Hualtu khuaa YMA kum 50 tlin lawmna Serchhip Bawrhsap hovin neih a ni
Serchhip District Bawrhsap hian Hualtu khuaa YMA Golden Jubilee hriatrengna lungphun chu hawngin Hualtu khuaa YMA President hmasa ber J. Thansiama chuan Jubilee Mei a det a. Hemi hnu hian Alu Hmun Field-a Hualtungamtawna Run-ah Jubilee lawmna hun hman zui a ni a. He hunah hian Bawrhsap Paul L. Khuma chuan Hualtu Branch YMA in kum 50 a tling ta chu a lawmpui thu sawiin lawmpuina chibai a buk a. Mihring te hi kan khawsak hona ah a chhe zawnga rilru pu lovin a tha zawnga kan put tlan a pawimawh thu a sawi a. Hualtu khua chu khaw taima, kawng hrang hranga entawntlak a nih thu sawiin, hei hi pi leh pu leh YMA ten nundan phung tha an lo inzirtir thin in a hrinchhuah a nih a rin thu leh kum naupang zawkte ah pawh kan inzirtir chhunzawm zel a tul thu a sawi a. YMA Member te chu Motto-a an neih angin hun awl hmang tha turte, kawng hrang hranga Zofate hmasawnna ngaihtuah tur leh Kristian nundan tha ngaisang tura chahin, chu chu khaw entawntlak, Model Village an nih theihna kawng pawimawh tak a nih thu a sawi bawk.
Bawrhsap chuan YMA hmalakna chu Isua zirtirna nen thil inang leh kalkawp tlat nia a hriat thu pawh sawiin, hei hi vawnnun zel pawh a pawimawh thu a sawi a. Mihring thatna ringawt chuan thui tak kal a harsat thin avangin tawngtaina nen khawtlang tana hna thawk turin a chah a, mipuite tana rawng an bawlna ah pawh hmangaihna nena kal zel a tul thu a sawi bawk.
Hualtu Branch YMA Golden Jubilee lawmna hun hi Branch YMA President R. Lalengkima chuan kaihruaiin Central YMA atangin Treasurer Roneihthanga chuan Hualtu YMA Golden Jubilee Souvenir tlangzarhin Mizote hi kan pung chak ta lo hle tih sawiin, Hnam ral zia kan ni ang tih a hlauhawm tih a sawi a. Kawng hrang hrangah kan Hnam dinhmun kan chhut ngun a tul thu sawiin, Hnam ral ni lo tura tan kan lak a ngaih thu leh a bik takin thalai te zuk leh hmuam bakah ruihhlo laka kan fihlim a tul thu a sawi bawk. Serchhip Sub-Hqrs. YMA atangin Secretary K. Laltlanmawia pawhin he hunah hian Hualtu YMA in kum 50 an tlin an lawmpui thu sawiin, YMA chu tanpui ngaite tanpuitu a nih angin Hualtu YMA chu tanpui ngaite tanpui kawnga theihtawp chhuah zel turin a chah a. Anni bakah hian Tawitlang Group YMA leh Hualtu khawtlang hruaitute pawhin he hunah hian thu an sawi bawk a ni.
Hualtu khua ah hian kum 1943-ah YMA hi dingin Rambuai avanga Baktawng khuaa sawikhawm an nih avangin YMA hi a ding zui ta lo a. Hualtu khuaa an kir leh hnuah kum 1974 khan YMA hi ding lehin tun thlengin chatlak awm lovin a ding zui ta a, tunah hian Member mipa 368 leh hmeichhia 253, an vaiin member 621 an awm mek a ni. Hualtu khua ah hian In 226 awmin chhungkua 240 vel an awm mek a, mihring 1200 vel an cheng mek a ni.
Comments
Post a Comment