Animal Welfare chungchanga hmalakna enfiah

Animal Welfare Board of India (AWBI) aiawh Dr. RB Chaudhary chuan chuan tun thla ni 17 atanga 20 chhung khan Mizoram rawn tlawhin Animal Welfare chungchanga hmalakna te a enpui.

Animal Welfare chungchangah North East State hrang hrangte tlawha zin mek Dr. RB Chaudhary hian Mizoram-a a cham chhungin AH & Vety Department Director Dr. R. Zothanmawii leh Nodal Officer-te hmuin, Animal Welfare Board of India din chhan leh hmalak an tum dante a sawipui a. JB Foundation din Animal Rescue Centre, Bungbangla pawh tlawhin Centre dintute Ramzirsangi leh Lalrokimi Pautu te'n lo dawngsawngin an fankual pui bakah hmalak dante an lo hrilhfiah a. Mi tlawmngai leh ran hmangaih avanga thahnemngai tak takte'n ran chhanchhuahna hmun, Animal Rescue Center changtlung tak an din thei chu lawmawm a tih thu a sawi a, a hmunhma hman hawhtirtu AH & Vety Department chungah pawh lawmthu a sawi bawk.

Animal Rescue Centre, Bungbangla-ah hian tun dinhmunah Ui 40, Kel pakhat, Zawng pakhat leh Zawhte 12 te enkawl mek an ni a. Ran enkawl chhunzawm theih lohte, tihduhdahna tuar enkawl tura lakte leh neitu awm lo khawlaia chharte chu he hmunah hian hmangaih taka enkawl an ni a. A enkawlna senso hi mi tlawmngai, ran hmangaihtute sum thawhkhawm tlingkhawm atanga ruahman a ni deuh ber a ni. Animal Welfare Board of India (AWBI) aiawh hian JB Paws Hospital, Thuampui, Aizawl pawh tlawhin thawktute a kawm a. AMC Commissioner Joseph H. Lalramsanga pawh hmuin Animal Welfare chungchanga hmalak theihna turte leh mawhphurhna chungchang a sawipui a ni.