School naupang nei tlem te kaihkhawp tum an ni

School Education Minister Dr. Vanlalthlana chuan School naupang nei tlem School te chu a remchang apiang kaihkawp tum a nih thu a sawi.

School Education Department Quarterly Review Meeting nimin-a School Education Complex Conference Hall-a neih a hmanpuina ah Education Minister chuan zirna siamthat hna thawh chhoh mekah School naupang nei tlem School te chu a remchang apiang kaihkawp tum a ni tih hi sawiin, School Inspection tha taka kalpui a pawimawh thu leh tanlak a ngaih thu a sawi a. Aikal lak chungchangah sawrkar a kaltlang dawn tih a sawi a, School sak leh repair hnaah a nih dan anga kalpui a pawimawh a, School-a thawkten bialtu DEO te hriatpui loh chuan lo tihdanglam a remchang lo tih a sawi bawk.

Education Minister chuan Education Department-a thawktute tan chuan Office Dawhkan chu an Pulpit a ni tih sawiin, “Kan dawhkan hi Pathian tan i hlan ang u,” tiin Officer kalkhawmte chu Office-a an let leh hunah inhlan thar theuh turin a sawm a, “Pathian in kan hnate hi rawngbawlna atana min pek a ni,” tiin “Kan ram chhunga mi chanhaite chawikang turin keini lo hi Pathian in hmanrua a nei lo a ni,” a ti bawk.

School Education Review Meeting-ah hian School Education Officer te, MBSE, SCERT, Samagra Shiksha Officer-te leh Education Reform Committee member-te telin Education Consultant Rev Prof. Dr. K. Thanzauva pawhin School-ah Class Room-a zirtirna tihthat a tul thu leh tuna kan dinhmun chu a tha tawk lo nia a hriat thu a sawi a. Zirtirna titha tur hian zirtirtuten Lesson plan uluk takin siam se, chumi hmang chuan zirtirna kalpui se, Class Room zirtirna a that theih a beisei thu a sawi a. Sikul mamawh chu sawrkarin a pe vek seng lova, khawtlang nen tanrual a ngai tih a sawi bawk.