PC Party in VC Term pawhtawi sut leh an duh

Mizoram sawrkarin Village Council term a pawhtawi chu PC Party chuan an duh loh thu leh sut leh nise an duh thu an sawi.

Nimin-a thuchhuah siama an tarlan danin PC Party chuan, Democracy sawrkar lungphum pawimawh ber zing ami chu khawtual inawpna (Village Council leh Municipality) niin hei hi India sawrkarin a ngaih pawimawh zual tak avanga VC term atan hian MLA leh Municipality term anga kum 5 hman a nih thu an sawi a. Party dang kaihhruai sawrkar ten an sawrkar din hmaa lo ding tawh VC te tha taka an thawhpui mai thin laiin ZPM kaihhruai sawrkar kan neih chuan khaw hrang hranga party dang kaihhruai VC te an thawhpui tha duh lo nia sawiin, “Minister leh MLA ten opposition VC te an thawhpui that theih loh thu vantlang hriatah sawi fovin VC leh mipui min vau fo mai a. Hetianga sawrkar chakna hmanga mipui vaubet chunga VC tam tak neih tuma kan sawrkarin hma a la hi a pawiin a tha lo takzet a ni,” an ti. PC Party chuan Dan hmangin Cabinet thutlukna hmangin, chhan tha tawk awmin VC term hi pawhtawi theih a ni ngei tih pawh sawiin, “Chutihlaiin tuna VC term an pawhtawi dan hi Dan kalh a ni a. High Court a inrawlh chuan sawrkar a buai khawp ang,” tiin “Tuna VC term an pawhtawi chhan hi chhuanlam dawrawm tak an siam rualin a nihna takah chuan Sawhthing hralhna an hre dawn lova an inhriat vang niin a lang a. Hetiang mai maia mipui thlantlin te zahpah lo taka sawrkar a che hi PC Party chuan kan dem takzet a. An thutlukna hi sut leh ngei turin kan ngen a ni,” an ti bawk.