MAL in Pho Chhuah Runpui an buatsaih

Mizo Academy of Letters (MAL)-in kum 60 an tlin lawmna (Diamond Jubilee) puala ‘Pho Chhuah Runpui’ an buatsaih chu nimin khan Aizawl Vanapa Hall-ah MAL Donor Member, Prof. Laltluangliana Khiangte chuan a hawng.

Pho Chhuah Runpui hawn inkhawm hi MAL President, Prof. RL. Thanmawia chuan kaihruaiin Pho Chhuah Runpui Committee Secretary H.Lalawmpuia chuan report a pe a. Pho Chhuah Runpui hawngtu, Prof. Laltluangliana Khiangte chuan MAL in kum 60 a tling ta chu lawmawm a tih thu leh Mizo thu leh hla hmasawnna atana a hnathawh chu ropui a tih thu a sawi a ni.

MAL hi April ni 23, 1964 khan din a ni a, harsatna hrang hrang karah thang chho zelin, tunah hian member 500 dawn lai an ni tawh a. MAL danpui thar angin kumin atang hian an pawl inrelbawl dan thar angin General Headquarters pakhat, Joint Headquarters 3 leh Branch pakhat an nei mek a. Pho Chhuah Runpui-ah hian Aizawl-a lehkhabu dawr hrang hrang 23 leh mimal lehkhabu nei mi 10 in an lehkhabu an pho chhuak a. Heng lehkhabu te hi man tlawm zawka hralhchhuah a ni. Lehkhabu bakah hian Mizo ziak mi te kutziak leh an hmanraw hlui te, Mizo Academy of Letters-in Academy Award a lo hlan tawh te, MAL Book of the year lo dawng tawh te thlalak leh an lehkhabu te pho chhuah a ni a, a duh tan lei theih a ni bawk.