CM hovin Boeing Foundation leh sawrkar an inkawm

Boeing Foundation hotute leh Mizoram sawrkar aiawhte chu nimin khan Chief Minister Lalduh-oma kaihhruaia thukhawmin Mizoram-a Boeing Company CSR hman dan tur an sawiho.

CM Conference Hall-a thutkhawm ah hian Boeing India & South Asia-a Chief of Staff & CSR Head Praveena Yagnambhat-i chuan an Company dinhmun leh CSR an hman dan tlangpuite a sawi hmasa a. Boeing chuan India ramah Civil Aviation leh Defence Sector-ah hma lain hnathawktu mi 6000 chuang an neih thu leh CSR hmangin hmalakna tam tak an kalpui thin thu a sawi a. Covid lai khan Aizawl, Lunglei leh Siaha-a Hospital-ah te pawh an thawhpui Doctors for You te kaltlangin hmanrua an rawn pek tawh thu a sawi a. Mizoram-ah hriselna lamah leh zirna lamah hmalakna zau zawk rawn neih an duh thu leh an kal dan te rawn sawifiah pahin hmalakna tur an rawn ngaihven  tih a sawi a. Chief Minister leh a thawhpuiten in hawng taka an dawnsawnna leh thawhpui an in huamna chu ropui an tih thu a sawi bawk.

He thutkhawm ah hian Cancer zai ngaite zaitu tur Coctor thiam bik, a thlawna Aizawl a rawn tirh dan tur te, ZMC-a ICU hmanraw tha leh tunlai ber ber dah belh dan tur te an sawi a. A tul anga Cancer Hospital leh ZMC hmunhma te tlawh hova bawhzui nise an ti a ni.

Zirna lamah Boeing Company hian Learning Links Foundation nen hma an la a. Education Department in Tinkering Labs an kalpui mek tihchangtlun thu te, Sukanya STEM labs, Mizoram zirna In thenkhata bun ve dan tur te leh hmalak theihna remchang dang te an sawi bawk.

He thutkhawm ah hian EF&CC Minister Lalthansanga leh Education Minister Dr. Vanlalthlana bakah Adviser to CM TBC. Lalven-chhunga te an tel a, Secretary to CM Vanlaldina chuan thutkhawm hi a kaihruai a ni.