AMC-ah Motor 20 hlanin inremna ziahfel nghal a ni

Aizawl Municipal Corporation (AMC), UD&PA Department leh Smart City hmalakna tangkawp Faina Hmathlir ‘Comprehensive Plan for Municipal Waste in Aizawl’ hnuaiah nimin khan bawlhhlawh paih motor (garbage truck) 20 te chu Smart City in AMC kutah an hlan.

Smart City in bawlhhlawh paih motor a hlanna hun buatsaih hi UD&PA Minister K. Sapdanga’n khuallian niin a hmanpui a, bawhhlawh paih motor hi AMC kutah hlanin heng bawlhhlawh paih motor te hi a vailiam nghal a ni. Minister K. Sapdanga chuan an hmalak mek hlawhtlinna chu mipuite kutah a awm tih sawiin, theihtawpin sawrkarin hma an la zel dawn tih a sawi a, khawpui fai loh chu AMC mawh chauh nilo in mipuite mawhphurhna a ni tih sawiin, chhungkaw tin te bawlhhlawh thliar-hran leh paih kawngah nasa zawka tan la zel turin a chah a ni.

Nimin-a he hun hman rual hian ‘Tripartite Agreement on Construction of Material Recovery Facility Centre at Luangmual’ chu ziah nghal a ni a. He Project atan hian NEPRA Resource Management Pvt. Ltd., Ahmedabad, Gujarat leh JN Buildcon, Aizawl, Mizoram te thlan niin Smart City hian a sum tumin Contractor te hian a hmunhma sak leh enkawl zui hna an thawk dawn a. AMC in bawlhhlawh lakkhawm tumin AMC ram-ah Centre hi sak tur a ni ang.

‘Material Recovery Facility Centre’ project hi agreement sign atanga thla 12 chhunga zawhfel tur niin NEPRA Resources Management Pvt. hian Indore, Pune, Bengaluru, Jamnagar leh Ahmedabad-ah te hlawhtling takin hna an lo thawk tawh a. Aizawl khawpui tana an thawh turah hian AI Technology thar ber te install tel a ni dawn a. He Centre hi Rs. 25,17,16,180 senga sak tur niin thla 12 chhunga sak zawh tur a ni a, Ni khata bawlhlawh a sawngbawl theih tur zat hi Tonne 75 a ni.