Sawrkarin kalphung tha nei turin kawng tam tak ah hma a la chho mek tih Chief Minister in a sawi

Chief Minister Lalduhoma chuan sawrkarin kalphung tha nei turin kawng tam takah hma a la chho mek tih sawiin, Kalphung tha lo tam tak te vawilehkhat a siam that zung zung theihloh te pawh a awm a, mahse Sawrkar angin chak takin hmalak chhoh zel a nih thu a sawi.

Chief Minister hian nimin khan Lunglei-a ZPM Southern Hqrs. Office ah thu sawiin, Village Council inthlan chungchangah kumthar 2025 February thla chawhnu lamah chuan inthlanna neih tura ruahman mek a nih thu a sawi a. Village Council term pawhsei leh tih tawi chu sawrkar thuneihna a nih thu sawiin, “Tunhma pawhin pawhsei leh pawhtawi te alo awm tawh thin a, thuneitute thuneihna a ni,” a ti a, “Tunah Court-ah kan khing dawn tih thawm te kan hria a, an buai peih chuan min khing se, keini tan buaina tur a awm hran lo,” a ti a. “Village Council kan han inthlang ang a, Financial Year thar April thla atangin hna an thawk thei tawh dawn,” tiin Village Council thar-ah chuan kalphung thara kal turin an duh dawn tih a sawi bawk.

Chief Minister chuan Hand-Holding chungchang ah Loan lak chi leh Chief Minister’s Special Package, a thlawn a cheng nuai khat thleng lak theihna a awm tih sawiin, November thla thleng dilna hun hawn a nih thu leh heng diltute hian tunah hian an hmuhloh pawhin an dilna hi an ring zel thei dawn tih a sawi a, tun December thla chhung hian CM’s Special Package bik hi Selection neih tum a nih thu leh tun financial Year chhung ami tur hi chu a Pilot Project anga kalpui a nih thu bakah nakum leh a kumleh ah tam lehzuala kalpui chhoh zel tum a nih thu a sawi bawk.

Chief Minister chuan Handholding chi hnih kalpui turah hian Project/Trade nei tha lo leh endik dawl lo chu ZPM Party hotu pawimawh tak pawh nise thlan tur an ni lo tih sawiin, “Mi hlawhtlinglo tur chu tupawh nise thlan tur an ni lo,” a ti a. “Hetianga kan kal loh chuan Sawrkar kal hmasa te nen kan danglamna a awm dawn lo,” tiin, “Ram siam that tuma hma la kan ni a, siam tha turin Pathian in Sawrkarna min pe a, siamthat hna kan thawhleh siloh chuan awmzia a nei dawn lova, chuvangin mi hlawhtling tur kan lawr dawn,” a ti bawk.

Chief Minister chuan Sawhthing, Aieng, Hmarcha leh Hmunphiah lei turin Expression of Interest (EOI)  Advertisement tihchhuah tawh anih thu sawiin, tun thla November 22, 2024 kha a thehluh hun hnuhnung ber a nih thu a sawi a, heng lei duh tur hote nen inremna siampui tum mek a ni tih sawiin, “Sawhthing lei duh Empannel Farm kan nei anga, chutiangin a dangte pawh hi kan nei ang. Kan hriatpuia Sawrkar nena inremna kan ziahpuite hi chu Sawrkar hmunhma Godown te hman phalsak an ni dawn a, inremna kan ziahpuite hnena hralh te hnenah Support Price kan pe ang,” a ti a. “Hetihlai hian lei ve duh dang, kan rate ang Rs. 50/- chin chung lama an lo lei ve duh a nih chuan a tam thei ang ber lo dawr ula kan duh a, hengte hi Support Price pek an ngai ve lo,” tiin khawi khua emaw-a an duh ang rate-a an lo hralh pawhin an duh dan chu tha an tihpui tih a sawi a, Support Price erawh pek ve an ni lovang tih a sawi bawk.