Chhawr tlak loh te Dan anga chhuahtir mai tha ti

Chief Minister Lalduhoma chuan Sawrkar hnathawk, chhawr tlak si loh an kawl te chu dan ang taka chhuahtir mai tha an tih thu a sawi.

Chief Minister Lalduhoma hian nimin khan Education Department hmalakna hrang hrang enpuina (Review Meeting) chu Secretariat Conference Hall-ah neihpuiin thil dik lo zawng hrim hrima Review Meeting buatsaih an nih loh thu a sawi a, “Kan dinhmun dik tak leh hnathawn dan te hriatchian kan duh ber a ni. A tul angin thil fel lo awm te kan sawiho zel ang,” a ti a. Department tinah Service Review Committee din turin an tih mek thu sawiin, “Sawrkar hnathawk, chhawr tlak si loh kan kawl te dan ang taka chhuahtir mai tha kan ti. Sawrkar hnathawk quality tha neih kan tum tlat a ni,” tiin hmasawnna hna thawh vat vat an duh tih a sawi a. Sawrkar hnathawkte chu Office hour piah thlenga hnathawh pawh hreh lo tura chahin, “Central Secretariat ka zu tlawh fo a, an peon file keng te thlengin an kal hne hne ngai lo. Zan dar 8:00 thlenga Office a awm hi kalphung nghet ang maiin an nei a, Over time allowance an phut pawh kan hre hran lo. Kan ram tan kan thawk a, inpe ang u,” a ti a. Project Monitoring Committee ten Project thawh mek 40 vel an endik tawh thu leh siam that ngai an hmuh thin thu a sawi a. “Kan sawrkar ve chin atang hi chuan Project kan thawh te hi a nihna tur ang taka thawh leh bawhzui ni ngei se kan duh. Kan khauh dawn,” a ti.

Chief Minister chuan CSR chungchang pawh sawiin, “CSR hi tunhma chuan a sawichhuak thiam thiamin an sawi chhuak a, an duh dan danin an hmang zui leh mai niin a ngaih theih. CSR hi awmze nei zawkin ram tan tangkai takin a hman theih a. Chuvang chuan CSR hi CM Office atangin kan Centralise a, Department tinten CSR in dap zel ang a, CSR Cell hriatpuina zelin in kal dawn nia,” a ti a. Central Fund an dapna kawngah State share percent sang chi chu pumpelh hram hram an duh tih pawh sawiin, “Chuvang chuan Department ten Central-a thehluh tur Project kan neih reng reng Planning Department kaltlang zela thehluh tur a ni. Chu chuan Project inthuah awm thei a veng bawk ang,” a ti bawk.

He Review Meeting hi Education Minister Dr. Vanlalthlana chuan kaihruaiin Chief Minister-in Department te hmalakna enpui a Meeting a buatsaih chu tunhma lama la awm ngai lo, thil thar a ni tih sawiin, a lo neihpui tawhten an hlawkpuizia te an hrilh thu a sawi a. Education Department hmalakna te hi a tam tham avangin Minister Dr. Vanlalthlana hian khaikhawmin presentation a pe hmasa a. Chumi hnuah sawiho tur chhawpchhuah te leh zawhna awm te sawihona an nei zui a ni. Nimin a Review Meeting-ah hian Education Department-a hotute leh sawrkar mi pawimawh te an tel a ni.