Zohnathlak zawng zawngte hming intawm turin 'Zo' tih thlan a lo ni tawh tih Chief Minister in a sawi

Chief Minister Lalduhoma chuan Zohnathlak zawng zawngte hming intawm turin 'Zo' tih chu thlan a lo nih tawh thu a sawi.

Chin Christian Youth Conference (ICCYC) Inkhawmpui vawi 2-na nizan hmasa-a Chandmary Recreation Centre, Lawngtlai-a neih a hmanpuina ah Chief Minister Lalduhoma chuan ICCYC Inkhawmpui thupui 'We are One' tih chuan inpumkhatna kawng hnihin a tarlang tih sawiin, “Chu chu politics leh rinna lama inpumkhatna hi a ni,” a ti a. Min thlahtu kan pi leh pute khan Mizoram leh a chhehvel luahin, Lal neiin tlang dang dangah khawsa thin mahse, inpumkhatna tha tak an neih thin thu a sawi a. British sawkarin Mizoram an awp hnua an thil hriatchian em em chu Zohnahthlakte chu thisen inzawm, thlah khat, chhulkhat chhuak an nihna chu a ni tih pawh sawiin, “Rorelna pakhat hnuaia awm turin Chin-Lushai Conference chu Fort William, Kolkata-ah kum 1892 khan neih a ni,” a ti a. He Conference hian Chin-Lushai te thlahkhat an nih thu pawmin, hmun khata awm turin an ti a, amaherawh chu harsatna hrang hrang avangin tlang dang dangah kan lo awm ta tih a sawi a ni.

Chief Minister chuan Lushai, Chin leh Kuki tih chu hnamdangin hming min phuahsak mai mai a nih thu pawh sawiin, “Kum 1988-ah Zo Reunification Oraganisation (ZORO) a lo ding a, Champhai-a 'Wold Zo mi Conference' hmasa ber neih a nih khan Zohnathlak zawng zawngte hming intawm turin 'Zo' tih thlan a lo ni tawh,” a ti a. Chhul khat chhuak kan nihna avanga inpumkhatna lam hawi tur kan nih laia U leh nau kara inhmuh thiamlohna awm thin chu pawi a tih thu sawiin, “Inpumkhatna lam hawi a tul tawh takzet,” a ti a. Rei tak chhung tlang dang danga awm hrang lo nih tawh avanga mihrang leh hnamdang anga in enna awm thin chu sim a hun tawhin, inpumkhat leh tura theihtawp chhuah a tul thu a sawi a. Inpumkhatna awm tura mimal taka theihtawp a chhuah thin thu sawiin, USA-ah ngei pawh he inpumkhatna thu a sawi tawh tih a tarlang bawk a ni.

Mizoram chhungah Myanmar, Manipur leh Bangladesh atanga Zohnahthlak raltlan tam tak an awm mek thu pawh Chief Minister chuan sawiin, Sawrkar ang pawhin theihtawpa Raltlante chhawmdawl mek an nih thu a tarlang a. “Hei hian politics lama inpumkhatna thui tak a hril a ni,” a ti a. Kohhran ang zawng pawha inpumkhatna awm a pawimawh thu tarlangin, “Kohhran hrang hrang pariat ten thawkho tura 'Council of Churches in Mizoram' an lo din ta chu thil lawmawm tak a ni,” a ti a. Hmalam hunah pawh Kohhran huangchhung chauh ni lo, Zohnahthlak hnam hrang hrangte inkarah inpumkhatna tha zawk a awm thuai a beisei tih a sawi a. Khawvel ram hrang hranga Zohnahthlakte inpumkhat turin mitinin mawhphurhna an neih thu sawiin, tisa leh thlarau lama inpumkhatna tluantling awm tura theihtawp chhuah turin kalkhawmte a sawm nghal bawk.