thlavang hauh kawngah Official-a sawrkar in hma a lak a rem loh thu a sawi bawk.

Electoral Roll Special Summary Revision neih meka Serchhip District tana Observer Zodingpuii chuan Mizoram-ah ramdang mi rawn lut an tam avangin ramri hnaih khua ah te Electoral Roll ennawn chu fimkhur a tul thu a sawi.

Sawrkar laipui Ministry of Social Justice and Empowerment hmalakna Prime Minister Dharti AAba Janjatiya Gram Utkarsh Abhiyan (PM-DAJGUA) chu Mizoram-ah kalpui a nih dawn avangin he Scheme chungchanga a inrawnkhawmna chu nimin khan Serchhip-ah neih a ni.

Zoram Drivers’ Union (ZDU) buatsaih Fim-khurna Hapta (Road Safety Week) vawi 43-na chu nimin khan hman tan leh niin Serchhip-ah pawh he Hapta hi hman mek a ni.

Kumin October 24-a YMA Rorel Inkhawm vawi 4-na neih in ‘YMA Inkhawmpui Lian neih loh kumah Sub-Hqrs. YMA Inkhawmpui neih ni rawh se’ tih a lo rel tawh bawhzuiin kum 2025 a Sub-Hqrs. YMA Inkhawmpui nei tur zawng zawngte chu Inkhawmpui nei lova Rorel Inkhawm nei turin Central YMA chuan a hriattir a. Hemi kaihhnawih ah hian Sub-Hqrs. YMA hruaitute term pawh kum khat (1) atan, Sub-Hqrs. YMA Inkhawmpui neih leh hun thleng atan a pawtsei bawk. Hei bakah hian Sub-Hqrs. YMA hnuaia Group Rorel Inkhawm leh Inkhawmpui hun rel fel ngai a awm a nih chuan Sub-Hqrs. in a relfel mai tura tih a nih thu Central YMA chuan an sawi bawk.

Serchhip District-ah African Swine Fever (ASF) avanga ni hnih chhung Vawk thi leh suat a awm loh hnuah nimin khan Baktawng khua ah ASF vang hian Vawk pahnih a thi leh a, Chhuan-thar Tlangnuam-ah vawk pahnih bawk suat leh a ni bawk. Heng te nen hian kumin chhung hian Serchhip District-ah ASF vanga Vawk thi 3524 awm tawhin Vawk 7055 suat a ni tawh bawk a. Chhungkaw 2125 ten ASF avang hian har-satna an tawk tawh bawk a ni. Nimin-a ASF vanga Vawk thi awmna Baktawng khua ah hian ASF avangin kumin hian Vawk 260 a thi tawh a, Chhuanthar Tlangnuam-ah hian Vawk 139 thi tawhin Vawk 734 suat a ni tawh bawk a ni.

Hmeichhe naupang venhim leh zirtir chungchang inhrilhhriatna chu nimin khan Aizawl-a School Education Conference Hall-ah neih a ni a, he hun hi School Education Minister Dr. Vanlalthlana chuan hmanpuiin Dec. ni 10 thlenga hman tur, '16 Days Awareness Campaign for Eliminating Gender- based Violence' chu a hawng nghal bawk.

Mizoram Merchant Association (MIMA) General Hqrs. chuan Kristian-te hunpui, Krismas kan lo thleng leh dawn ta tih sawiin, he hun hi hlim leh hahdam, nuam taka mitinin kan hman theih nan hal chi - puakthei thil chi hrang hrang leh halmawi ang chi te la luta zuar lo turin sumdawngte an ngen tih an sawi.

Mizoram Police CID Special Branch te chuan nimin zing dar 1:00 vel khan Aizawl Thuampui a Cheuva Tlang-ah Heroin nia hriat Hawng 664 zet an man a, hemi kaihhnawih ah hian mi pathum man an ni bawk. Heng ruihhlo te hi ‘V Sikret’ bawm 984 leh ‘Win Sikret’ bawm 955 kara thuhruk niin Bolero Motor pahnih hmangin Champhai Tlangsam atangin rawn phurh a ni a, a vai hian kg. 8.058 niin Rs. 2,41,74,000/- man a ni a, Mizo-ram-a tum khata Heroin man tam ber a ni.

Mizoram sawrkar in Thlai thar lei tura hma a lakna kal mekah nimin khan Aizawl-a Irrigation & Water Resources Department Auditorium-ah ‘Sensitization cum Consultation Meeting on Thlai thar Market’ buatsaih a ni a, he hunah hian Mizo-ram Agricultural Marketing Board Member te bakah Mizoram District hrang hrang atanga thlai thar lei tum, Buyer/Commission Agent an tel a ni. He hunah hian Sawhthing, Hmunphiah, Aieng leh Hmarchate lei leh hralh chungchanga Bana Kaih Scheme hnuaia ‘Price Support’ kalpui dan tur zirho niin Sawrkar hriatpui ‘Auction Centre’ atanga thlai thar hralhte chauh chu ‘Support Price’ pek tur a nih thu sawilan a ni bawk.

Mizoram sawrkar Information & Public Relations Department bultuma Sikkim Press Tour a kal turte chu nimin khan Aizawl atangin I&PR Minister Dr. Vanlalthlana chuan a vailiam a, he Press Tour-ah hian MJA atangin Vice President C. Lalhmachhuana hovin member dang 9, an vaiin mi 10 kalin I&PR Department atangin mi pahnih an kal bawk a ni. Press Tour-a kal turte vailiamtu I&PR Minister chuan thil zirchhuah neih pawimawhna sawiin, zirchianna nena hun hmang turin a chah a. Anni neih, kan neih si lohte, kan ram tana tangkai tur leh tha tur rawn hmukchhuak tura chahin, Sawrkar leh ram mipuite tana hma-sawnna tur rawn puakchhuah tum turin a chah bawk a ni.

Nimin November 26,2 024 kha India ram Danpui pawm ni champha, Indian Constitution Day vawi 75-na a ni a, he ni pual hian Prime Minister Narendra Modi chuan ram mipuite chibai a buk a ni. Kum 1949 November ni 26 khan Constituent Assembly of India chuan India Danpui chu pawmin, a kum leh kum 1950 January ni 26 atangin a taka hman tan a ni a. India Danpui in kum 75 a tlin lawmna hi kum khat chhung neih tura ruahman a ni.

Mizoram State Commission for Protection of Child Rights (MSCPCR) leh Social Welfare, Tribal Affairs & Women and Child Development (SW, TA & WCD) Department te, School Education Department leh Samagra Shiksha Mizoram hotute chuan nimin khan Aizawl-ah Consultation Meeting an nei.

Lawngtlai District chhung Bungtlang - Ngeng-puitlang - Tuithumhnar kawng laih tur chungchang sawihona chu niminpiah khan District Bawrhsap Cheemala Siva Gooal Reddy IAS hovin DC Conference Hall-ah neih a ni a, he hunah hian Lawngtlai DC chuan inkalpawhna kawngpui tha zawk siam a nih chuan a chhawrtu tur ber chu he kawngin a paltlang khuate an ni tih a sawia. Kawngpui laih turah harsatna siam awm lo a a hma lama hna thawh tan chu thil pawimawh tak a nih thu a sawi a. He kawngin a paltlang khuaa Village Council (VC) leh NGO-te chu thil tha an neih turah thahnem ngai taka sawrkar leh kawng siamtute thawhpui thiam turin a chah a. Hnathawh tan a nih hunah pawh uluk taka lo enpui tur leh kawngpui tha tak siam a nih theih nana theihtawp lo chhuah turin a sawm nghal bawk a ni.

Ashraya Hastha Trust, Bengaluru, Karnataka ten Civil Hospital, Aizawl-a Thisen thliar hranna khawl, Apheresis Machine an pek chu nimin khan inhlanna hun buatsaih a ni.

Chief Minister Lalduhoma chuan Sawrkar hnathawk, chhawr tlak si loh an kawl te chu dan ang taka chhuahtir mai tha an tih thu a sawi.

Local Administration Department (LAD) changtu Minister C. Lalsawivunga’n Mizoram Village Council inthlan sawn hma a nih chhan chu State sawrkar sum lama a pachhiat vang a nih thu a sawi a. Hetihlai hian All Mizoram Village Council Association te chuan High Court-ah kal an rel thung a ni.

Hleilenna tuar hmeichhiate leh hmeichhe baihvai te chawmdawlna In (Gender Resource Centre) tur chu nimin chawhnu dar 2:00 khan East Lungdar-ah hawn a ni.

Nimin November 25, 2024 kha ‘International Day For Elimination of Violence Against Women’ a ni a, he ni hi khawvel pumah hmeichhiate himna chungchang inzirtirna atan hman thin a nih angin Serchhip District-ah pawh he ni pual hian hun hman a ni.

Odisha khawpui Bhubaneswar MPIS Niladri Vihar-a khelh Yonex-Sunrise 47th Junior National Badminton Championship 2024-ah Mi-zoram aiawha kal Lalrempuii d/o Albert Lalrosanga (L), Ramthlun Veng Serchhip leh a kawppui Tanoo Chandra-te chu Girl's Doubles Category-ah nimin khan an Champion a, Final-ah hian an khingpui Seeded No. 3, Durga Isha Kandrapu leh Taarini Suri-te tangdun chu 23-21, 21-15 in an hneh a ni. Lalrempuii Mizo hmeichhe zingah National Sub-Junior, Junior leh Senior Level Tournament-a Semi Final leh Final lut thei hmasa ber a ni a, Champion thei hmasa ber a ni bawk.

Cricket Association of Mizoram (CAM) buatsaih President’s Cup khelh mekah Serchhip District Cricket Association chu Quarter Final thleng zo lovin an tla ta a, nimin khan Chhinga Veng CC lakah Wicket 8 in an tlawm a ni. Suaka Cricket Ground, Sihhmui-a nimin-a Round of 16 inkhel Toss-a chak Serchhip DCA hian vuak hmasak thlangin Overs 17.4 ah Wicket hloh vekin run 64 chauh an siam thei a, Team tha zawka ngaih leh 1st Division Club Chhinga Veng CC tan Target hlauhawm a ni phak lo a, Overs 14.2 ah Wicket pahnih chauh hlohin an target hi an umphak ta reng a, Wicket 8 in hnehna an chang ta a ni.

Serchhip District Bawrhsap chuan thuchhuah siamin Mizoram Sawrkar Flagship Programme, The Mizoram Bana Kaih (Handholding) Scheme hnuaia Thlai thar lei leh hralh mumal zawka kalpui a nih theih nan heng thlai 4 (pali) - Sawhthing, Aieng, hmarcha leh Hmunphiah leitu/Commission Agent-te chu District Agriculture Marketing Committee (DAMC), DC Office-ah November ni 25, 2024 thlenga in register turin a ti a. Hemi hun chhunga DC Office-a in report-a in register hman lo te tan Google Form siamsa- https://forms.gle/qB28PXayQR5qtbL66-ah hian in register theih a ni bawk ang.

Manipur State chhung buaina avanga Churachandpur leh a chhehvela Food Corporation of India (FCI) Aizawl Divisional Office in buhfai a thawn thin chu tluang taka la kalpui zel a ni.

State Board of Wildlife chuan Ramsa in ranvulh a tihhlum sak te hnena zangnadawmna a pek thin chu tunhnai khan a tisang a. Hetianga zangnadawmna pek thin tihsan a ni hi ranvultuten an tangkaipui a beisei thu AH&Vety Department Director R. Zothanmawii chuan a sawi.

Mizoram University (MZU) chuan India in ramdang nena insum-dawnna a kalpui dan sawihona Seminar chu nimin khan an buatsaih a, he hun hi I&PR Minister Dr. Vanlalthlana chuan khuallian niin a hmanpui a ni. Ni hnih awh tur National Seminar on ‘India’s Foreign Policy: Coping with the changing World’ hawnna ah hian I&PR Minister chuan Policy pawimawh duang tur leh policy a hlawhtlin theihna atan zirchianna neih hmasak a pawimawh tih a sawi a. Ram pawn lam nena thawhhona atana kan policy - Foreign policy kan tih mai hi Tualchhunga Policy kan neih dan nen nghet takin a inkungkaih avangin Tualchhung lam hi Foreign Policy mumal nei tur chuan kan inchinfel hmasak a ngai thin tih a sawi a. “Research base zela kal hian policy duan pawh a tha duh a, hei hi research scholar leh academician ten kan hriat a pawimawh,” a ti bawk. He Seminar-ah hian Mumbai-a Ambassador Rajiv Bhatia chu khual zahawm niin mithiam sawm bik hrang hrang ten Seminar neih chhung hian thu an sawi dawn a ni.

Aizawl District Cooperation Development Committee (DCDC) chu nimin khan an Chairman leh Aizawl DC Er.Lalhriatpuia hovin DC Conference Hall-ah an thukhawm a, MPACS hmanga Aizawl District chhunga kuthnathawktute tan hmasawnna leh changkanna thlensak tum turin he huna kalkhawmte chu a chah a ni. He thutkhawm ah hian Primary Agricultural Credit Society (PACS) Computerize dan tur chungchang te, PACS Model Bye-law hman dan tur chungchang te, Aizawl District a MPACS-Dairy/Fishery din chung-chang te, PACS in Pradhan Mantri Kisan Samman Kendra (PMKSK) a hman tangkai dan tur leh National Cooperation Databas kalpui dan tur chungchang te relin, Joint Working Action Committee (JAC) thurel bawhzui dan te sawiho a ni.

National Health Mission Director, Dr. Eric Zomawia leh Fairfax India Charitable Foundation bakah Indian Oil Corporation hotute chuan nimin khan thawhhona thuthlung an ziak a. He thuthlungah hian Mizoram Health Department chuan cheng vbc. 1.48 man Hemodialysis khawl 21 chu a dawng dawn a ni.

Senior Club Mizoram Inkhawmpui Lian, High Council chu nimin khan Ailawng-a Er. C. Lallung-hnema huan-ah neih a ni a, EF&CC Minister Lalthansanga chuan hmanpuiin kum upa te chu kum chawhnu lam hmang an nih angin ngaih-tuahna hahdam hmang tam se a duh thu leh thalaite chuan tun aiin nu leh pa, pi leh pu te duat kawng ah tan la se a duh thu a sawi bawk. Senior Club Mizoram hian kumin-a an angin Old Age Home, New Serchhip-ah chawlhbuk sain December 14 khian an hawng ang.

Electoral Roll Special Summary Revision neih meka Mamit District tana Observer Dr. Lalrozama IAS chuan nimin khan Mamit tlawhin DC Office-a Taitesena Buk-ah Electoral Roll Revision neih mek chungchang an sawiho a. He hunah hian Electoral Roll-a hming thun thar, paih leh siamthat ngai dilna lut te thlirho niin Electoral Roll a chuang tur dik tak te'n an hriat duh leh mamawhte officials-te hnenah atangin an hre tha em tih te chu ECI-in a ngaihpawimawh thu a sawi a. Roll Revision neih chhungin India khua leh tui dik tak, Rolls a chuang tur ngei te'n an luh ngei theih nana ngaihven turin a chah bawk.

Chief Minister Lalduhoma’n Mizorama NCC hmasawn zel chuan Mizo thalai tam tak Armed Forces ah awlsam zawkin Officer-ah an luh theih phah tih a sawi. National Cadet Corps Day vawi 76-na puala Social Media kaltlanga NCC Cadet leh a thawktute chibai a bukna ah Chief Minister chuan, Mizoram-ah NCC chuan hma a sawn zel a, thalai tam tak sipai Officer an nih theihna chu a hlu tih a sawi a, heng bakah sawrkar leh mipui vantlang tan thil tha tam tak an ti thin thu sawiin, zirna In hrang hranga NCC din belh zel mamawhna a pung zel tih a sawi a, hemi phuhru thei tur hian Ministry of Defence chuan NCC Cadet awmsa nuai 17 atangin nuai 20-ah a tipung chho mek a ti bawk.

Mizoram sawrkarin Village Council term a pawhtawi chu PC Party chuan an duh loh thu leh sut leh nise an duh thu an sawi.

Mizo Academy of Letters (MAL)-in kum 60 an tlin lawmna (Diamond Jubilee) puala ‘Pho Chhuah Runpui’ an buatsaih chu nimin khan Aizawl Vanapa Hall-ah MAL Donor Member, Prof. Laltluangliana Khiangte chuan a hawng.

Mizoram State Project Monitoring Committee (MSPMC) chuan Durtlang Leitan atanga Sihphir kawng siam mek chu Zirtawpni khan Vice Chairman R. Lalrinawma hova enfiahin tha taka zawhfel thuai a nih theih nan Sawrkar, Contractor leh khawtlang hruaitute thukhat vuaa tan ho a tul thu an sawi.

Kumin chhunga African Swine Fever (ASF) avanga Serchhip District-a Vawk thi leh suat chu 10,577 a tling tawh.

Zirtawpni zan atanga Mizoram Baptist Kohhran hnuaia Area Baptist Council (ABC) Rorel leh Inkhawmpui neih chu nizan khan a tiak ta a, nimin khan ABC hrang hrangah Kohhran Upa Nemngheh inkhawm hman niin BCM pumpuiah Kohhran Upa atan mi 181 nemngheh an ni a, heng te hi Pastor Bial hrang hrang 69 atanga exam paltlangte an ni a, Serchhip ABC-ah Upa 9 nemngheh an ni. ABC Inkhawmpui hi hmun hrang hrang 17-ah neih a ni.

Serchhip Photographers’ Association (SPA) chuan Inrinni khan kum 2025 chhunga an pawl hruaitu tur thlanna neiin President-ah Zoram-thanga Ralte (Hmar Veng); Vice President-ah F. Lalengkima (AOC Veng); Secretary-ah Vanlalhruaizela (Zion Veng); Asst. Secretary-ah Lalthianghlima (Vengchung); Treasurer-ah Eliasianmawia (Bazar Veng) leh Fin. Secretary-ah Zothanpari (AOC Veng) te thlan an ni.

United Pentecostal Church (UPC) North East India Serchhip Dinthar Kohhran Biak In sak thar chu Inrinni khan Aizawl East District-a Superintendent Rev. R. Laltlankima chuan a hawng a, he Biak In hawn tak hi a dung ft. 63 leh a vang ft. 31 a zau niin kawngpui an turin chhawng 6-a sanga sak a ni a, a sakna atan hian cheng nuai 92 chuang sen niin hnatlang tha 2700 chuang sen a ni a, Biak In thar lawmna Inkhawm hi nizan thleng khan neih zui a ni.

Tun thla ni 16 atanga chin hriat loha bo Lalbiakzova (40), Keitum khua chu Inrinni khan a ruang hmuh a ni. Tarlan tawh angin Keitum Kawn Veng-a cheng Lalbiakzova hi tun thla ni 16 khan Serchhip Mat Phai-a an Thlam atanga a chhuak chu chi hriatloh in a bo zui a, Khawtlang huapa ni 7 an zawnna, Inrinni khan Serchhip Mat Phai, Saphai lui hnar lamah a ruang hi hmuh a ni a, Inrinni vek khan a ruang hi an khua ah lain vuiliam nghal a ni. Lalbiakzova ruang an hmuhna hi a bona atangin KM 2 vela hla nia rin a ni.

Food, Civil Supplies & Consumer Affairs (FCS&CA) Department chuan Mizoram-a raltlan awm mek mi 40,000 chuang hnena a thlawna sem tur buhfai chu District hrang hrangah an phur thleng kim tawh a, heng te hi District hrang hranga thuneitute kaihhruaina hnuaiah semchhuah tur a ni ang.

Mizoram Rajya Sabha MP K. Vanlalvena chuan Manipur buaina sosang zelah Chief Minister thlak mai a tawk tawh lova, President’s Rule puan a ngai tih a sawi.

Mizoram sawrkarin an term ralhmaa Village Council te inthlang tura a tih vangin VC te an lungawi lo hle a, a tul chuan dan hre mite rawnin High Court thleng an kal mai thei.

Young Bru Association chuan a vawi khatna atan Inrinni khan Aizawl-a Hyve Centre-ah Aizawl Bru Meet an hmang a, he hun hi Hachhak Bialtu MLA Robert Romawia Royte chuan hmanpuiin YBA members te chu mahni inrintawkna neia taima leh rinawm taka an hmazawna mawhphurhna te hlen thin turin a chah a. Mizorama pawl hrang leh Sawrkar pawh thawhpui thiam turin a chah a ni. Hachhek Bialtu MLA hian hemi ni vek hian Tuidam Welfare ten an kum 10 tlin an lawmna hun chu D&E Picnic Spot-ah a hmanpui bawk.

Tun thla ni 19 atanga Inrinni, Nov. 23 thleng khan National Health Mission (NHM) Mizoram chuan Common Review Mission (CRM) 16-na a hmachhawn.

Mamit District chhunga Zamuang khaw daiah Methamphetamine ni ngeia hriata kg 13 zet chu Mamit District Police (Mamit DEF) leh Narcotic Control Bureau (NCB) tangkawp ten an man. Mamit DEF leh NCB te chuan Zirtawpni khan Joint Operation neiin Methamphetamine (yaba tablet) nia ngeia hriat pack 13, Rs. 169,00,000 hu chu Zamuang khaw bulah Ford Figo motor atangin an man a; Heng ruihhlo phurtu mi 3; Malsawmdinga (33) Khawpuichhip, Falam, Myanmar; Lalhmunsiama (27) Bawngkawn Brigade Veng, Aizawl leh Vanlalenga (21), Bawng-kawn Brigade Veng, Aizawl ni a inchhal te chu man nghal niin heng ruihhlo man te hi Kanhmun kaltlanga Tripura lama kalpui tum a nih thu dawn a ni.

Zo Re-Unification Organisation (ZORO) buatsaiha Zofate inrawnkhawmna hunah Zofate (Chin-Kuki-Mizo) insuihkhawmleh nan hmalak zel nise tih a ni.

Champhai District chhung Mualkawi khua Lalthantluanga te chenna In chu Inrinni khan bungrua engmah chuh hman lohin a kangral. Thudawn danin Champhai atanga KM 13 vela hla Mualkawi khuaa Lalthantluanga te In hi In neitute awmloh hlanin a kang a, kangmei a chhuak tih an thenawm ten an hriat chuan a lo nasa tawh hle a, chhun reh lai a nih avang leh an awmna hi Veng hmawr lam a nih avangin an thelh thei ta lo a ni. He In hi Pucca Building niin kangmei chhuak ah hian Inchhung bungrua zawng zawng a kangral vek a, vanneihthlak takin mihring thi leh hliam erawh an awm lo thung a ni.

Bharat Scouts & Guides North East Mini Jamboree vawi 8-na chu State Training Center, Tanhril-ah neih niin Inrinni khan Chief Minister Lalduhoma chuan a hawng.

Inrinni zan dar 8:30 vel khan Aizawl Dinthar Veng-a cheng David R. Lalduhawma (28) chu an chenna In-ah Ulhbun silai a kahhlum a ni. Hemi chungchanga Police te sawi danin David R. Lalduhawma hi a pa, Ralthuamliana (48) in a kaphlum nia hriat a ni a, hei vang hian Ralthuamliana lakah hian Aizawl Police Station-ah thubuai ziaklutin Police-in an man tawh bawk a, thil thlen dan chhui zui mek a ni. Ralthuamliana te hi Ebenezer Medical Center bul lawka awm an ni a, a fapa nen hian an inhnial a, hei vang hian Ulhbun Silai hian a kap ta niin an sawi a, David R. Lalduhawma hi thi nghal mai lovin damdawi In panpui a ni a, damdawi In thlenpui a nih hnu lawkah a boral zui ta nia sawi a ni. David R. Lalduhawma hian a nupui leh fa pahnih kalsanin nimin khan vuiliam a ni.

Home Minister K. Sapdanga chuan Jail chu mihring nun siamthatna hmun tak taka chhuah turin taima taka an enkawlte vil turin Jail-a thawktute a chah.

Mizoram Presbyterian Church hnuaia Synod Social Front in zirchianna an neihah Mizo mipate thihna thlentu tam ber chu zu a ni tih an hmuchhuak.

Inrinni kalta November 16, 2024 zing khawvar hma-a Serchhip Zawlpui Phai atanga chin hriat loha bo Lalbiakzova chu Vawiin hian khawtlang huapa zawn leh a ni dawn.

Mizoram-a Village Council Inthlanpui vawi 21-na chu kumthar tir mai-ah neih a ni dawn niin a lang a, he Inthlanpui neih tur inbuatsaihna pakhat atan nimin khan District hrang hrangah Electoral Roll ennawn hna thawh tan niin Serchhip-ah pawh Bawrhsap in Draft Electoral Roll a tlangzarh a ni.

Catholic Kohhran Central Zone-II Naupang Sunday School Inkhawmpui 2024 chu nizan atang khan Our Lady of Assumption Church, Serchhip P&E Veng-ah neih a ni a, he Inkhawmpui hian Serchhip, Khawlailung leh Lunglei Parish te huamin thupui atan ‘Isua naupangte thian’ tih chu hman a ni. Nizan khan Mikhual lawmna hun hmangin Vawiin atang hian Inkhawm chi hrang hrang neih a ni dawn a, naktuk Pathianni hi ‘Krista Lalber Kut Ni’ a nih avangin Serchhip Bazar atanga Biak In thlengin Eukaristic Prosession (Sacrament nena kawngzawh) neih a ni bawk ang.

Baptist Church of Mizoram (BCM) Kohhran a Rorelna sang ber dawttu, Area Baptist Council (ABC) Inkhawmpui chu nizan atang khan hmun hrang hrangah neih niin Serchhip Area Baptist Council Inkhawmpui pawh BCM Biak In, Khuanghlum, Pangzawl Bial-ah neih mek a ni.

United Pentecostal Church (UPC) North East India Serchhip Dinthar Kohhran Biak In sak thar chu Vawiin Nov. 23, 2024 hian Aizawl East District-a Superintendent Rev. R. Laltlankima chuan a hawng dawn.

Serchhip District-ah Arican Swine Fever (ASF) vanga Vawk thi la awm belh zelin nimin khan Baktawng khua ah ASF vang hian Vawk pahnih a thi leh a, khaw dang-ah Vawk thi leh suat a awm belh lo thung a ni. Baktawng khua ah hian ASF vang hian Vawk 258 thi tawhin 454 suat a ni tawh bawk a, kumin chhung hian Serchhip District-ah ASF vanga Vawk thi chu 3522 tling tawhin Vawk 7054 suat a ni tawh bawk a ni.

Information & Public Relation Department in kum 2025 atana ‘Mizoram Calendar’ a siam chu karleh Thawhtanni, Nov. 26, 2024 atang khian zawrhchhuah tan a ni dawn a, Aizawl-a Directorate of Information & Public Relations leh District tina DIPRO's Office-ah te zing dar 10:30 atanga tlai dar 4:00 thlengin lei theih a ni dawn a, pakhat Rs. 70/- man a ni ang.

United Penticostal Church of Mizoram-in ruihhlo ngaite puala Apostolic Theological Institute, Durtlang-a Camping an buatsaih chu nimin khan Excise and Narcotics Department changtu Minister Lalnghinglova Hmar chuan a tlawh a, he hmuna lo kal tawhte chu beidawng loa ruihhlo sim duh tak takna thinlung nen Camp chhuahsan turin a chah a. “Ruihhlo bawih ata talchhuak turin Pathian tanpuina a ngai a, chumi bakah chuan mihring in tih ve tur a nei,” tiin sual sim duh tak takna a pawimawh thu a sawi bawk. Ruihhlo ngaite chhanchhuahna Camping-ah hian Rev K. Lalawm-puia, Lawngtlai chu Speaker niin, Veng leh khaw 30 atangin Camper 52 an lut a ni.

Lawngtlai DC Office bultuma 'Citizen Care- Grievance Redressal Day' (Khua leh tui te Ngaihsak-Harsatna Chinfel Ni) hman thin chu a tum lina atan nimn khan Sangau khua ah hman leh a ni a, he hunah hian sawrkar Department 15 te chu mipuite dawr theih turin dawhkan hrang hrangah an inphochhuak a ni. 'Khua leh tuite Ngaihsak-Harsatna Chinfel Ni' hman thin hi mipui ten an hlutin Sangau khuaa neih pawh hi an hlut hle a, Lawngtlai-a kal kher ngai lo a sawrkar Official-ten an kal chilh chu thinlung taka an lawmthu mipuite chuan an sawi a. Lawngtlai DC Cheemala Siva Gopal Reddy leh sawrkar mi pawimawh dangte pawhin an hmanpui a ni.

Mizoram Youth Commission (MYC) leh Honda India Foundation-te tangkawpin Project Buniyaad Hotel Management (Food & Beverages) Training an buatsaiha Training chhuak mi 26 te chu State pawn lama hna thawk turin nimin khan thlahliam an ni a, heng te hi mipa 9 leh hmeichhia 17 an ni. Project Buniyaad Hotel Management (Food & Beverages) Training hi Chief Minister Lalduhoma chuan September 18, 2024 khan MYC Auditorium-ah hawngin tun tuma Training chhuak te hi Fairmont (Udaipur) Choki Dhani (Jaipur, Jaisalmer, Indore) Orange Tiger (Goa) Sarvar Hotel (Hyderabad) leh Status Club (Kanpur)-ah te an insemdarh dawn a, tunah hian Aizawl Centre-ah 2nd Batch kalpui mek niin Lunglei-ah pawh Training hi kalpui a ni bawk.

Union Minister of State for Fisheries, Animal Husbandry and Dairying and Minority Affairs George Kurien chuan nimin khan Hnahthial tlawhin sawrkar Department hotute a kawm a, sawrkar laipui Scheme hrang hrang-a hmalakna te, an hnathawh te, an thlen chin leh an hrasatna tawh te hriatpui tura Hnahthial tlawh a nih thu a sawi. Hemi hnu hian Minister hian Department hrang hrang kovin a hriat duh te an sawifiah a, harsatna an neihna kawngah puih theih a awm em tih a zawt nghal a. Govt. Hnahthial College-a Science zir theihna din an duh leh duh loh he hunah hian Principal chu zawtin; African Swine Fever vanga Mizoram in harsatna a tawh dan DVO in a sawifiah a, tanpuina awm thei tur te ngaihtuahpui turin a ngen nghal bawk a ni.

Govt. Middle School Ailawng chuan nimin khan an kum 50 tlinna, Golden Jubilee an lawm a, he hun hi bialtu MLA Lalrintluanga Sailo chuan khuallian niin a hmanpui a ni. Ailawng-a Govt. Middle School hi kum 1974-ah din niin tunah hian zirlai naupang 44 awm mekin, Staff 11 an awm a zirlai tam tak lo zirchhuak tawhin, mi hlawhtling tak tak a lo chher chhuak tawh a ni. He School hi a tirah mipui sum thawhkhawm hmanga harsa taka din niin kum 1994-ah sawrkarin la felin Govt. Middle School, Ailawng tih a lo ni ta a ni.