Ramri hnaih khua ah E. Roll fimkhur tul ti
Election Commission of India ruahman anga Electoral Roll Special Summary Revision neih meka Serchhip District tana Observer, Supply Department changtu Secretary Zodingpuii hian nimin khan Serchhip rawn tlawhin Electoral Roll ennawn hna thawh mek chungchangah thawktute chu Serchhip DC Meeting Hall-ah a kawm a, he inkawmna ah hian Observer chuan tunhnaiah Mizoram-ah ramdang mi (Foreigner) rawn lut an tam thu sawiin, heng mite hian khua leh tui te chanvo, Electoral Roll-a inthun an tum thin avangin fimkhur a tul thu a sawi a. A bik takin ramri hnaih khua ah te hetiang hi a thlen awlsam avangin fimkhur a tul thu leh Electoral Roll dik leh rintlak kan neih theihna turin thawktute pawhin theihtawp an chhuah a tul thu a sawi a ni.
He inkawmna hi Serchhip District Election Officer leh Bawrhsap Paul L. Khuma chuan kaihruaiin Election Officer F. Lalnisai chuan Electoral Roll ennawn hna thawh meka an hmalakna te a tarlang a. Serchhip District-ah hian Assembly Constituency pathum 26-Serchhip (ST) AC, 27-Tuikum (ST) leh 28-Hrangturzo (ST) AC te awmin ERO leh AERO ten an vil a. Draft Roll tarchhuah a nih atangin dilna chi hrang hrang an dawn te chu tunah hian AERO ten an khua ah kalchilhin hearing an neih mek thu a sawi bawk a ni.
Comments
Post a Comment