Manipur-ah President’s Rule puan ngai ti

Mizoram Rajya Sabha MP K. Vanlalvena chuan Manipur buaina sosang zelah Chief Minister thlak mai a tawk tawh lova, President’s Rule puan a ngai tih a sawi.

Akashvani Aizawl hnenah Rajya Sabha MP K. Vanlalvena chuan Manipur-a buaina chu sawrkar laipui-in sipai hmanga a hmeh mih a ngai tawh tih sawiin, Meitei leh tlangmi ralthuam kengte ralthuam neih zat chu Manipur Police-te ralthuam aiin a tam tawh zawk niin a sawi a. Tunah chuan sawrkar laipui-in sipai chakna thapui a hman tangkai a ngai tawh tih a sawi. Sawrkar laipui aiawhte’n sipai venna hnuaiah Meitei leh tlangmite awmna thliar felin an inkarah sipai dah a thisen a luan tawh lohna tura thawh a ngai tih sawiin, Meitei-te pualin inrelbawlna hrang din a, tlangmite tan sawrkar hran din a ngai tawh niin a sawi bawk.

Hetihlai hian Mizoram Kohhran Hruaitute Committee (MKHC) chuan thuchhuah siamin tunhnaia Manipur-a tharum thawhna avanga nunna hlu tak lak a awm leh ta chu pawi an tih thu an sawi a. Tharum thawhna leh buaina titawp tura inrawlh vat turin central sawrkar an ngen a. Manipur Jiribam District a tharum thawhna lo hluar leh ta leh biak In engemawzat tihchhiat leh tihbawrhban a ni chu pawi an tih thu MKHC thuchhuah chuan a tarlang a. Mihring nunna inlaksak, biak In tihchhiat leh inrikrapna ang chi reng reng an duh loh thu leh Sakhaw pakhat biak In bitum bik a awm thin chu tha an tih loh thu an sawi bawk.