Smart Metering Scheme hlawkpui zawk beisei a ni

Mizoram-ah Smart Metering Project kalpui a nih dawn avangin hlawkna hrang hrang a awm thei dawn nia tarlan a ni.

Hemi chungchanga sawrkar thuchhuah tarlan danin Sawrkar laipui-a Ministry of Power hmalakna in India ram pumah Electric Power Distribution tihchangtlunna tur Revamped Distribution Sector Scheme (RDSS) hnuaiah Mizoram-a Smart Metering Project hi kalpui a ni dawn a. He Project kalpui a nih chuan hlawkna hrang hrang awm tura beisei niin Mipuiin Eng kan chhit man hi pek lawk (pre-paid) vek tawh tur a nih dawn avangin Collection Efficiency chu 100% a ni thei tawh dawn a, Electric bill ba a awm tawh dawn loh avangin thla tina bill dawn hi a pung thei dawn niin an sawi a. Bill siam sual, Bill sem tlai leh reading lak mumal loh te chu a awm tawh dawn loh thu leh Online-a bill pek tur anih dawn avangin duh hun hunah consumer ten an pe thei tawh anga, thla tawpa a hlawma bill pek ngai tawh lovin mipuiin thla khatah a mamawh ang tawk zelin duh zat zat thla khat chhungin a top up thei tawh anga, a duh zawk chuan thla 2, thla 3 tan pawh a pe lawk thei tawh dawn a ni.

Mizoram-a Smart Metering Project thawk tur hian Contractor/Advance Metering Infrastructure Service Provider (AMISP) leh P&E Department chuan inremna an ziak tawh a, he contract agreement ziah tak hian Mizoram a consumer 289,383 te tana Pre-paid Smart meter vuah sakte, Distribution transformer (DT) 2,300 a Smart meter vuah leh 11kV Feeder 398 atana Smart meter vuah te a keng tel a. Smart Metering hi hlawhtling taka hman theih a nih hunah chuan tuna P&E Department in Meter Reader engemawzat a neih te hian hna tûl dang an thawk thei ang a. Thawktu indaihlohna nasa taka sutkianna hmanrua leh sum renchemna hmanraw tangkai tak a nih tur thu an sawi a ni.