Tuilian avanga chhiat tawk te tawm himna tur hawng

Ministry of DoNER atanga sum hmuh cheng nuai 115 hmanga Sairang-a Tuilian avanga chhiat-tawk te tawmhimna tur, Safe House sak chu nimin khan DM&R Secretary K. Lalrinzuali chuan a hawng.

Safe House hawnna hunah hian DM&R Secretary chuan kum 2017 May - July inkar chhunga ruah nasa taka sur avanga Mizoram hmun hrang hranga chhiatna thleng avanga Central puihna, Memorandum for Seeking Central Assistance thehluh a nih thu te, kumin May thlaa Cyclone Remal avanga chhiatna nasa tak thleng avangin Memorandum for seeking Central Assistance from NDRF-ah cheng vbc. 115 thehluh belh a nih thu te sawiin, tunah hian DoNER hnuai atangin One time Central Assistance for Rebuilding totally damaged/washed away infrastructure during floods in 2017-ah cheng nuai 1483 hmuh a ni tawh tih a sawi a. Heng te hi Component pathum- Road & Bridges-ah cheng nuai 815, Agriculture & Allied Sector-ah cheng nuai 333 leh Social Infrastructure-ah cheng nuai 335-ah te then hran a nih thu a sawi a. Social Infrastructure component hnuaiah hian Re-contruction of Safe House at Sairang lehTlabung te leh thildangte a awm a, Tlabung a mi pawh hi sak zawh tawh niin hawn mai theih a nih tawh thu a sawi bawk.

Sairang-a Safe House hawn tharah hian khum 20 a dah theih a. Khuarel chhiatna, abikin Tuilian avang chhiatna a lo thlen thulha In leh lo chan te tana riahluhna tura duan a ni a. Luah ngai lova a awl lai chuan DM&R lam chuan training neihna hmun atan hman remchan an tum a ni.

Nimin-a Safe House hawnna hun hi DM&R Director R. Vanrengpuia chuan kaihruaiin Sr. EE Lalenkawla chuan Technical Report a pe a. DM&R Deputy Director Dr Lalrokima Chenkual leh Sairang Joint VC Chairman te pawhin thu an sawi bawk a ni.