Lawngtlai District-a raltlan te dahkhawm tum an ni

Lawngtlai District-ah tun dinhmunah raltlan mi sang riat chuang an awm mek a, raltlan te enkawl kawngah theihtawp chhuah mek niin heng raltlan te hi dahkhawm tum an ni.

Adviser to Chief Minister Lalmuanpuia Punte MLA hovin nimin khan Lawngtlai DC Conference Hall-ah Bangladesh atanga raltlante chungchang sawihona neiin he hunah hian Lawngtlai DC Cheemala Siva Gopal Reddy IAS chuan Lawngtlai chu Myanmar leh Bangladesh ramri-a awm a nih angin raltlan an tam thu a sawi a, tun dinhmunah raltlan Myanmar atangin 6030 leh Bangladesh atangin 2014 bakak Manipur atangin IDP 84 an awm mek tih a tarlang a. Lawngtlai DC chuan Raltlante enkawl kawngah theihtawp chhuah a nih thu sawiin, tunah hian Raltlante tan buhfai sem mek a ni tih a sawi a. Myanmar, Bangladesh leh Manipur atanga raltlante chhawmdawl kawngah Sawrkar laipui leh Mizoram sawrkar duh dan leh thupek ang a hmalak zel a nih tur thu a sawi bawk.

He thutkhawm ah hian Adviser to Chief Minister Lalmuanpuia Punte chuan Bangladesh atanga raltlan awm mekte dinhmun enfiah bakah raltlan lo lut leh tur an awm pawha mumal zawka lo dawngsawn dan tur zirchiang tura Lawngtlai-a kal a nih thu sawiin, Raltlan ten awmna tur atan an duh duhna hmun an thlang emaw, hmun hrang hranga an kal kual thin chu thil fel lo tak a nih avangin mumal zawka inkaihhruaina siam a tul hle tih a sawi a. Raltlan enkawl kawngah hmun khata awmkhawm an nih chuan sawrkar tan pawh hmalak a awlsam dawn tih sawiin, hmun khata awmkhawm tura hmalak mek a ni, a ti a. Bangladesh atanga raltlante chu hmun li - Parva, Damdep-II, Cherluitlang leh Saizawh 'W' ah sawn khawm tura ruahmanna siam mek a nih thu sawiin, heng khua pali zirchiang tur hian Study Team ten an tlawh vek tawh thu leh khawtlang hruaitute pawh sawipui tawh an nih thu a sawi bawk.